ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ គឺជាពន្ធប្រចាំឆ្នាំហើយពន្ធនេះប្រមូលចំពោះមធ្យោបាយដឹកជញ្ជូននិងយានជំនិះគ្រប់ប្រភេទដូចជា រថយន្តទេសចរណ៍ រថយន្តដឹកទំនិញ រថយន្តដឹកអ្នកដំណើរ រ៉ឺម៉កសណ្ដោង ជលយាន ឬជលយានយន្ត (លើសពី១៥០ សេះ) ទាំងផ្លូវទន្លេ និងសមុទ្រពន្ធនេះ គឺជាពន្ធផ្ទាល់ សម្រាប់ជាគុណប្រយោជន៍ដល់ថវិកាថ្នាក់ក្រោមជាតិ។
អត្រាពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទ ត្រូវកំណត់ទៅតាមប្រភេទមធ្យោបាយដឹកជញ្ជូននិងយានជំនិះគ្រប់ប្រភេទ ដូចខាងក្រោម៖
ក- រថយន្តទេសចរណ៍ (គិតតាមឆ្នាំផលិត និងទំហំស៊ីឡាំង)
ខ- រថយន្តដឹកទំនិញ (គិតតាមទម្ងន់សរុប)
គ- រ៉ឺម៉កសណ្តោង (គិតតាមទម្ងន់សរុប)
ឃ- ក្បាលរថយន្តសណ្តោង និងស៊ឺមីរ៉ឺម៉កសណ្តោង (ត្រូវបង់ពន្ធរួមគ្នាគិតតាមទម្ងន់សរុប)
ង- រថយន្តដឹកអ្នកដំណើរ (គិតតាមឆ្នាំផលិត និងចំនួនកៅអី)
ច- ជលយាន ឬជលយានយន្ត (គិតតាមទម្ងន់ផ្ទុកសរុប ឬគិតតាមប្រវែងបណ្តោយ ឬគិតតាមកម្លាំងសេះ)
ឆ- យានឬយានយន្តកែច្នៃ (គិតតាមចំនួនភ្លៅ និងកង់)។
ឧទាហរណ៍៖ រថយន្តទេសចរណ៍ និងរថយន្តដឹកអ្នកដំណើរ រថយន្តដឹកទំនិញ /ជលយាន
ក- រថយន្តទេសចរណ៍ ម៉ាក LEXUS RX 330 មានទំហំស៊ីឡាំង ៣៣០០ CC ឆ្នាំផលិត ២០០៤ ប្រាក់ពន្ធត្រូវបង់ចំនួន ៦០០,០០០ រៀល
ខ- រថយន្តដឹកអ្នកដំណើរ ម៉ាក HYUNDAI STAREX មានចំនួនកៅអី ១២ កៅអី ឆ្នាំផលិត ២០១០ ប្រាក់ពន្ធត្រូវបង់ចំនួន ១៥០,០០០ រៀល
គ- រថយន្តដឹកទំនិញ ម៉ាក HYUNDAI មានទម្ងន់ផ្ទុកសរុប ២៥ តោន ប្រាក់ពន្ធត្រូវបង់ចំនួន ២ ០០០ ០០០ រៀល
ឃ- ក្បាលរថយន្តសណ្តោង និងស៊ឺមីរ៉ឺម៉កសណ្តោង ប្រាក់ពន្ធត្រូវបង់ចំនួន ២ ០០០ ០០០ រៀល
ង- កប៉ាល់ផ្ទុកទំនិញ លើលពី ២,០០០ តោន ប្រាក់ពន្ធត្រូវបង់ចំនួន ១ ២០០ ០០០ រៀល។
គួរបញ្ជាក់ថា ដើម្បីងាយស្រួលក្នុងការគណនាប្រាក់ពន្ធ អ្នកជាប់ពន្ធអាចទាញយកនូវកម្មវិធីតាមទូរស័ព្ទ តាមរយៈតំណភ្ជាប់ខាងក្រោម៖ សម្រាប់ Playstore : Cambodia Road Tax,សម្រាប់ Appstore : Cambodia Road Tax ៕