ស្របពេលដែលបញ្ហាអត្រាពន្ធនាំចេញនាំចូលសហរដ្ឋអាមេរិក មានភាពចម្រូសចម្រាស់ ធ្វើឱ្យក្រុមហ៊ុននិងទីផ្សារភាគហ៊ុនមួយចំនួនដាំក្បាលចុះផងនោះ ក្រុមហ៊ុន Apple ដែលភាគច្រើនកំពុងធ្វើការជាមួយដៃគូផ្នែកផលិតកម្មគ្រឿងបង្គុំអេឡិចត្រូនិច ដែលជាក្រុមហ៊ុននៅតៃវ៉ាន់និងចិន បានបញ្ជាក់អំពីមូលហេតុដែលឧស្សាហកម្មរបស់ខ្លួនមានតម្រូវការរោងចក្រផលិតកម្មនៅចិន។
នាយកប្រតិបត្តិក្រុមហ៊ុន Apple លោក Tim Cook ធ្លាប់បានបង្ហើបនៅក្នុងបទសម្ភាសន៍មួយជាមួយ Fortune កាលពីឆ្នាំ២០១៧ អំពីមូលហេតុដែលក្រុមហ៊ុនដ៏ធំរបស់អាមេរិកមួយនេះត្រូវការរោងចក្រផលិតនៅចិន ជាជាងនៅអាមេរិកចាប់តាំងពីជំនាន់លោក Steve Job កាន់ក្រុមហ៊ុនមកម្ល៉េះ។
ដោយ Cook បានលើកឡើងដូច្នេះថា «ចិនលែងជាប្រទេសដែលផ្តល់ប្រាក់ឈ្នួលទាបទៀតហើយ តាំងពីរាប់ឆ្នាំមុនហើយកត្តាប្រាក់ឈ្នួលថោក មិនមែនជាហេតុផលដែលយើងជ្រើសរើសប្រទេសចិនជាខ្សែសង្វាក់ផ្គត់ផ្គង់នោះទេតែ មូលហេតុគឺដោយសារជំនាញ និងបរិមាណកម្លាំងពលកម្ម នៅកន្លែងតែមួយ និងប្រភេទជំនាញដែល Apple ត្រូវការ។»
ក្នុងនោះលោកបាន ពន្យល់ថា ប្រទេសចិនមានគុណសម្បត្តិខ្ពស់ក្នុងវិស័យផលិតកម្ម ជាពិសេសក្នុងការរៀបចំឧបករណ៍ បច្ចេកទេសដំឡើង និងដំណើរការសម្ភារៈកម្រិតខ្ពស់នៃធាតុសំខាន់ៗទាំងអស់នៅក្នុងដំណើរការផលិត iPhone។ លោកក៏បានសង្កត់ធ្ងន់ថា នៅសហរដ្ឋអាមេរិក សូម្បីតែការស្វែងរកវិស្វករឧបករណ៍ក៏ពិបាកដែរ ព្រោះចំនួនពលកម្មគឺតិចជាងចិន។
ជាក់ស្តែងនៅក្នុងសៀវភៅជីវប្រវត្តិរបស់លោក Steve Jobs ដែលសរសេរដោយអ្នកនិពន្ធ Walter Isaacson លោក Jobs ក៏បានបង្ហាញថា សហរដ្ឋអាមេរិកខ្វះអ្នកបច្ចេកទេសជំនាញប្រហែល៣ម៉ឺននាក់ ដើម្បីគាំទ្រដល់ដំណើរការផលិតរបស់ Apple។ ទន្ទឹមនឹងនេះ នៅក្នុងប្រទេសចិនវិញ ក្រុមហ៊ុន Apple អាចពឹងផ្អែកលើពលកម្មជំនាញរហូតដល់៧ម៉ឺននាក់ ឯណោះក្នុងរោងចក្រមួយនាពេលនោះ៕
អត្ថបទដោយ៖ ពីង ជូអេង
