លែងបារម្ភពីរឿងបើកបរផ្លូវឆ្ងាយ គ្មានអ្វីសាកថ្មទៀតហើយ ពេលនេះរថយន្តប្រណីតអាល្លឺម៉ង់ Porsche គ្រោងនឹងបញ្ចេញរថយន្តអគ្គិសនីស៊េរីថ្មីរបស់ខ្លួន ដោយចំណាយពេលសាកថ្មមិនដល់ ១៥នាទីផង អាចជិះបានជាង១ពាន់គីឡូម៉ែត្រ។ នេះបើតាមសេចក្តីប្រកាសព័ត៌មាន CARSCOOPS កាលពីពេលកន្លងទៅនេះ។
បើតាមរវិស្វករបច្ចេកវិទ្យាដែលមានជំនាញខាងថ្មរបស់ Porsche អ្នកស្រី Stefanie Edelberg បានអះអាងថា ក្នុងពេលដ៏ខ្លីខាងមុខនេះ រថយន្តអគ្គិសនីរ Porsche នឹងអាចបំពាក់ដោយថ្មដែលមានសមត្ថភាពខ្ពស់ដែលអាចធ្វើដំណើរបានចម្ងាយ ១,៣០០ គីឡូម៉ែត្រ ជាពិសេស វាចំណាយពេលតិចជាង ១៥ នាទីដើម្បីសាកពេញ។
ស្របគ្នានេះដែរ ក្រុមហ៊ុនបានឱ្យដឹងថា មូលហេតុដែលធ្វើឱ្យរថយន្តអគ្គិសនី Porsche អាចសាកថ្មបានក្នុងល្បឿនលឿនបែបនេះ ខ្លួននឹងបង្កើន anode នៃ EV ដែលមានន័យថាបង្កើនអេឡិចត្រូតអវិជ្ជមាននៅក្នុងថ្ម ដើម្បីជួយបង្កើនល្បឿននៃការសាកថ្មឱ្យឆាប់ពេញ។ លើសពីនេះក្រុមហ៊ុនបានឱ្យដឹងទៀតថា silicon anodes (បង្កើនសមត្ថភាពអាគុយ) នឹងផ្តល់នូវទំហំផ្ទុកលើសពីមុន ១០ ដង និងមានសមត្ថភាពអាចសាកលឿនប្រហែល ៥ នាទីប៉ុណ្ណោះ អាចសាកបាន ៨០ភាគរយ ពោលគឺក្នុងរយៈពេលតិចជាង ១៥ នាទីជាមួយនឹង anodes ទាំងនេះ។
ប្រភពដដែលក៏បានឱ្យដឹងទៀតថា ដើម្បីសាកថ្មបានលឿន លុះត្រាតែស្ថានីយសាកថ្មត្រូវតែជាស្ថានីយដែលមានថាមពលខ្លាំងដូចគ្នា៕
