ទីក្រុងរណបបាននិងកំពុងលេចចេញជារូបបណ្តើរៗហើយ ទៅតាមតំបន់សំខាន់នានាជុំវិញរាជធានីភ្នំពេញ ដែលវានឹងក្លាយជាទីក្រុងថ្មីដ៏រសរវើកមួយនាពេលអនាគត។ ហើយការអភិវឌ្ឍន៍ទីក្រុងរណប ប្រៀបបានទៅនឹងបែងចែកតំបន់បន្ថែម ដែលផ្ដល់នូវការសម្រួលជាច្រើន ដូចជាបញ្ហាកកស្ទះចរាចរណ៍ ត្រូវបានកាត់បន្ថយ ដោយសារតែនៅក្នុងទីក្រុងរណប ភាគច្រើនសុទ្ធតែមានការបង្កើតជាតំបន់ពាណិជ្ជកម្មទាំងអស់ ដែលអ្នករស់នៅអាចធ្វើការបង្វែរគោលដៅទីតាំងអាជីវកម្ម ក៏ដូចជាកន្លែងការងារជាដើម។
១. ទីក្រុងរណបជ្រោយចង្វារ
តំបន់ជ្រោយចង្វា និងតំបន់ស្ថិតនៅតាមបណ្តោយផ្លូវជាតិលេខ៦A មានសកម្មភាពអភិវឌ្ឍន៍ខ្លាំង ដោយមានបុរីធំៗជាច្រើនកំពុងសាងសង់ រួមមាន៖ ផ្សារទំនើប BigC , បុរីប៉េង ហួត, បុរី The Mekong Royal, បុរីអ័រគីដេ, បុរីបុរីឌឹ ផ្លារ៉ា និងបុរីវិមានភ្នំពេញ ក៏ដូចជាគម្រោងអគារខ្ពស់ៗជាច្រើនទៀតផងដែរ ។
ដោយឡែកចំពោះទីក្រុងរណបជ្រោយចង្វារវិញគឺ មានផ្ទៃដីទំហំជាង១០០ហិកតា ដែលមានតម្លៃទុនវិនិយោគប្រមាណ៣.០០០លានដុល្លារ បាននិងកំពុងចាប់ផ្តើមបញ្ចេញពន្លឺបន្តិចម្ដងៗហើយ ជាមួយអគារពាណិជ្ជកម្មខ្ពស់ៗ លំនៅដ្ឋានបែបអភិជន ភោជនីយកដ្ឋាន ផ្សារលក់រាយ មជ្ឈមណ្ឌលកំសាន្ត សាលសន្និសីទជាដើម។
២. ទីក្រុងរណបកោះនរា
ទីក្រុងរណបកោះនរា ត្រូវបានវិនិយោគដោយលោកអ្នកឧកញ៉ា ពុង ឃាវសែ ដោយក្រុមហ៊ុនសាជីវកម្មវិនិយោគទុកអនិកជនកម្ពុជា (OCIC) ក្រោមទុនវិនិយោគប្រមាណ២.៥០០លានដុល្លារក្នុងទំហំដី១២៥ហិតា ដែលអនុញ្ញាតឲ្យពលរដ្ឋេរស់នៅបានដល់ទៅ ៥ម៉ឺននាក់។
នេះគឺជាគម្រោងទី២ របស់លោកអ្នកឧកញ៉ា បន្ទាប់ពីទីក្រុងរណបកោះពេជ្រនិងទីក្រុងរណបជ្រោយចង្វារ ខណៈគម្រោងនេះមានទីតាំងស្ថិតនៅខាងកើតនៃទីក្រុងកោះពេជ្រ បានចាក់ដីបំពេញ និងបន្តសាងសង់ឥតឈប់ឈរ ដែលនឹងក្លាយជាមជ្ឈមណ្ឌលពាណិជ្ជកម្ម ទេសចរណ៍ ដ៏ទាក់ទាញបំផុតសម្រាប់រាជធានីភ្នំពេញ និងជាទីកន្លែងបណ្តុំទៅដោយអគារពាណិជ្ជកម្មធំៗ ខ្ពស់ៗ ដូចជា អគារស្នាក់នៅរួម ខុនដូ ផ្សារទំនើប សណ្ឋាគារ ជាដើម។
៣. ទីក្រុងរណប ING City
ទីក្រុងរណប ING City ត្រូវបានវិនិយោគដោយឧកញ៉ា អ៊ឹង ប៊ុនហ៊ូវ ក្នុងទំហំដីជាង២០០០ហិកតា មានទីតាំងស្ថិតនៅតំបន់ភាគខាងត្បូងរាជធានីភ្នំពេញ។ បច្ចុប្បន្នគម្រោងនេះ កំពុងបង្ហាញពីសន្ទុះអភិវឌ្ឍន៍គួរឲ្យកត់សម្គាល់ ក្រោយពីគម្រោងធំៗមួយចំនួន បាននិងកំពុងដាក់ទិសដៅអភិវឌ្ឍសាងសង់នៅតំបន់នោះជាបន្តបន្ទាប់ ដូចជាគម្រោងផ្សារទំនើប PH Diamond Place និង Aeon3 ជាដើម។ តំបន់ទីក្រុងរណប ING City នេះ គឺជាតំបន់ដែលមានសក្ដានុពលខ្លាំង ក្នុងការសាងសង់លំនៅដ្ឋាន និងអគារពាណិជ្ជកម្មចម្រុះ ដើម្បីពង្រីកកំណើនសេដ្ឋកិច្ចសង្គម ទៅថ្ងៃអនាគត។
៤. ទីក្រុងរណបមេគង្គឃី
ទីក្រុមហ៊ុនថ្មីនេះ ត្រូវបានអភិវឌ្ឍន៍ដោយក្រុមហ៊ុន ធីភី ម៉ូរ៉ាល់ គ្រុប (TP Moral Group) និងបានបើកការដ្ឋានសាងសង់កាលពីថ្ងៃទី១៧ ខែធ្នូ ឆ្នាំ២០២៤ កន្លងទៅ ក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា។
តាមការបញ្ជាក់ពីក្រុមហ៊ុន ធីភី ម៉ូរ៉ាល់ គ្រុប បានឲ្យដឹងថា គម្រោងទីក្រុងមេគង្គឃី នេះមានទំហំ ២១០ ហិកតា មានទីតាំងស្ថិតនៅតាមបណ្ដោយមាត់ទន្លេមេគង្គ ក្នុងភូមិខ្សាច់ សង្កាត់អរិយក្សត្រ ក្រុងអរិយក្សត្រ ខេត្ដកណ្ដាល។ ដោយក្នុងនោះផ្ទៃដី ១៤០ ហិកតានៃគម្រោងទាំងមូល ក្រុមហ៊ុននឹងធ្វើការអភិវឌ្ឍន៍ជាអគារពាណិជ្ជកម្ម ផ្សារទំនើប មណ្ឌលអប់រំ មណ្ឌលទេសចរណ៍ និងសណ្ឋាគារស្ដង់ដារអន្ដរជាតិជាដើម។ ដោយឡែកផ្ទៃដីចំនួន ៧០ ហិកតាទៀតក្រុមហ៊ុននឹងអភិវឌ្ឍន៍សេដ្ឋារចនាសម្ព័ន្ធដូជា ផ្លូវ សួនច្បារសាធារណៈ កន្លែងហាត់ប្រាណ និងរៀបចំតំបន់សួនច្បារបៃតងតាមដងទន្លេដ៏ធំទូលាយផងដែរ៕
