មួយរយៈពេលចុងក្រោយនេះ កម្ពុជាបានក្លាយជាគោលដៅដ៏សំខាន់នៅក្នុងការដាក់ទុនវិនិយោគសាងសង់រោងចក្រដំឡើងរថយន្ដធំៗ ជាក់ស្ដែងរោងចក្រដំឡើងរថយន្ដ Toyota រោងចក្រដំឡើងរថយន្ដ Ford រោងចក្រដំឡើងរថយន្ដ Isuzu សុទ្ធតែទើបនឹងបានបើកដំណើរការសង្វាក់ផលិតកម្មរបស់ពួកគេនៅក្នុងប្រទេសកម្ពុជា។

យ៉ាងណានៅមិនទាន់អស់នោះទេ ដោយពេលថ្មីៗនេះ មានក្រុមហ៊ុនផលិតរថយន្ដចំនួន ២ ទៀតក៏បានប្រកាសពីគម្រោងនៅក្នុងការដាក់ទុនវិនិយោគសាងសង់រោងចក្រដំឡើងរថយន្ដរបស់ខ្លួននៅក្នុងប្រទេសកម្ពុជាផងដែរ ដែលក្នុងនោះរួមមាន៖

១. ក្រុមហ៊ុន BYD

កាលពីពេលកន្លងទៅនេះ ក្រុមហ៊ុន BYD ដែលជាក្រុមហ៊ុនផលិតរថយន្ដអគ្គិសនីដ៏ធំរបស់ប្រទេសចិន បានបង្ហើបពីគម្រោងនៃការការដាក់ទុនវិនិយោគបង្កើតរោងចក្រដំឡើងរបស់រថយន្ដអគ្គិសនីនៅកម្ពុជា ដើម្បីផ្គត់ផ្គង់ទីផ្សារក្នុងស្រុក និងនាំចេញ។  

តាមការបញ្ជាក់ពីលោក Liu Xueliang អគ្គនាយកក្រុមហ៊ុន BYD Asia Pacific Auto Sales Division ក្នុងជំនួបសម្ដែងការគួរសម និងពិភាក្សាការងារជាមួយសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជានៅថ្ងៃទី ១៥ ខែកក្កដា ឆ្នាំ២០២៤ បានឲ្យដឹងថា ក្រុមហ៊ុន BYD Asia Pacific Auto Sales Division មានគម្រោងសាងសង់រោងចក្រដំឡើងយានយន្តអគ្គិសនីនៅកម្ពុជា ដែលអាចមានសមត្ថភាពដំឡើងរថយន្តចំនួន ២០ ០០០គ្រឿងក្នុងមួយឆ្នាំ សម្រាប់ផ្គត់ផ្គង់ទីផ្សារក្នុងស្រុក និងនាំចេញទីផ្សារអន្តរជាតិ ។

២. ក្រុមហ៊ុន AION

កាលពីថ្ងៃទី១៧ ខែកក្កដា ឆ្នាំ២០២៤ កន្លងទៅនេះ ក្រុមហ៊ុនផលិតរថយន្ដអគ្គិសនីដ៏ធំ AION បើកបានសម្ពោធរោងចក្ររបស់ខ្លួននៅប្រទេសថៃ។ យ៉ាងណាក្រៅពីសម្ពោធរោងចក្រថ្មីនេះរួច ក្រុមហ៊ុន AION ក៏មានគម្រោងសិក្សាពង្រីកបើករោងចក្រនៅប្រទេសកម្ពុជា នាពេលឆាប់ៗ និងប្រទេសក្នុងតំបន់អាស៊ីអាគ្នេយ៍ដទៃទៀតផងដែរ៕