លោក Sundar Pichai បុរសឥណ្ឌាកាត់អាមេរិកគឺជានាយប្រតិបត្តិក្រុមហ៊ុនGoogle ដែលមានក្រុមហ៊ុនមេឈ្មោះថា Alphabet។ ធ្វើការមុខតំណែងជានាយកប្រតិបត្តិនៅក្នុងក្រុមហ៊ុនបច្ចេកវិទ្យាលំដាប់កំពូលមួយនេះ លោក Sundar Pichai ទទួលបានប្រាក់ខែគោលប្រចាំឆ្នាំត្រឹមតែ២លានដុល្លារប៉ុណ្ណោះប៉ុន្ដែកាលពីឆ្នាំ២០២២កន្លងទៅលោកទទួលបានប្រាក់សរុបដល់ទៅ២២៦លានដុល្លារចេញពីក្រុមហ៊ុន Google។

បើយោងតាមការចុះផ្សាយរបស់CNBC បានឲ្យដឹងថាកាលពីឆ្នាំ២០២២កន្លងទៅនេះលោក Sundar Pichai ទទួលបានចំណូលសរុបដល់ទៅ២២៦លានដុល្លារ។ ចំណូលសរុបទាំង២២៦លានដុល្លារនេះមិនមែនជាប្រាក់ខែរបស់គាត់ឡើយ តែផ្ទុយទៅវិញចំណូលគាត់ភាគច្រើនដែលGoogle ផ្ដល់ឲ្យគឺជាប្រាក់លើកទឹកចិត្តនូវការខិតខំប្រឹងប្រែងធ្វើនៅក្នុងក្រុមហ៊ុន Google។

នៅក្នុងនោះដែរ លោកទទួលបានប្រាក់លើកទឹកចិត្តរង្វាន់ជាភាគហ៊ុនរបស់Google ដែលមានតម្លៃរហូតដល់ទៅ២១៨លានដុល្លារ។ ក្រៅពីប្រាក់រង្វាន់លើកទឹកចិត្តជាភាគហ៊ុន លោកក៏ទទួលបានប្រាក់ខែប្រចាំឆ្នាំចំនួន២លានដុល្លារជាមួយនឹងទឹកប្រាក់ការពារសន្តិសុខសុវត្ថិភាពចំនួន៦លានដុល្លារទៀត។

 លោក Sundar Pichai គឹជាថ្នាក់ដឹកនាំដែលទទួលបានប្រាក់លើកទឹកចិត្តច្រើនជាងគេបំផុតនៅ Google ខណៈអ្នកដឹកនាំកំពូលៗផ្សេងទៀតទទួលបានប្រាក់លើកទឹកចិត្តជាភាគហ៊ុនចន្លោះពី២២លានទៅ៣៥លានដុល្លារប៉ុណ្ណោះប្រចាំឆ្នាំ។

 គួរបញ្ជាក់ផងដែរថាចំណូលសរុបប្រចាំឆ្នាំ២០២២របស់ លោក Sundar Pichai ត្រូវបានបង្ហាញបន្ទាប់ពីក្រុមហ៊ុន Google និងAlphabet ធ្វើកំណែទម្រងនៃការចំណាយខណៈសេដ្ឋកិច្ចពិភពលោកស្ថិតក្នុងភាពមិនច្បាស់លាស់។ កាលពីខែមករាឆ្នាំ២០២៣នេះ ក្រុមហ៊ុនក៏បានសម្រេចកាត់បុគ្គលិកចំនួន១២,០០០នាក់ស្មើនឹង៦%បុគ្គលិកសរុប៕