ភ្ញៀវទេសចរបរទេសជាង ៣ លាននាក់បានធ្វើដំណើរមកដល់ប្រទេសកម្ពុជា ក្នុងរយៈពេល ៨ខែ នៃឆ្នាំ២០២៣ កើនឡើងជាង ២៥០.៨% បើធៀបរយៈពេលដូចគ្នាក្នុងឆ្នាំ២០២២ ។ នេះបើយោងតាមរបាយការណ៍ក្រសួងទេសចរណ៍។
តាមទិន្នន័យបានបង្ហាញថា ពីខែមករា ដល់ខែសីហា ឆ្នាំ២០២៣ កម្ពុជាទទួលបានភ្ញៀវទេសចរអន្តរជាតិជាង ៣.៥លាននាក់ កើនឡើង ២៥០.៨% រីឯភ្ញៀវទេសចរជាតិមានប្រមាណ ១២.៣៨លាននាក់ កើនឡើង ៦២.៥% ធៀបនឹងរយៈពេលដូចគ្នា នៅឆ្នាំ២០២២។ ក្នុងនោះជាងពាក់កណ្តាលនៃភ្ញៀវអន្តរជាតិគឺធ្វើដំណើរមកពីប្រទេសថៃ និងវៀតណាម។
លើសពីនេះ នៅក្នុងពិធីបើកសិក្ខាសាលាស្តីពី «បដិសណ្ឋារកិច្ចល្អ ទេសចរណ៍មានសុវត្ថិភាព» ដែលរៀបចំនៅក្រុងបាវិត ខេត្តស្វាយរៀង កាលពីថ្ងៃទី១៤ ខែសីហា លោក ហោ សារុន រដ្ឋលេខាធិការក្រសួងទេសចរណ៍ បានឱ្យដឹងថា កម្ពុជាមានសុទិដ្ឋិនិយមនឹងទទួលបានភ្ញៀវទេសចរអន្តរជាតិក្នុងកម្រិតដូចសម័យមុនវិបត្តិជំងឺកូវីដ១៩ ពោលគឺប្រមាណ ៧លាននាក់ នៅចុងឆ្នាំ២០២៥ ឬដើមឆ្នាំ២០២៦។
យោងតាមគ្រឹះស្ថានអង្គរ ដែលជាស្ថាប័នទទួលបន្ទក់លក់សំបុត្រឱ្យភ្ញៀវបរទេស ចូលទស្សនារមណីយដ្ឋានអង្គរ គឺក្នុងរយៈពេល ៧ខែ ដើមឆ្នាំ២០២៣ មានភ្ញៀវបរទេសចំនួន ៤៣៩ ៣៦៥ នាក់ បានទិញសំបុត្រចូលទស្សនារមណីយដ្ឋានអង្គរ ដោយប្រាក់បានពីការលក់សំបុត្រមានចំនួន ២០ ៣១៧ ៣៤៥ ដុល្លារ កើនឡើង ៤២៣.៩៦% បើធៀបរយៈពេលដូចគ្នាក្នុងឆ្នាំ២០២២។
គួរជម្រាបផងដែរថា នៅឆ្នាំ២០២៣នេះ កម្ពុជារំពឹងទទួលបានទេសចរអន្តរជាតិប្រមាណ ៥លាននាក់, ទេសចរជាតិប្រមាណ ១៧លាននាក់ និងឆ្នាំ២០២៨ ទេសចរអន្តរជាតិ រំពឹងថា អាចកើនដល់៨លាននាក់៕
អត្ថបទដោយ៖ កាន់ ដារ៉ា (ស្មេរពនេចរ)
