សេដ្ឋី Bill Gates ជាមនុស្សម្នាក់ដែលតែងតែព្យាករពីអនាគត ហើយកាលពីពេលថ្មីៗនេះ លោកបានព្រមានថាការវិវត្តរបស់បច្ចេកវិទ្យាAI នាពេលបច្ចុប្បន្នអាចនឹងធ្វើឲ្យអាជីវកម្មមួយចំនួនដែលកំពុងរកស៊ីលើទីផ្សារអាចនឹងហួសសម័យខណៈបច្ចេកវិទ្យាAIនឹងអាចធ្វើនូវអ្វីដែលក្រុមហ៊ុនទាំងនោះកំពុងធ្វើ។

 នៅក្នុងកម្មវិធី The AI Forward 2023 ដែលរៀបចំឡើងដោយធនាគារ Goldman Sachs នៅក្នុងទីក្រុង San Francisco កាលពីពេលថ្មីៗនេះ លោក Bill Gates បានឲ្យដឹងថាក្រុមហ៊ុនមួយចំនួនដូចជា Google, Amazonនិង Spotify នឹងក្លាយជាអាជីវកម្មដែលហួសសម័យក្នុងពេលឆាប់ៗប្រសិនបបើ បច្ចេកវិទ្យាAIថ្មីអាចអភិវឌ្ឍនបានលឿនក្នុងកម្រិតដូចពេលបច្ចុប្បន្ននេះ។

 លោកបានលើកឡើងនូវហេតុផលមួយចំនួនដែលបច្ចេកវិទ្យាAI អាចដណ្ដើមការងាររបស់ក្រុមហ៊ុនមួយចំនួន ដូចជាបច្ចេកវិទ្យាAIចាប់ផ្ដើមស្វែងយល់ពីរបៀបនៃការគិតរបស់មនុស្ស ដឹងពីតម្រូវការ និងអារម្មណ៍ជាដើម ពោលគឺវាអាចផ្លាស់ប្ដូរអាកប្បកិរិយារបស់មនុស្ស។

 នៅក្នុងបរិបទដែលបច្ចេកវិទ្យាAI ចាប់ផ្ដើមវិវត្តន៍ លោក Bill Gates បាននិយាយឃ្លាមួយថា” អ្នកនឹងមិនទៅស្រាវជ្រាវរកព័ត៌មានលើវេបសាយដូចជា Google ហើយអ្នកនឹងមិនទៅធ្វើសកម្មភាពលើវេបសាយAmazon ទៀតឡើយ”។ ឃ្លាដែលគាត់លើកឡើងត្រង់នេះចង់មានន័យបច្ចេកវិទ្យាAI អាចនឹងជំនួសនូវសកម្មភាពដែលក្រុមទាំងនេះកំពុងធ្វើ។

លោកបានបង្ហើបផងដែរថាប្រសិនបើក្រុមហ៊ុនចង់ប្រណាំប្រជែងជាមួយ AI នោះក្រុមហ៊ុនត្រូវអភវិឌ្ឍន​នូវជំនួយការឌីជីថលផ្ទាល់ខ្លួន( personal digital assistant) ដែលអាចហៅម្យ៉ាងទៀតថាជំនួយការ AI។ ជំនួយការAI នេះទៀតសោតវានឹងមានសមត្ថភាពដឹងមុនពីតម្រូវការរបស់មនុស្ស ហើយវានឹងធ្វើកិច្ចការជំនួសមនុស្សប្រសិនបើមនុស្សមិនមានពេលវេលាគ្រប់គ្រាន់។ លោកបានបន្ថែមទៀតថាអ្នកដែលឈ្នះក្នុងការប្រណាំប្រជែងជាមួយAI គឺអាចជាអាជីវកម្មបង្កើតថ្មី( Startups)និងក្រុមហ៊ុនបច្ចេកវិទ្យាធំៗ។

និយាយដល់AI លោក Bill Gates មានសុទិដ្ឋិនិយមថាក្រុមហ៊ុន Microsoft អាចនឹងនាំមុខគេក្នុងការបង្កើតនូវបច្ចេកវិទ្យាAI ហើយក្រុមហ៊ុនក៏បានដកកញ្ចប់លុយប្រមាណ១០ពាន់លានដុល្លារសម្រាប់វិនិយោគលើChatGPT របស់OpenAI។

 សេដ្ឋីវ័យ៦៧ឆ្នាំរូបនេះក៏បានព្រមានផងដែរថាមិនយូរទេអ្នកធ្វើការជាប្រភេទកម្មករឬអ្នកមិនមានជំនាញវិជ្ជាជីវច្បាស់លាស់នឹងត្រូវជំនួសដោយមនុស្សយន្តព្រោះAI មនុស្សយន្តអាចចំណាយលុយតិចជាងហើយធ្វើការមានប្រសិទ្ធភាពជាងនិងបានត្រឹមត្រូវជាងទៀតផង៕