ក្រុមហ៊ុនបច្ចេកវិទ្យាខ្នាតយក្ស Apple របស់សហរដ្ឋអាមេរិកគ្រោងនឹងធ្វើការផ្លាស់ប្តូរទីតាំងរោងចក្ររបស់ខ្លួនដែលស្ថិតនៅប្រទេសចិនទៅកាន់ប្រទេសអាស៊ានវិញម្តង។ នេះបើយោងតាមការចុះផ្សាយរបស់សារព័ត៌មាន THE THAIGER កាលពីថ្ងៃទីទី៥ ខែធ្នូ ឆ្នាំ២០២២កន្លងទៅនេះ។
អ្នកវិភាគរបស់ក្រុមហ៊ុន Apple លោក Ming-Chi Kuo បាននិយាយថា “ក្រុមហ៊ុន Apple ដែលកំពុងត្រូវបានដំឡើងនៅក្នុងប្រទេសចិន ទំនងជានឹងត្រលប់ទៅប្រទេសថៃវិញ” ដោយការផ្លាស់ប្តូរដ៏ធំនេះកើតឡើងបន្ទាប់ពីខ្សែសង្វាក់ផលិតកម្មរបស់ក្រុមហ៊ុន Apple នៅក្នុងប្រទេសចិនហាក់ដូចជាត្រូវបានរារាំងយ៉ាងធ្ងន់ធ្ងរដល់ក្រុមហ៊ុនដែលធ្វើឱ្យក្រុមហ៊ុនមិនអាចចែកចាយផលិតផលតាមការគ្រោងទុកនៅលើទីផ្សារបាន។
ជាមួយគ្នានេះដែរ ចំពោះទីតាំងដំឡើងទូរស័ព្ទ iPhone នៅក្នុងប្រទេសចិននាពេលបច្ចុប្បន្ននេះត្រូវបានគេមើលឃើញថា កំពុងស្ថិតនៅក្នុងភាពរញ៉ែរញ៉ៃយ៉ាងខ្លាំង ក៏ព្រោះថាអាជ្ញាធរចិននៅតែបន្តអនុវត្តវិធានការទប់ស្កាត់ការរាតត្បាតជំងឺកូវីដ-១៩យ៉ាងតឹងរឹងបំផុត ពោលគឺសម្រេចបិទខ្ទប់ទីក្រុងនិងតំបន់ជាច្រើនជាបន្តបន្ទាប់ ហើយក្នុងនោះក៏មានទីតាំងដ៏ធំបំផុតសម្រាប់ដំឡើងទូរស័ព្ទ iPhone ផងដែរ។
គួរជម្រាបផងដែរថា បើតាមសម្តីអ្នកវិភាគរបស់ក្រុមហ៊ុន Apple លោក Gold ការផ្លាស់ប្តូររបស់ក្រុមហ៊ុន Apple ចេញពីការផ្គុំផលិតផលនៅក្នុងប្រទេសចិន ទំនងជាមិនផ្តល់ផលប្រយោជន៍ដល់ក្រុមហ៊ុនផលិតរបស់សហរដ្ឋអាមេរិកទេ ដោយសារតែការចំណាយរបស់ពួកគេខ្ពស់ជាងពេក ហើយវានឹងកាត់បន្ថយប្រាក់ចំណេញយ៉ាងច្រើនថែមទៀត។
អត្ថបទដោយ៖ នៅ ថាត់សណា
