ពេលខ្លះបងប្អូនយើងនៅខ្មែរ ចង់វេរលុយទៅកាន់បងប្អូននៅក្រៅប្រទេស ពិបាកមិនដឹងថាត្រូវវេរលុយតាមណា តែពេលនេះលែងជាបញ្ហាទៀតហើយព្រោះបងប្អូនដែលជាអ្នកប្រើប្រាស់សេវាធនាគារ អេស៊ីលីដា អាចវេរលុយតាមទូរស័ព្ទទៅទូទាំងពិភពលោក។
ថ្មីៗនេះ ធនាគារ អេស៊ីលីដា បានបញ្ចេញកម្មវិធី MoneyGram ដាក់ក្នុង អេស៊ីលីដា ម៉ូបាលដោយអេស៊ីលីដា បានសហការជាមួយក្រុមហ៊ុន MoneyGram ដែលជាក្រុមហ៊ុនផ្ដល់សេវាវេរលុយឈានមុខគេមួយនៅលើពិភពលោក។ ក្នុងការចាប់ដៃគូរវាង អេស៊ីលីដា និង MoneyGramនេះ បងប្អូនប្រើប្រាស់សេវាធនាគារ អេស៊ីលីដា អាចធ្វើការវេរលុយទៅក្រៅប្រទេសបានភ្លាមៗ តាមទូរស័ព្ទដៃលើApp ACLEDA Mobile របស់អ្នក។
បើយោងតាមការចុះផ្សាយលើFacebook page របស់ អេស៊ីលីដា បានឲ្យដឹងថាឥឡូវនេះលោកអ្នកអាចផ្ទេរប្រាក់ក្រៅប្រទេស ទូទាំងពិភពលោក ជាមួយថ្លៃសេវាពិសេស ត្រឹមតែ ១០ដុល្លារប៉ុណ្ណោះ ក្នុងមួយប្រតិបត្តិការ តាមម៉ាន់នីក្រាម លើអេស៊ីលីដាម៉ូបាល ហើយទឹកប្រាក់ទៅដល់អ្នកទទួលភ្លាមៗ។ ការផ្តល់ជូនតម្លៃពិសេសនេះ ចាប់ពីថ្ងៃជូនដំណឹងនេះ រហូតដល់ដំណាច់ខែមិថុនា ឆ្នាំ២០២២។
ថ្លៃសេវាផ្ទេរប្រាក់ដូចបានរៀបរាប់ខាងលើ អាចប្រែប្រួលតាមអត្រាប្តូរប្រាក់ និងសម្រាប់ការផ្ទេរទៅ ១០ប្រទេសប៉ុណ្ណោះ មានដូចជា ចិន, ហ្វីលីពីន, វៀតណាម, ម៉ាឡេស៊ី, សហរដ្ឋអាមេរិក, ថៃ, ឥណ្ឌូនេស៊ី, ឡាវ, មីយ៉ាន់ម៉ា, និងឥណ្ឌា។ ស្ថាប័នម៉ាន់នីក្រាម ក៏ទទួលបានចំណូលពីការប្តូរប្រាក់នេះផងដែរ។
ដើម្បីវេរលុយទៅទូទាំងពិភពលោកតាមរយៈកម្មវិធី ACLEDA Mobile App លោកអ្នកអាចចូលទៅកាន់App អេស៊ីលីដាលើទូរស័ព្ទដៃរបស់អ្នករួចចុចពាក្យ” ផ្ទេរប្រាក់”។ បន្ទាប់មកជ្រើសរើសពាក្យ” ផ្ទេរប្រាក់ទៅក្រៅប្រទេស”។ អ្នកនឹងឃើញ logo ក្រុមហ៊ុនម៉ានីក្រាម( MoneyGram) ហើយចុចលើlogo និងបំពេញព័ត៌មានផ្សេងដើម្បីវេរលុយជាការស្រេច។ សូមមើលរូបភាពខាងក្រោម។
