បុគ្គលិកជាអវយៈរបស់អាជីវកម្ម មានបុគ្គលិកល្អធ្វើការ ក្រុមហ៊ុនក៏ឆាប់រីកចម្រើន។ ក្នុងនោះក៏មានបុគ្គលិកប្រភេទខ្លះ គឹត្រូវត្រួតពិនិត្យឱ្យបានហ្មត់ចត់មុនជួលពួកគេមកធ្វើការ។ បើតាមលោក Omar Asali នាយកប្រតិបត្តិក្រុមហ៊ុនផលិតកេសក្រដាស Ranpak បានថ្លែងប្រាប់CNBC មានបុគ្គលិក១ប្រភេទ ដែលត្រូវប្រយ័ត្នមុនសម្រេចចិត្ត ជួលឱ្យមកធ្វើការនោះគឺអ្នកដែល "ពូកែនិយាយគ្មានទាក់" ។
លោកបានបញ្ជាក់ថាបុគ្គលិកសិ្ថតក្នុងប្រភេទនេះម្ចាស់អាជីវកម្មគួរពិចារណាឱ្យបានល្អិតល្អន់ មុនជួលពួកគេមកធ្វើការ ខណៈនេះក៏ជាទង់ក្រហមនៅក្នុងដំណើរការសម្ភាសន៍បុគ្គលិក។ ដោយ CEO វ័យ៥៣ឆ្នាំ រូបនេះបានបន្ថែមថាបុគ្គលិកដែលពូកែនិយាយផ្សព្វផ្សាយខ្លួនឯងខ្លាំងពេក និងមិនសូវនិយាយពាក្យពិតប៉ុន្មាននោះទេ ជារឿយៗពួកគេតែងទុកខ្លួនឯងសំខាន់ខ្លាំងនិងមិនសូវគិតពីមនុស្សជុំវិញខ្លួននិងអង្គភាពនោះឡើយ។
ចំពោះគន្លឹះរើសបុគ្គលិកជាលក្ខណៈផ្ទាល់ខ្លួនរបស់លោកវិញ គឺនៅពេលស្ថិតលើតុសម្ភាសន៍លោក Omar Asali តែងតែកត់សម្គាល់បេក្ខជនថាពួកគេជា «អ្នកធ្វើ» ឬ «អ្នកនិយាយ» តាមរយៈការពិព័ណ៌នាអំពីខ្លួនឯងរបស់ពួកគេទៅកាន់អ្នកសម្ភាសន៍នៅក្នុងបន្ទប់ តើពួកគេនឹងនិយាយហើយទទួលស្គាល់អំពីចំណុចខ្សោយរបស់ខ្លួនឯងដែរឬទេ? តើពួកគេធ្លាប់ដោះស្រាយចំណុចខ្សោយនិងភាពបរាជ័យរបស់ខ្លួនឯងដោយវិធីណា? តើពួកគេមានទុកអត្តានៅមាត់ទ្វារឬទេ?
ជាក់ស្តែងប្រសិនជាគេស្មោះត្រង់និងជាមនុស្សពូកែធ្វើ ជាងពូកែនិយាយ គេនឹងលើកចំណុចទាំងនោះចេញមកនិយាយជាករណីជាក់ស្តែង ដោយមិនបានត្រៀមទុកមុនឡើយ ហើយនោះគឺជាសញ្ញានៃទង់ពណ៌ខៀវដែលពួកគេគួរតែជាបុគ្គលិកដែលអាចបន្តធ្វើការងារជាមួយក្រុមហ៊ុនបាន៕
អត្ថបទដោយ៖ ពីង ជូអេង
