ការទារលុយពីកូនបំណុលគឺជារឿងដ៏ពិបាកមួយ ជាពិសេសស្របពេលដែលសេដ្ឋកិច្ចធ្លាក់ចុះគឺរឹតតែពិបាកទ្វេដង។ ប៉ុន្តែទោះបីជាយ៉ាងណាក៏នៅតែមានឱកាសខ្លះអាចទៅរួច ប្រសិនបើអ្នកព្យាយាមប្រើប្រាស់វិធីសាស្រ្តឱ្យបានត្រឹមត្រូវតាមជំហានច្បាស់លាស់។

ខាងក្រោមនេះជាគន្លឹះសំខាន់មួយចំនួន ក្នុងការទារប្រាក់ពីកូនបំណុលវិញ ដែលលោកអ្នកគួរត្រៀមខ្លួនអនុវត្តទៅតាមលំដាប់លំដោយ៖

១. រៀបចំឯកសារបំណុល៖ ត្រូវប្រាកដថាអ្នកមានឯកសារនៃបំណុល ដូចជាកិច្ចព្រមព្រៀងដែលបានចុះហត្ថលេខា វិក្កយបត្រ ឬបង្កាន់ដៃ។ រក្សាកំណត់ត្រានៃការទំនាក់ទំនងរបស់អ្នកជាមួយកូនបំណុល រួមទាំងសំបុត្រ អ៊ីមែល ឬការហៅទូរស័ព្ទ ដោយប្រុងប្រយ័ត្ន ព្រោះថាឯកសារទាំងអស់ហ្នឹង នឹងមានប្រយោជន៍ ប្រសិនបើអ្នកត្រូវចាត់វិធានការផ្លូវច្បាប់។

២. ត្រូវយល់ដឹងអំពីច្បាប់៖ មានច្បាប់ដែលការពារកូនបំណុលពីការយាយី និងការអនុវត្តការប្រមូលដោយអយុត្តិធម៌។ ត្រូវប្រាកដថាអ្នកធ្លាប់ស្គាល់ច្បាប់ទាំងនេះ មុនពេលអ្នកចាប់ផ្តើមព្យាយាមប្រមូលពីកូនបំណុល។

៣. ទាក់ទងកូនបំណុល៖ ជំហានដំបូងគឺត្រូវទាក់ទងកូនបំណុល ហើយព្យាយាមដោះស្រាយបញ្ហាបែបមិត្តភាព។ ប្រាប់ពួកគាត់ឱ្យថាអ្នកដឹងពីទុក្ខលំបាករបស់គាត់ ប៉ុន្តែធ្វើម៉េចយើងក៏មានតម្រូវការដូចគ្នា។ ត្រូវចាំថារាល់ពេលនិយាយស្ដីជាមួយកូនបំណុល អ្នកត្រូវតែរក្សាឱ្យបាននូវសុជីវធម៌ និងវិជ្ជាជីវៈ ប៉ុន្តែត្រូវរឹងមាំច្បាស់លាស់ជាមួយនឹងលក្ខខណ្ឌ ក៏ដូចជាគោលបំណងរបស់អ្នក។ ត្រូវតែរក្សាអាកប្បកិរិយាប្រកបដោយសីលធម៌វិជ្ជាជីវៈ ទោះបីជាកូនបំណុលលំបាកក៏ដោយ វា​នឹង​ជួយ​ឱ្យសម្ដីរបស់អ្នកកាន់តែមានទម្ងន់ធ្ងន់នៅពេលមានការចរចាលក្ខខណ្ឌ។

៤. ផ្ញើលិខិតទាមទារជាលាយលក្ខណ៍អក្សរ៖ ប្រសិនបើកូនបំណុលមិនឆ្លើយតបនឹងទំនាក់ទំនងដំបូងរបស់អ្នកទេ សូមផ្ញើលិខិតទាមទារជាលាយលក្ខណ៍អក្សរមកពួកគេ។ លិខិតនេះគួរតែបញ្ជាក់យ៉ាងច្បាស់អំពីចំនួនប្រាក់ដែលជំពាក់ កាលបរិច្ឆេទនៃការបង់ប្រាក់ និងផលវិបាកនៃការមិនបង់ប្រាក់។ ដើម្បីឱ្យកាន់តែមានទម្ងន់ អ្នកអាចពឹងពាក់សេវាមេធាវី ឱ្យរៀបចំបាន។

៥. ពិចារណាលើការសម្រុះសម្រួល៖ ប្រសិនបើកូនបំណុលមិនអាចសងបំណុលទាំងអស់បានទេ អ្នកអាចធ្វើការចរចារផែនការទូទាត់ថ្មីបាន។ ការសម្របសម្រួលគឺដំណើរការបានដោយមានកិច្ចព្រមព្រៀងថ្មី ដែលមានសរសេរនូវចំនួនបំណុលសរុបជាក់លាក់ ការប្រាក់ ព្រមទាំងចំនួនទឹកប្រាក់ដែលកូនបំណុលនិងម្ចាស់បំណុល ព្រមព្រៀងគ្នាជាថ្មីថានឹងទូទាត់ឱ្យគ្នាក្នុងកម្រិតណាមួយសមស្រប ទាបជាងកិច្ចសន្យាចាស់ បន្ទាប់មកផ្ដិតមេដៃទាំងពីរភាគី។ ករណីនេះបើមានភាគីទីបី មកធ្វើជាសាក្សីរឹតតែប្រសើរ បើបានមេធាវីតែម្ដង កិច្ចសន្យានោះនឹងកាន់តែមានទម្ងន់ខ្លាំងថែមទៀត។

៦. ចាត់វិធានការផ្លូវច្បាប់៖ ប្រសិនបើសកម្មភាពដែលរៀបរាប់ខាងលើទាំងអស់បរាជ័យ អ្នកប្រហែលជាដល់ពេលត្រូវចាត់វិធានការតាមផ្លូវច្បាប់វិញម្ដង។ អ្នកអាចប្រើប្រាស់សេវាមេធាវី ព្រោះថាពួកគាត់ជាអ្នកដែលអាចជួយអ្នកក្នុងការរៀបចំឯកសារសំខាន់ ប្រឹក្សាផ្នែកច្បាស់ ឬអាចឈរជើងខាងអ្នកបើមានករណីឡើងដល់តុលាការ។ វាអាចចំណាយពេលវេលា ចំណាយទាំងលុយ ប៉ុន្តែវាអាចជាជម្រើសតែមួយគត់របស់អ្នក ប្រសិនបើកូនបំណុលមិនព្រមបង់ប្រាក់ក្នុងចំនួនច្រើន។

បើទោះបីជាការទារលុយពីកូនបំណុលអាចជាបទពិសោធន៍ដ៏ស្មុគស្មាញ ធុញថប់ និងតានតឹង ប៉ុន្តែត្រូវមិនត្រូវអស់សង្ឃឹមទេ។ ប្រសិនបំណុលមានចំនួនទឹកប្រាក់ច្រើន អ្នកត្រូវតែចេញធ្វើសកម្មភាពឱ្យបានរហ័ស និងតស៊ូ អត់ធ្មត់ កុំចុះចាញ់ ជាពិសេសកុំខ្លាចក្នុងការស្វែងរកជំនួយនៅពេលដែលអ្នកគិតអ្វីមិនចេញ៕

អត្ថបទដោយ៖ SOKLY SO-កូនផ្កាឈូក