ឯកឧត្តម គួច ចំរើន ឋានន្តរស័ក្តិឧត្តមមន្ត្រី ថ្នាក់លេខ១ ពីអភិបាលនៃគណៈអភិបាលខេត្តព្រះសីហនុ បានផ្ទេរ និងតែងតាំងមុខតំណែងមកជាអភិបាលនៃគណៈអភិបាលខេត្តកណ្តាល យោងតាមព្រះរាជក្រឹត្យត្រាស់បង្គាប់របស់ព្រះមហាក្សត្រនៃព្រះរាជាណាចក្រកម្ពុជា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី កាលពីពេលថ្មីៗនេះ។
ក្នុងឱកាសនៃការកាន់តំណែងថ្មី ឯកឧត្តម គួច ចំរើន បានបង្ហាញចំណាប់អារម្មណ៍ តាមរយៈការបង្ហោះសារលើទំព័រ Facebook Page ផ្ទាល់ខ្លួនយ៉ាងដូច្នេះថា៖ «អ្នកកណ្តាល សុំផ្ញើរខ្លួន និងការងារជោគជ័យផង»។
លោកបានបន្តទៀតថា៖ «ក្នុងរយៈពេល១០ឆ្នាំ ខ្ញុំបានប្តូរការងារ៦កន្លែង ខណ្ឌមានជ័យ-ខណ្ឌដូនពេញ-អគ្គរដ្ឋបាល-ខេត្តកំពង់ចាម-ខេត្តព្រះសីហនុ-ខេត្តកណ្តាល។ ការងារច្រើនកន្លែង ថ្មីរហូតហត់បន្តិចមែនតែបទពិសោធន៍ច្រើន មិត្តភ័ក្រ្តក៏ច្រើន ទំនាក់ទំនងក៏ច្រើន ស្គាល់សង្គមនិងមនុស្សក៏ច្រើន។ រីករាយចំពោះការងារទាំងអស់ដែលបានបន្សល់ស្នាមញញឹម និងក្តីនឹករលឹក»។
គួរជម្រាបផងដែរថា ឯកឧត្តម គួច ចំរើន កើតនៅថ្ងៃទី០៤ ខែវិច្ឆិកា ឆ្នាំ១៩៧២ នៅភូមិតាព័រលើ ឃុំពង្រក្រោម ស្រុកជីក្រែង ខេត្តសៀមរាប និងជាកូនទី៤ ក្នុងចំណោមបងប្អូន ៥នាក់។ ក្នុងឆ្នាំ១៩៩០ លោកបានចូលរៀននៅមហាវិទ្យាលយ័បច្ចេកទេសកងទ័ពប្រទេសវៀតណាម ក្រោយមកនៅឆ្នាំ១៩៩៣ បានសិក្សាបន្តនៅមហាវិទ្យាល័យនិតិសាស្ត្រ និងវិទ្យាសាស្ត្រសេដ្ឋកិច្ច រហូតបញ្ចប់ការសិក្សាក្នុងឆ្នាំ១៩៩៧។ ក្នុងឆ្នាំ២០០៤ លោកបានចូលសិក្សានៅសាកលវិទ្យាល័យនិតិសាស្ត្រ និងវិទ្យាសាស្ត្រសេដ្ឋកិច្ច ទទួលបានបរិញ្ញាបត្រជាន់ខ្ពស់រដ្ឋបាលសាធារណៈនៅឆ្នាំ២០០៧។
លើសពីនេះ ឯកឧត្តម គួច ចំរើន អាចប្រើប្រាស់បានទាំងភាសាអង់គ្លេស និងវៀតណាម។ ក្រៅពីការសិក្សានៅតាមមហាវិទ្យាល័យ និង សាកលវិទ្យាល័យ លោកក៏បានទទួលការបណ្តុះបណ្តាល និងវគ្គសិក្សាខ្លីៗ កម្រិតវិញ្ញាបនបត្រ ពីអង្គការ JICA លើការគ្រប់គ្រងរដ្ឋបាលមូលដ្ឋាននៅប្រទេសជប៉ុនឆ្នាំ២០០០, ពីក្រសួងរៀបចំដែនដីនគរូបនីយកម្មនិងសំណង់លើផ្នែកច្បាប់ភូមិបាល, ពីវិទ្យាស្ថានខ្មែរសម្រាប់សហប្រតិបត្តិការនិងសន្តិភាព លើផ្នែកហ្វឹកហ្វឺនទំនាក់ទំនងអន្តរជាតិ, ពីវិទ្យាស្ថានកម្ពុជាដើម្បីសិទ្ធិមនុស្ស លើការងាររដ្ឋបាលសម្រាប់មន្ត្រីខេត្ត-ក្រុង, ពី UNIVERSITY OF SANFRANCISCO លើច្បាប់បោះឆ្នោត, ពីវិទ្យាស្ថានកម្ពុជាដើម្បីសិទ្ធិមនុស្សលើផ្នែកអភិបាលកិច្ចល្អ និងទទួលបានវិញ្ញាបនបត្រ័ពីសាលាក្រុងភ្នំពេញលើការងាររដ្ឋបាលផងដែរ៕
អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម https://t.me/BusinessCambodiaBook