មហាសេដ្ឋីកាស៊ីណូ Tan Sri Dr Chen Lip Keong ដែលជាស្ថាបនិក ម្ចាស់ភាគហ៊ុនធំ និងជានាយកប្រតិបត្តិជាន់ខ្ពស់របស់ NagaCorp Ltd បានទទួលមរណភាពក្នុងជន្មាយុ ៧៥ឆ្នាំ។ នេះបើយោងតាមទីភ្នាក់ងារសារព័ត៌មានចិន Nanyang Siang Pau ចុះផ្សាយនាយប់ថ្ងៃទី១០ ខែធ្នូ ឆ្នាំ២០២៣។

ប្រភពដដែលបានរាយការណ៍ថា លោក Chen បានទទួលមរណភាពនៅសហរដ្ឋអាមេរិក ប៉ុន្តែចំពោះមូលហេតុនៃការស្លាប់របស់គាត់ពុំទាន់ដឹងនៅឡើយទេ។ យ៉ាងណាមិញ មហាសេដ្ឋីរូបនេះធ្លាប់បានទទួលរងការវាយប្រហារធ្ងន់ធ្ងរពីជំងឺដាច់សរសៃឈាមខួរក្បាលកាលពី១០ឆ្នាំមុន។

គួរជម្រាបផងដែរថា នៅក្នុងបញ្ជីអ្នកមានបំផុតទាំង៥០ របស់ Forbes Malaysia សម្រាប់ឆ្នាំ២០២៣ លោក Tan Sri Dr Chen Lip Keong គឺជាអ្នកមានបំផុតទី៧ នៅក្នុងប្រទេសដែលមានទ្រព្យសម្បត្តិប្រមាណ ២.៨ពាន់លានដុល្លារ គិតត្រឹមថ្ងៃទី៣១ ខែឧសភា ឆ្នាំនេះ៕

អត្ថបទដោយ៖ កាន់ ដារ៉ា (ស្មេរពនេចរ)