កាលពីខែឧសភាឆ្នាំ២០២៣កន្លងទៅនេះធនាគារពិភពបានចេញរបាយការណ៍លើកទីមួយដោយព្យាករថាប្រទេសកម្ពុជាយើងនឹងមានកំណើនសេដ្ឋកិច្ចចំនួន៥.៥ភាគរយនៅក្នុងឆ្នា២០២៣នេះប៉ុន្ដក្នុងរបាយការណ៍លើកទី២ដែលទើបតែចេញផ្សាយនៅថ្ងៃនេះធនាការពិភពលោកបានព្យាករថាសេដ្ឋកិច្ចកម្ពុជាត្រូវបានព្យាកររំពឹងទុកថានឹងមានកំណើន៥.៤%នៅឆ្នាំ២០២៣នេះ។
នៅក្នុងរបាយការណ៍ដដែលនោះធនាគារពិភពលោកបានឲ្យដឹងទៀតថាកំណើនសេដ្ឋកិច្ចកម្ពុជានៅឆ្នាំ២០២៤ខាងមុខត្រូវបានរំពឹងទុកថានឹងមានកំណើន៥.៨% ហើយឆ្នាំ២០២៥ត្រូវព្យាកររំពឹងទុកថានឹងមានកំណើនប្រមាណ៦.១%ផងដែរ។
ធនាគារពិភពលោកបានព្យករពីកំណើនសេដ្ឋកិច្ចកម្ពុជាដោយផ្អែកលើការកើនឡើងនូវការវិនិយោគហេដ្ឋារចនាសម្ព័ន្ធ និងអំពីអត្ថប្រយោជន៍ដែលនឹងកើតចេញពីកិច្ចព្រមព្រៀងពាណិជ្ចកម្មនានាដែលកម្ពុជាមានជាមួយបណ្តាប្រទេសនៅក្នុងតំបន់។
បើយោងតាមសម្ដីរបស់លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជា មានប្រសាសន៍ថា “ដើម្បីរក្សាបាននូវកំណើនសេដ្ឋកិច្ច កម្ពុជាចាំបាច់ត្រូវជួយដល់វិស័យឯកជនឱ្យបំពេញមុខងារជាក្បាលម៉ាស៊ីនកំណើនមួយ ហើយកិច្ចការនេះអាចសម្រេចបាន ដោយធ្វើសកម្មភាពភ្លាមៗក្នុងការកែលម្អការបំពេញកិច្ចរបស់វិស័យសាធារណៈ”។ លោកស្រីបានបន្ថែមទៀតថា“ការរក្សាស្ថេរភាពហិរញ្ញវត្ថុក៏ជាអាទិភាពមួយដែរ ហើយ ចាំបាច់ត្រូវតែខិតខំថែមទៀតក្នុងស្តារលំហសារពើពន្ធឡើងវិញ”។
របាយការណ៍របស់ធនាគារពិភពលោកដែលព្យាករពីស្ថានភាពសេដ្ឋកិច្ចកម្ពុជាគឺចេញមួយឆ្នាំ២ដង ហើយក្នុងការបាយការណ៍ចុងក្រោយនៃឆ្នាំ២០២៣នេះធនាគារពិភពលោកក៏បានរំលេចផងដែរថា វិស័យទេសចរណ៍មានសារៈសំខាន់ណាស់សម្រាប់សេដ្ឋកិច្ចកម្ពុជា ប៉ុន្ដែបើទោះបីជាមានភ្ញៀវទេសចរអន្តរជាតិចូលប្រទេសវិញជាហូរហែក៏ដោយក៏ប្រាក់ចំណូលពីវិស័យទេសចរណ៍នៅមានកម្រិតទាបនៅឡើយ។
នៅក្នុងរបាយការណ៍ចុងក្រោយ ធនាគារពិភពលោកក៏បានបញ្ជាក់ផងដែរថានាពេលខាងមុខកំណើនសេដ្ឋកិច្ចអាចនៅតែរងផលប៉ះពាល់បន្ថែមទៀតដោយសារតែការចុះខ្សោយនៃតម្រូវការពិភពលោក ឬពីការឡើងថ្លៃប្រេងឥន្ធនៈ និងថ្លៃស្បៀងអាហារឡើងវិញ។ ចំណែកក្នុងស្រុកវិញការកើនឡើងនៃបំណុលគ្រួសារ និងឥណទានក្នុងស្រុកនៅក្នុងវិស័យអចលនទ្រព្យ នៅតែជាហានិភ័យដដែល៕
