តាមប្រភពពីស្ថាប័នធ្វើស្ថិតិ Seasia Stats ចេញផ្សាយនៅថ្ងៃទី១៦ ខែកក្កដា ឆ្នាំ២០២៤ បានឱ្យដឹងថា ប្រទេសក្បែរខាងកម្ពុជា១នេះ មានថ្ងៃបុណ្យជាតិ ឈប់សម្រាកច្រើនបំផុតនៅតំបន់អាស៊ានទាំង១០ប្រទេស។ ដោយយោងតាមទិន្នន័យដែលចេញផ្សាយដោយគេហទំព័រ ASEAN Main Portal។

នៅក្នុងរបាយការណ៍ដែលមានចំណងជើងថា "ថ្ងៃបុណ្យជាតិរបស់រដ្ឋសមាជិកអាស៊ាន ២០២៤" បានបញ្ជាក់ថា ប្រទេសឥណ្ឌូនេស៊ីបាននាំមុខគេ ឈរនៅលំដាប់ថ្នាក់លេខ១ ជាប្រទេសនៅអាស៊ាន ដែលមានថ្ងៃឈប់សម្រាកច្រើនបំផុត ជាមួយនឹងថ្ងៃបុណ្យជាតិចំនួន២៧ថ្ងៃក្នុង១ឆ្នាំ។

ក្នុងនោះប្រទេសកម្ពុជាបានឈរនៅចំណាត់ថ្នាក់លេខ២​ ដែលមានថ្ងៃឈប់សម្រាកបុណ្យជាតិចំនួន២២ថ្ងៃក្នុង១ឆ្នាំ ដោយប្រទេសម៉ាយ៉ាន់ម៉ាឈរនៅលេខ៣ មានថ្ងៃឈប់សម្រាកបុណ្យជាតិចំនួន១៩ថ្ងៃក្នុង១ឆ្នាំ ប្រទេសហ្វីលីពីន​ឈរនៅលំដាប់ថ្នាក់លេខ៤​ មានថ្ងៃឈប់សម្រាកបុណ្យជាតិចំនួន១៨ថ្ងៃក្នុង១ឆ្នាំ ដោយប្រទេសថៃមានថ្ងៃឈប់សម្រាកបុណ្យជាតិចំនួន១៨ថ្ងៃក្នុង១ឆ្នាំ។

ទន្ទឹមនឹងនេះប្រទេសប្រុយណេ មានថ្ងៃឈប់សម្រាកបុណ្យជាតិចំនួន១៦ថ្ងៃក្នុង១ឆ្នាំ​ ប្រទេសម៉ាឡេស៊ីមានថ្ងៃឈប់សម្រាកបុណ្យជាតិចំនួន១៦ថ្ងៃក្នុង១ឆ្នាំ ប្រទេសវៀតណាមមានថ្ងៃឈប់សម្រាកបុណ្យជាតិចំនួន១៥ថ្ងៃក្នុង១ឆ្នាំ និងប្រទេសសិង្ហបុរីមានថ្ងៃឈប់សម្រាកបុណ្យជាតិចំនួន១១ថ្ងៃក្នុង១ឆ្នាំ ខណៈប្រទេសឡាវមានថ្ងៃឈប់សម្រាកតិចជាងគេបំផុត ដោយមានត្រឹមតែ៩ថ្ងៃក្នុង១ឆ្នាំ ។

គួរបញ្ជាក់ផងដែរថាចំពោះថ្ងៃឈប់សម្រាក បុណ្យជាតិនៅក្នុងទិន្នន័យខាងលើនេះ គឹជាទិន្នន័យសម្រាប់ឆ្នាំ២០២៤៕

អត្ថបទដោយ៖ ពីង ជូអេង​