ជាដំណឹងរីករាយមួយ ខណៈអាកាសយានដ្ឋានអន្ដរជាតិតារាសាគរ អាចនឹងដាក់ឲ្យដំណើរការហោះហើរនៅក្នុងពេលឆាប់ៗខាងមុខ ក្រោយពន្យារពេលជាច្រើនខែរួមមក។ នេះបើតាមការបញ្ជាក់ពីលោក ម៉ៅ កែវពេជ្រច័ន្ទមុន្នី ដែលជានាយកអាកាសយានដ្ឋានអន្តរជាតិតារាសាគរ កាលពីពេលថ្មីៗនេះ។
តាមការបញ្ជាក់នៅលើទំព័រហ្វេសប៊ុក លោកម៉ៅ កែវពេជ្រច័ន្ទមុន្នី បានឲ្យដឹងថា កាលពីថ្ងៃទី៣០ ខែមិថុនា ឆ្នាំ២០២៤ បានរៀបចំកិច្ចប្រជុំកម្រិតបច្ចេកទេសដើម្បីវាយតម្លៃវឌ្ឍនភាពអាកាសយានដ្ឋានអន្តរជាតិតារាសាគរ ដើម្បីស្នើសុំអោយដាក់ដំណើរការ ការហោះហើរជាលក្ខណៈក្នុងស្រុកបណ្តោះអាសន្នជំហានដំបូង រួមជាមួយការបន្តធ្វើនូវនីតិវិធីបន្តបន្ទាប់ដើម្បីស្នើបើកការហោះហើរជាលក្ខណះអន្តរជាតិនាពេលខាងមុខបន្តទៀត។
ក្រៅពីការបញ្ជាក់អំពីលទ្ធផលនៃការបើកដំណើរការ នាយកអាកាសយានដ្ឋានអន្តរជាតិតារាសាគររូបនេះ ក៏បានបង្ហាញពីបច្ចុប្បន្នភាពនៃការសម្រេចបាននៃការសាងសង់គម្រោងអាកាសយានដ្ឋានខាងលើផងដែរ តាមរយៈរូបភាព និងវីដេអូ (ភ្ជាប់នៅខាងក្រោម)។
សូមជម្រាបថា អាកាសយានដ្ឋានអន្តរជាតិតារាសាគរ ស្ថិតក្នុងស្រុកបុទមសាគរ ខេត្តកោះកុង ជាវិនិយោគដោយក្រុមហ៊ុនចិន Union Development Group ក្នុងទំហំទឹកប្រាក់២០០លានដុល្លារ (ដំណាក់កាលទី១) ជាការវិនិយោគសម្រាប់គាំទ្រ ដល់ពហុបំណង វិស័យទេសចរណ៍។ អាកាសយានដ្ឋាននេះ មានសមត្ថភាពផ្តល់ការចុះចតប្រភេទយន្តហោះលំដាប់4E បាន ដូចជាយន្តហោះប្រភេទ Boeing-777 និង Airbus A-340/A-350៕
