ចំណូល ៥០០ដុល្លារក្នុងមួយខែ ផ្គត់ផ្គង់ការចំណាយរួចហើយ នៅសល់លុយខ្លះមិនដឹងធ្វើអ្វី ទើបអាចបង្កើនចំណូលបន្ថែម។ ខាងក្រោមនេះគឺជាគំនិតធំៗ៣ អាចទាញចំណូលចូលតិកតក់ៗ ជួយឲ្យជីវភាពកាន់តែប្រសើរ៖
១. ដាក់ប្រាក់សន្សំនៅធនាគារ
បញ្ញើរប្រាក់នៅធនាគារជាជម្រើសល្អបំផុតមួយ ព្រោះថាយើងទទួលបានទាំងការប្រាក់ និងមានទំនុកចិត្ត។ ក្នុងករណីនេះគេហៅថាយកលុយបង្តើតលុយ។ ជាឧទាហរណ៌ បើយើងផ្ញើរប្រាក់ ៥០០ដុល្លារក្នុងធនាការ ហើយការប្រាក់ត្រូវបានកំណត់ ១% នោះយើងនឹងទទួលបាន ៥ដុល្លារពីលើថ្លៃដើម។
២. ការទិញភាគហ៊ុន
ចំណូលត្រឹម ៥០០ដុល្លារបើគិតទៅក្រៅពីដាក់នៅធនាគារយើងក៏មានជម្រើសម៉្យាងទៀតគឺ ទិញផ្សារហ៊ុនខ្មែរ។ ឧទាហរណ៍ អ្នកទិញហ៊ុនរដ្ឋករទឹកក្រុងភ្នំពេញតម្លៃ ៥ពាន់រៀល ក្នុងមួយហ៊ុន ពេលហ៊ុននេះឡើងដល់៧ពាន់រៀល អ្នកនឹងចំណេញ២ពាន់រៀល អាចលក់យកប្រាក់ចំណេញបាន។
៣. ចាប់ផ្តើមអាជីវកម្មដើមទុនតិច
ដើមទុនតិច គួរចាប់របរតូច ហានិភ័យទាប ហើយមានឱកាសរីកលូតលាស់លឿន។ ជាឧទាហរណ៍ ការធ្វើអាជីវកម្មតាមប្រព័ន្ធអ៊ីនធឺណិត ( Online ) របរនេះវាបានជួយកាត់បន្ថយការចំណាយលើថ្លៃជួលទីតាំង, ចំណាយប្រចាំខែផ្សេងៗ។ ម៉្យាងវិញទៀត បច្ចុប្បន្នមនុស្សពេញនិយមជួញដូរទំនិញតាមប្រព័ន្ធអេឡិចត្រូនិចជាហេតុនាំអោយឱកាសក្នុងការជោគជ័យក៏មានច្រើន ប្រសិនបើយើងលក់ផលិតផលដែលមានស្តង់ដានិងជាតម្រូវការរបស់អតិធិជន។
សូមបញ្ជាក់ថា ក្រៅពីគំនិតទាំង៣ខាងលើនេះ ក៏នៅមានគន្លឹះជាច្រើនផ្សេងទៀតដែលលោកអ្នកអាចប្រើលុយ ៥០០ដុល្លារ ដើម្បីបង្កើតចំណូលបន្ថែម។ ទោះវាជាការចាប់ផ្តើមក្នុងចំនួនលុយតិចតួច តែវាគឺជាគ្រាប់ពូជកសាងភាពជោគជ័យ៕
អត្ថបទ៖ លីណា