មិនមែន ចេះតែយកទេ! ពន្ធលើអចលទ្រព្យ នឹងត្រូវបានរដ្ឋលើកលែងពន្ធបើស្ថិតក្នុងករណី៧ នេះ

ពន្ធលើថ្លៃឈ្នួលអចលនទ្រព្យ ត្រូវអនុវត្តលើការជួលអចលនទ្រព្យនៅក្នុងព្រះរាជាណាចក្រកម្ពុជា ដែលមានវិសាលភាពអនុវត្តលើកម្មសិទ្ធិករ ឬសិទ្ធិវន្តរបស់កម្មសិទ្ធិករនៃអចលនទ្រព្យដែលមិនមែនជាអ្នកជាប់ពន្ធតាមរបបស្វ័យប្រកាស និងត្រូវជាប់ពន្ធតាមអត្រាកំណត់ ១០% នៃថ្លៃឈ្នួលអចលនទ្រព្យ។

ជាមួយគ្នានោះដែរ បើតាមលិខិតរបស់អគ្គនាយកដ្ឋានពន្ធដារ បានឱ្យដឹងថាពន្ធលើថ្លៃឈ្នួលអចលទ្រព្យនឹងត្រូវបានលើកលែងផងដែរ លើករណីទាំងនេះ៖

ថ្លៃឈ្នួលពីការជួលអចលនទ្រព្យរបស់រាជរដ្ឋាភិបាលឬក្រសួង-ស្ថាប័នរាជរដ្ឋាភិបាល

ថ្លៃឈ្នួលពីការជួលអចលនទ្រព្យរបស់បេសកកម្មការទូតឬកុងស៊ុលបរទេស ឬអង្គការអន្តរជាតិ និងទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានា

ថ្លៃឈ្នួលពីការជួលអចលនទ្រព្យរបស់អង្គការ ឬសមាគមណាមួយដែលត្រូវបានរៀបចំឡើងនិងដំណើរការសម្រាប់គោលដៅសុទ្ធសាធ ខាងសាសនា សប្បុរសធម៌ វិទ្យាសាស្ត្រ អក្សរសាស្ត្រ ឬអប់រំ និងគ្មានចំណែកណាមួយត្រូវបានប្រើប្រាស់ជាប្រយោជន៍ឯកជន

ប្រាក់ដែលអ្នកជួលបានតម្កល់ទុកជាប្រាក់ធានា និងត្រូវប្រគល់ជូនអ្នកជួលវិញនៅពេលចប់កិច្ចសន្យា

ថ្លៃឈ្នួលដែលបានកាត់ទុកប្រាក់ពន្ធរួចហើយដោយសហគ្រាសជាអ្នកជាប់ពន្ធតាមរបបស្វ័យប្រកាស

ថ្លៃឈ្នួលពីការជួលអចលនទ្រព្យរបស់សហគ្រាសជាអ្នកជាប់ពន្ធតាមរបបស្វ័យប្រកាសដែលបានគិតចូលក្នុងប្រាក់ចំណូលជាប់ពន្ធរបស់សហគ្រាសរួចហើយ

ថ្លៃឈ្នួលពីការជួលអចលនទ្រព្យចំពោះគ្រប់ករណីជួលទាំងឡាយដែលសរុបប្រាក់ឈ្នួលប្រចាំខែក្រោម ៥០០ ០០០ (ប្រាំសែន) រៀល៕

ធី ស្រីល័ក្ខ

ប្រសិនជាលោកអ្នកចង់ចែករំលែកទាក់ទងជាមួយមុខរបរផ្សេងៗឬក៏អាជីវកម្មដែលថ្មីហើយប្លែកក៏ដូចជាបទពិសោធន៍ក្នុងការប្រកបរបររកស៊ីបងប្អូនទាំងអស់គ្នាអាចធ្វើការទំនាក់ទំនងមកកាន់ខ្ញុំបាន។ ទំនាក់ទំនង 096 8989 176។ សូមអរគុណ

អត្ថបទសរុប៖ 2270