ប្រិយមិត្តជាច្រើនច្បាស់ជាបានជ្រាបច្បាស់រួចមកហើយអំពីតារាចម្រៀងកូរ៉េខាងត្បូងល្បីឈ្មោះ អ្នកនាង CL​ ដែលមានឈ្មោះពេញថា Lee Chae rin  ធ្លាប់ជាសេ្តចស្រីនៅក្រុមតារាចម្រៀង​ 2NE1 ដ៏មានប្រជាប្រិយ មុនពេលដែលនាងរំសាយក្រុមដើម្បីក្លាយជាតារាចម្រៀងនិង Rapper ឯករាជ្យម្នាក់។

ដូចមនុស្សទូទៅដែរ ទោះជានាងទទួលបានភាពជោគជ័យមានភាពល្បីល្បាញលើវិថីសិល្បៈយ៉ាងណាក្តីក៏ដោយនាង ធ្លាប់ត្រូវគេបង្អាប់ មើលងាយអំពីរូបរាងរបស់នាងក្រោយនាងឡើងគីឡូយ៉ាងខ្លាំងក្នុងឆ្នាំ២០១៨ និងត្រូវបានគេបោះពាក្យសម្តីថានាងគួរតែប្តូរឈ្មោះពី CL ទៅជា XL (ដែលសំដៅដល់ទំហំដែលធំបំផុត) វិញទៅ។ ក្រោយអំពីរងការិះគន់ជាហូរហែតារាស្រីវ័យ៣១ឆ្នាំរូបនេះ ក៏ធ្លាប់ជួបប្រទះនឹងជំងឺបាក់ទឹកចិត្តផងដែរ ប៉ុន្តែផ្ទុយមកវិញនាងបែរជាអាចងើបឡើងមកវិញបាន។

ចំពោះមូលហេតុដែលនាំឱ្យនាងអាចងើបពីជំងឺបាក់ទឹកចិត្តព្រោះអារម្មណ៍គេមាក់ងាយនេះ នាងបានលើកឡើងក្នុងការសម្តែង MTV Asia Hyperplay​​ នាឆ្នាំ២០១៨​ របស់នាងយ៉ាងដូច្នេះថា​ “នៅពេលដែលមាននរណាម្នាក់ ប្រាប់ឱ្យអ្នកធ្វើបែបនេះបែបនោះដើម្បីផ្គាប់ចិត្តគេគឺ គ្រាន់តែញាក់ភ្នែកដាក់គេទាំងភាពជឿជាក់ហើយដើរចេញ គឺវាគ្រប់គ្រាន់ហើយ”។

គួរជម្រាបផងដែរថា បន្ទាប់ពីប្រឡូកក្នុងវិស័យ K-POP  អស់រយៈពេលជាង១០ឆ្នាំចាប់តាំងពីនាងមានវ័យ២៤ឆ្នាំ CL សន្សំទ្រព្យបានប្រមាណជាង ៨លានដុល្លារ ដែលបានមកពីចំណូលសំខាន់ៗរបស់នាងរួមមាន ការចេញបទចម្រៀង ការប្រគុំតន្ត្រី កិច្ចព្រមព្រៀងទស្សនាវដ្តី ការបង្ហាញម៉ូដនិងសរសេរចម្រៀងជាច្រើនផងដែរ៕

អត្ថបទដោយ៖ ពីង ជូអេង