គិតត្រឹមរយៈពេល ត្រឹមពាក់កណ្តាលឆ្នាំ២០២៣ នេះមានយីហោល្បីចំនួន២ ដែលមកពីសហរដ្ឋអាមេរិក ក៏ដូចអេស្ប៉ាញបានសម្រេចមកចូលរកស៊ីនៅទីផ្សារស្រុកខ្មែរហើយ ដោយប្រេនទី១គឺ Zara ចំណែកប្រេនទី២ វិញគឺ New Balance ដែលយីហោ២នេះ កំពុងតែមានឈ្មោះល្បីរន្ទឺយ៉ាងខ្លាំងលើពិភពលោក។
ជាក់ស្តែង យីហោលំដាប់ថ្នាក់អន្តរជាតិ Zara របស់ប្រទេសអេស្ប៉ាញ បានសម្រេចមករកស៊ីនៅក្នុងប្រទេសកម្ពុជាជាលើកដំបូងហើយ ដែលយីហោនេះបានបើកដំណើរការដាក់ផលិតផលរបស់ខ្លួនជាផ្លូវការ នៅ ផ្សារទេំនើប ជីប ម៉ុង មេហ្គាម៉ល ២៧១ ជាន់ផ្ទាល់។
ចំពោះវត្តមាន ហាង ZARA ដំបូងគេក្នុងប្រទេសកម្ពុជានេះដែរ គឺមានទំហំសរុបរហូតដល់ទៅ ៣៣០០ ម៉ែត្រការេ ផ្នែកខាងក្នុងរចនាដោយ ស្ថាបត្យកម្ម ZARA (Zara Architectural Studio) ដែលត្រូវបានតុបតែងដេគ័រភាគច្រើនមានពណ៌ស ស្អាត ជាពិសេសស៊ីគ្នានឹងពណ៌ផ្សេងទៀត រួមជាមួយ ភាពទាក់ទាញនៃគ្រឿងសង្ហារិមធ្វើពីឈើ និងផ្ទៃពណ៌ធម្មជាតិ ដែលធ្វើឲ្យមានភាពស្រឡះប្លែកភ្នែក និងមានភាពទាក់ទាញ ធំទូលាយ ងាយស្រួលដល់អតិថិជន។
លើសពីនេះទៅទៀត សម្រាប់ចំណុចពិសេសមួយរបស់យីហោសម្លៀកបំពាក់ Zara ដែលមានឈ្មោះល្បីរន្ទឺរហូតមកដល់ពេលនេះ ដោយសារនៅពេលអតិថិជនចង់ផ្លាស់ប្តូរទំនិញ ពេលទិញនៅហាងផ្ទាល់ឬតាមអនឡាញអតិថិជនទាំងអស់អាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ ៣០ថ្ងៃ បន្ទាប់ពីបានទិញរួច។
ជាមួយគ្នានោះដែរ នាពេលថ្មីៗនេះក៏មានប្រេន១ទៀតដែរ ដោយបានសម្រេចមករកស៊ីនៅស្រុកខ្មែរនោះគឺប្រេន New Balance ដែលក្រុមហ៊ុនផលិតស្បែកជើងកីឡា និងសម្លៀកបំពាក់ដ៏ល្បីឈ្មោះមួយរបស់ពិភពលោក ហើយយីហោដ៏ល្បីឈ្មោះមួយនេះដែរ គឺមានមូលដ្ឋាននៅទីក្រុង Boston រដ្ឋ Massachusetts នៅសហរដ្ឋអាមេរិក ដែលត្រូវបានបង្កើតឡើងតាំងពីឆ្នាំ ១៩០៦ មកម្លេះ និងមានអាយុកាលជាង១០០ឆ្នាំមកហើយ។
សម្រាប់ប្រេន New Balance ក៏បានបើកដំណើរការដាក់លក់ផលិតផលរបស់ខ្លួនជាផ្លូវការនៅផ្សារទំនើប ជីប ម៉ុង មេហ្គាម៉ល ២៧១ ជាន់ផ្ទាល់ដី ក្នុងរាជធានីភ្នំពេញ ដូចគ្នា។
គូសបញ្ជាក់ថា ចំណុចពិសេសដែលធ្វើឱ្យយីហោ New Balance នេះកាន់តែមានឈ្មោះល្បីរន្ទឺខ្លាំងរហូតអាចឈរជើងលើទីផ្សារជាង ១០០ឆ្នាំនេះ ដោយសារតែប្រេនមួយនេះមានភាពច្នៃប្រឌិតខ្ពស់ព្រមទាំងទទួលបានទំនុកចិត្តខ្លាំងពីអតិថិជននៅក្នុងពិភពកីឡា ហើយជារៀងរាល់ឆ្នាំគឺតែងតែអភិវឌ្ឍន៍ឥតឈប់ឈរ៕
អត្ថបទ៖ ធី ស្រីល័ក្ខ
