បច្ចេកវិទ្យារីកចម្រើនខ្លាំងបាន ជួយសម្រួលដល់ការរស់នៅរបស់មនុស្សឱ្យកាន់តែងាយស្រួលឡើង។ ទន្ទឹមនឹងភាពងាយស្រួល បច្ចេកវិទ្យាក៏ផ្ដល់នូវគុណវិបត្តិមួយចំនួនផងដែរ ជាពិសេសនៅពេលដែល មនុស្សដែលដើរមិនទាន់ការផ្លាស់ប្ដូររបស់បច្ចេកវិទ្យានានានៅលើពិភពលោក។
យ៉ាងណាមិញខាងក្រោមនេះគឺជាបច្ចេកវិទ្យានឹងធ្វើឱ្យរឿង៥យ៉ាងនេះ ផ្លាស់ប្ដូរពិភពលោក និងការរស់នៅមនុស្សខ្លាំងបំផុត ចាប់ពី៣០ឆ្នាំតទៅមុខ។
១. ឡានបើកដោយខ្លួនឯង៖ រថយន្តដែលបើកបរដោយខ្លួនឯងមិនមែនជាអនាគតទេ ពួកគេបានកំពុងកើតឡើងចាប់ពីពេលនេះ ទៅបណ្ដើរៗទៅហើយ។ ពីមួយថ្ងៃទៅមួយថ្ងៃ បច្ចេកវិទ្យានេះនឹងកាន់តែឆ្លាតវៃ តម្លៃកាន់តែសមរម្យ និងមានអ្នកប្រើប្រាស់កាន់តែច្រើន។
មនុស្សលែងចង់បើកឡានទៀតហើយ ព្រោះឡានអាចបើកបរដោយខ្លួនឯងមិនដែលនឿយហត់ មិនចេះផឹកស្រាស្រវឹង មិនមានអារម្មណ៍ងងុយដេក ប្រព័ន្ធប្រតិកម្មលឿនជាងមុន ជួយកាត់បន្ថយការកកស្ទះចរាចរណ៍ និងគ្រោះថ្នាក់ជាអប្បបរមា។
២. បច្ចេកវិទ្យាបញ្ញាសិប្បនិម្មិត AI ឆ្លាតដូចមនុស្សពិត៖ បច្ចេកវិទ្យាបញ្ញាសិប្បនិម្មិត AI ឆ្លាតដូចមនុស្សពិត ជាពិសេសទៅលើដំណើរការកុំព្យូទ័រ អាចស្គាល់សំឡេង ការបង្កើតរូបភាព ការរៀនស៊ីជម្រៅ និងក្បួនដោះស្រាយបញ្ហាពិបាកៗផ្សេងទៀត។ បច្ចេកវិទ្យាបញ្ញាសិប្បនិម្មិត AI គឺនឹងចូលមកជំនួសការងារមនុស្សជាច្រើន ឱ្យកាន់តែមានភាពងាយស្រួល លឿន រហ័ស ច្បាស់លាស់ ចំណេញពេលវេលា និងមានផលិតភាពខ្ពស់បំផុត។
៣. ការបញ្ចូលខួរក្បាលសិប្បនិម្មិតនឹងស្តារការចងចាំដែលបាត់បង់៖ ទៅអនាគតវាអាចក្លាយជាជារឿងដែលអាចទៅរួច ដើម្បីចម្លងផ្នែកតូចៗនៃខួរក្បាលជាមួយនឹងការបញ្ចូលខួរក្បាលសិប្បនិម្មិត ដើម្បីជួសជុលការខូចខាតពីជំងឺភ្លេចភ្លាំង ជំងឺដាច់សរសៃឈាមខួរក្បាល ឬរបួសផ្សេងៗ។
ឧបករណ៍នេះនឹងដំណើរការដោយជំនួសផ្នែកដែលខូចនៃខួរក្បាលប្រកបដោយប្រសិទ្ធភាពហើយការផ្សាំខួរក្បាលសិប្បនិម្មិតនឹងកាន់តែមានប្រសិទ្ធភាព ក្នុងការចម្លងមុខងារស្មុគស្មាញនៅក្នុងខួរក្បាល ជាក់ស្តែងក្រុមហ៊ុនរបស់Elon Musk ក៏កំពុងស្រាវជ្រាវដាក់ដំណើរការបន្ទះឈីប បង្កើតអង្គចងចាំក្នុងខួរក្បាលមនុស្សផងដែរ។
៤. ទេសចរណ៍អវកាស៖ បើបេសសកម្មនៃការឡើងទៅភពអង្គាររបស់ក្រុមហ៊ុន SpaceX ជោគជ័យ គេនឹងរុករក បង្កើតសម្ភារៈ និងផ្នែកសំខាន់សម្រាប់មានជីវិតរស់នៅលើភពអង្គារ នោះវាអាចទៅរួចក្នុងការធ្វើដំណើរទៅកាន់ទីអវកាស។ ក្នុងនោះវា នឹងជួយបើកផ្លូវឱ្យមនុស្សអាចធ្វើ ដំណើរទេសចរណ៍និងកក់កៅអីយានអវកាស ទៅលេងទីអវកាសកាន់តែឆាប់ផងដែរ។
៥. ការធ្វើដំណើរនឹងលែងសូវស្ទះចរាចរណ៍៖បញ្ហាការកកស្ទះចរាចរណ៍ គឺជាបញ្ហាដ៏ធំមួយ ដែលប្រទេសជាច្រើនកំពុងជួបប្រទះ។ ទន្ទឹមនឹងបញ្ហានេះ វានឹងមានភាពថមថយចុះផងដែរ ក្រោយពេលដែលមនុស្សរកឃើញនូវរបកគំហើញធំៗដូចជា ឡានហោះ បង្កើតរថភ្លើងល្បឿនលឿនបំផុត បំពង់ធ្វើដំណើរក្រោមដីជាដើម។
ជារួមមក នេះគ្រាន់តែជាបច្ចេកវិទ្យាដ៏គួរឱ្យចាប់អារម្មណ៍ចំនួន ៥ តែប៉ុណ្ណោះដែលអ្នកគួរតែដឹង និងត្រៀមខ្លួនឱ្យបានល្អជាមួយនឹងរបត់នៃភាពរីកចម្រើនរបស់បច្ចេកវិទ្យា។ ទន្ទឹមនឹងនេះដែរ ក៏នៅមានបច្ចេកវិទ្យាជាច្រើនទៀត នឹងបន្តរីកចម្រើនឥតឈប់ឈរផងដែរ ដែលវាទាមទារឱ្យអ្នកបន្តធ្វើបច្ចុប្បន្នភាពលើជំនាញបច្ចេកវិទ្យាជាប្រចាំ និងត្រូវប្រាកដថាអ្នកដើរទាន់សម័យកាលបច្ចេកវិទ្យា ដើម្បីអាចទាញប្រយោជន៍មហាសាល៕