នៅខែឧសភា ឆ្នាំ២០២៣ ខាងមុខនេះ រោងចក្រតម្លៃ ៣០០ លានដុល្លារ ស្ថិតនៅក្នុងខេត្ដព្រះសីហនុ នឹងសម្ពោធដាក់ឲ្យដំណើរការជាផ្លូវការហើយ ដោយពិធីសម្ពោធនេះក៏មានការអញ្ជើញចូលរួមពីអធិបតីភាពដ៏ខ្ពស់ខ្ពស់ពីសម្ដេតេជោនាយករដ្ឋមន្ដ្រីផងដែរ។ នេះយោងតាមប្រសាសន៍លើកឡើងរបស់ឯកឧត្ដម គួច ចំរើន អភិបាលនៃគណៈអភិបាលខេត្ដព្រះសីហនុនាពេលថ្មីៗនេះ។

ថ្លែងនៅក្នុងជំនួបជាមួយឧបការី រដ្ឋមន្រ្តីការបរទេសចិនកាលពីថ្ងៃទី២២ ខែមេសា ឯកឧត្ដមបញ្ជាក់ថា «នៅខែឧសភា ឆ្នាំ២០២៣ខាងមុខ សម្តេចតេជោ ហ៊ុន សែន នាយករដ្ឋមន្ត្រីអញ្ជើញចូលរួមពិព័រណ៍ និងសម្ពោធរោងចក្រផលិតសំបកកង់រថយន្តដំបូងក្នុងខេត្តព្រះសីហនុ មានទុនវិនិយោគ ៣០០លានដុល្លាអាមេរិក ប្រើប្រាស់កម្លាំងពលកម្ម ១៥០០នាក់ ជាក្រុមហ៊ុនឧស្សាហកម្មធំហើយទំនើបនៅខេត្តព្រះសីហនុ»។

សូមជម្រាបថា រោងចក្រផលិតសំបកកង់រថយន្ដនៅក្នុងខេត្ដព្រះសីហនុនេះ ទីតាំងស្ថិតនៅតំបន់សេដ្ឋកិច្ចពិសេសក្រុងព្រះសីហនុ ក្នុងឃុំបិតត្រាំង ស្រុកព្រៃនប់ ខេត្តព្រះសីហនុ ត្រូវបានវិនិយោគដោយក្រុមហ៊ុន ជេនេរ៉ល ថាយអឺរ ថេកណឡជី( General Tires Technology) ។ រោងចក្ររោងចក្រដ៏ធំនេះត្រូវសាងសង់លើផ្ទៃដី ២៨ហិកតា ដោយជំហ៊ានទី១ សាងសង់លើផ្ទៃដី ១០ហិកតា។

សម្រាប់ដំណាក់កាលដំបូងរោងចក្រនេះអាចផលិតសំបករថយន្តប្រភេទតូច ១៥០០០គ្រឿង ក្នុងមួយថ្ងៃ ក្នុងកង់មួយអាចប្រើពេល ៣៨វិនាទី ដោយឡែកសំបកកង់ឡាណធំអាចផលិតបាន ២៥០០ក្នុងមួយថ្ងៃ ក្នុងសំបកមួយអាចប្រើពេល ៦០វិនាទី។ បច្ចុប្បន្នក្រុមហ៊ុននេះមានរោងចក្រនៅប្រទេសចិន និងប្រទេសថៃ ហើយសំបកកង់ដែលផលិតរួចនាំទៅកាន់សហរដ្ឋអាមេរិកផងដែរ៕

អត្ថបទ៖ កឹម ប៊ុនធឿន