«តុមានជើង៤ទើបបានមាំទាំ រីឯអ្នកមានរឹងមាំវិញទាល់តែមានសម្បត្តិទាំង ៤ផងដែរគឺ៖ ចំណេះវិជ្ជា មាយាទល្អ សីលធម៌ និងសម្បត្តិទ្រព្យ» នេះគឺជាទស្សនៈដឹកនាំជីវិតដ៏មានតម្លៃមួយរបស់សហគ្រិនចាស់វស្សាគឺ ឧកញ៉ា ហៃ លីអ៊ាង គឺជាប្រធានអគ្គនាយកក្រុមហ៊ុន Confirel និងជាម្ចាស់សហគ្រាសផលិតឱសថដ៏ល្បីឈ្មោះ PPM ដែលត្រូវបានគេស្គាល់ថាជាសហគ្រិនដ៏លេចធ្លោមួយរូប ក្នុងការជួយកែច្នៃផលិតផលក្នុងស្រុកជាច្រើនមុខដូចជាស្ករត្នោតសរីរាង្គ តែ ម្រេចកំពត និងផលិតឱសថគីណាល់ ដើម្បីផ្គត់ផ្គង់ក្នុងស្រុកផង និងនាំចេញទៅក្រៅឱ្យបរទេសបានស្គាល់ពីផលិតផលខ្មែរពិតៗ។
ក្រុមហ៊ុន Confirel ត្រូវបានបង្កើតឡើងពីគំនិតសាមញ្ញមួយគឺ លោកយល់ថាការអភិវឌ្ឍប្រទេសកម្ពុជា ប្រហែលមិនអាចសម្រេចបានទេបើគ្មានទីជនបទ។ ក្រោយពេលដែលផុសគំនិតនេះឡើងមក គឺវាបានដាស់មហិច្ឆិតាស្នូលចំនួនពីរបានកើតឡើង៖ ការប្តេជ្ញាថែរក្សាដើមត្នោត ឱ្យរស់ឡើងវិញ ព្រោះវាជាអត្តសញ្ញាណជាតិ ជាធនធានធម្មជាតិដ៏សំខាន់នៅក្នុងប្រទេសកម្ពុជា និងការចូលរួមស្ដារឡើងវិញ នូវស្ថានភាពនៃបេតិកភណ្ឌធម្មជាតិរបស់កម្ពុជា និងអាចអនុញ្ញាតឱ្យប្រជាជន ជនបទអាចស្វែងរកប្រាក់ចំណូលបានតាមរយៈដើមត្នោត និងផលិតផលកសិកម្មនានារបស់ខ្លួនដូចជាម្រេចជាដើម។
ចាប់ផ្ដើមភ្លាម មិនមែនធំដុំដូចបច្ចុប្បន្ននោះទេគឺ Confirel បានចាប់ផ្ដើមពីការកែច្នៃស្ករត្នោត ស្ករពាងដោយលក់១គីឡូបានត្រឹមតែ ៥០០រៀលតែប៉ុណ្ណោះ ប៉ុន្តែក្រោយមកក៏ឡើងបាន១ម៉ឺនរៀល ហើយក៏បន្តកែច្នៃជាស្ករផែនក្នុងទម្រង់ស្រដៀងស្ករគ្រាប់អាចញ៉ាំបាន និងមានច្រើនរសជាតិដូចជារសជាតិម្រេច ចេក ដូង ស្វាយ ម្នាស់ ទុរេន មកជាហូរហែរ និងកាន់តែច្រើនមុខឡើងៗ រហូតបានជាង១០០មុខទៅហើយ។
ជាក់ស្ដែងគ្រាន់តែស្ករត្នោត១ប្រភេទសោះ Confirel បានកែច្នៃចេញជាផលិតផលសម្រេចមិនតិចជាង ៤០មុខនោះទេ ហើយទឹកត្នោតដែលបានមកពីដើម បានកែច្នៃចេញជាស្រាសុខភាព និងផលិតផលអត្តសញ្ញាណជាតិជាហូរហែរ។
ឆ្លងកាត់ការធ្វើជំនួញក្នុងការជួយលើកកម្ពស់កសិផលខ្មែរ អស់រយៈពេលជាង២០ឆ្នាំ Confirel ត្រូវបានប្រជាជនកម្ពុជាឱ្យតម្លៃ ហើយបរទេសទទួលស្គាល់ រហូតទទួលបានលិខិតកោតសរសើរជាច្រើនប្រភេទ ដើម្បីជាការទទួលស្គាល់នូវការខិតខំប្រឹងប្រែង លើបេសកកម្មរបស់ Confirel តាំងពីថ្ងៃទី១ រហូតមកទល់នឹងពេលនេះយ៉ាងច្រើនសន្ធឹកផងដែរ៕ អត្ថបទដោយ៖ ឡុង វឌ្ឍនៈ
សម្រាប់ព័ត៌មានបន្ថែម សូមចូលទៅកាន់៖ ( Confirel )
