បច្ចុប្បន្នកម្ពុជាមានប៉ូលសេដ្ឋកិច្ធធំៗចំនួន ៣ ដោយក្នុងនោះប៉ូលសេដ្ឋកិច្ចទី១ គឺនៅរាជធានីភ្នំពេញ ប៉ូលសេដ្ឋកិច្ចទី២ នៅខេត្ដព្រះសីហនុ និងប៉ូលសេដ្ឋកិច្ចទី៣ គឺនៅខេត្ដសៀមរាប។ យ៉ាងណាទាក់ទងនឹងប៉ូលសេដ្ឋកិច្ចនេះដែរ ថ្មីៗនេះ ប្រមុខរាជរដ្ឋាភិបាលក៏បានបង្ហើបពីការបង្កើតប៉ូលសេដ្ឋកិច្ចចំនួន ២ បន្ថែមទៀតផងដែរ។

១. ប៉ូលសេដ្ឋកិច្ចភាគពាយ័ព្យ

ប៉ូលសេដ្ឋកិច្ចថ្មីនេះ ត្រូវបានបង្កើតឡើងពីការចរចារវាងសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជណាចក្រកម្ពុជា និងឯកឧត្ដម ស៊ី ជិនពីង ប្រធានាធិបតីនៃសាធារណរដ្ឋប្រជាមាណិតចិនកាលពីពេលកន្លងទៅ។ ប៉ូលសេដ្ឋកិច្ចនេះបង្កើតឡើងគឺផ្សាភ្ជាប់ជាមួយការផលិតត្រី និងអង្ក ដើម្បីកៀរគរវិនិយោគ ក្នុងនិងក្រៅប្រទេស មកចូលរួមជំរុញផលិតកម្ម ការកែច្នៃ និងការនាំចេញ កសិផល វារីវប្បកម្ម និងបសុសត្វ ទៅកាន់ទីផ្សារចិន និងអន្តរជាតិ។

ជាមួយគ្នានេះដែរ បើតាមការបញ្ជាក់ពីសម្ដេចតេជោនាយករដ្ឋមន្ដ្រី រដ្ឋាភិបាលបានសម្រេចជ្រើសរើសយកខេត្ដពោធិ៍សាត់ ខេត្ដបាត់ដំបង ខេត្ដបន្ទាយមានជ័យ និងខេត្ដប៉ៃលិន ក្នុងការបង្កើតប៉ូលសេដ្ឋកិច្ចទី៤នេះ។

២. ប៉ូលសេដ្ឋកិច្ចភាគឦសាន

យោងតាមប្រសាសន៍លើកឡើងរបស់សម្ដេចតេជោ ហ៊ុន សែន បានឲ្យដឹងថាក្រៅពីការបង្កើតប៉ូលសេដ្ឋកិច្ចទី៤ កម្ពុជាក៏នឹងអាចបង្កើតប៉ូលសេដ្ឋកិច្ចទី៥ ដែលមានទីតាំងស្ថិតនៅភាគឦសាន។ ហើយប៉ូលសេដ្ឋកិច្ចពៅគេនេះ គឺផ្ដោតលើវិស័យកសិ-ឧស្សាហកម្ម។ ហើយបើតាមប្រសាសន៍បញ្ជាក់បន្ថែមពីសម្ដេចតេជោប៉ូលសេដ្ឋកិច្ចនេះនឹងមានខេត្ដស្នូលចំនួន ៤ រួមមាន៖ ខេត្ដក្រចេះ ខេត្ដស្ទឹងត្រែង ខេត្ដតរនៈគិរី និងខេត្ដមណ្ឌលគិរី៕

អត្ថបទ៖ កឹម ប៊ុនធឿន