បច្ចុប្បន្ននេះ គម្រោងរោងចក្រផលិតអគ្គិសនី ដើរដោយឧស្ម័នធម្មជាតិ អនុភាព៩០០ មេហ្គាវ៉ាត់ ដែលបានកំពុងដំណើរការសាងសង់នៅឃុំថ្មស ស្រុកបូទុមសាគរ ខេត្តកោះកុង។ ខណៈគម្រោងនេះត្រូវបានវិនិយោគដោយ ក្រុមហ៊ុន រ៉ូយ៉ាល់គ្រុប ខូ អិល ធី ឌី ដែលមានដើមទុនសរុ​បចំនួន ១.៣៤ពាន់លានដុល្លារ។ 

គម្រោងរោងចក្រផលិតថាមពលអគ្គិសនីដ៏ធំជាងគេនេះ ត្រូវបានបើកការដ្ឋានសាងសង់កាលពីថ្ងៃទី ១៦ ខែតុលា ឆ្នាំ២០២៤ និងគ្រោងបញ្ចប់នៅក្នុងឆ្នាំ ២០២៧។ នៅពេលសាងសង់រួចរាល់រោងចក្រផលិតអគ្គិសនី ដើរដោយឧស្ម័នធម្មជាតិ អនុភាព៩០០ មេហ្គាវ៉ាត់ នេះនឹងក្លាយជាប្រភពអគ្គិសនីដ៏សំខាន់ចាំបាច់មួយទៀត សម្រាប់បម្រើផលប្រយោជន៍ក្នុង វិស័យសេដ្ឋកិច្ច និងប្រជាពលរដ្ឋ។

សូមជម្រាបថា បច្ចុប្បន្នខេត្ដកោះកនុង មានវារីអគ្គិសនី ចំនួន០៦កន្លែង ដែលក្នុងនោះ កំពុងដំណើរការផលិតមានចំនួន០៣កន្លែង និងកំពុងដំណើរការសាងសង់មានចំនួន០៣កន្លែង ដោយមានដូចខាងក្រោម៖

• វារីអគ្គិសនី គិរីរម្យ ៣ (កំពុងដំណើរការផលិត) មានអានុភាព ១៨ មេហ្គាវ៉ាត់ (MW) មានទីតាំង ស្ថិតនៅ ឃុំដងពែង ស្រុកស្រែអំបិល ខេត្តកោះកុង
• វារីអគ្គិសនីតាតៃ (កំពុងដំណើរការផលិត) មានអានុភាព ២៤៦ មេហ្គាវ៉ាត់ (MW) មានទីតាំង ស្ថិតនៅឃុំឫស្សីជ្រុំ ស្រុកថ្មបាំង ខេត្តកោះកុង
• វារីអគ្គិសនី ឫស្សីជ្រុំក្រោម (កំពុងដំណើរការផលិត) មានអានុភាព ៣៣៨ មេហ្គាវ៉ាត់ (MW) មានទីតាំងស្ថិតនៅ ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
• វារីអគ្គិសនី ស្ទឹងតាតៃលើ (កំពុងដំណើរសាងសង់) មានអានុភាព១៥០មេហ្គាវ៉ាត់ (MW) មាន ទីតាំងស្ថិតនៅភូមិស្ពានក្តារ ឃុំតាទៃលើ ស្រុកថ្មបាំង ខេត្តកោះកុង។
• វារីអគ្គិសនីស្ទឹងវាលថ្មកំបុត (កំពុងដំណើរការសាងសង់) មានអានុភាព១០០មេហ្គាវ៉ាត់ (MW) មានទីតាំងស្ថិតនៅឃុំប៉ាក់ខ្លង ស្រុកមណ្ឌលសីមា ខេត្តកោះកុង។
• វារីអគ្គិសនីស្ទឹងមេទឹក (កំពុងដំណើរការសាងសង់) មានអានុភាព១៥០មេហ្គាវ៉ាត់ (MW) មាន ទីតាំងស្ថិតនៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង៕