បណ្ណបើកបរពិតជាសំខាន់ណាស់សម្រាប់អ្នកបើកបរយានយន្ដគ្រប់ប្រភេទ។ព្រោះវាជាបណ្ណមួយ បញ្ជាក់ថាអ្នកបានរៀនជំនាញ និងច្បាប់ក្នុងការបើកបរ ដែលទទួលស្គាល់ដោយក្រសួងសាធារណការ និងដឹកជញ្ជូនមុននឹងអនុញ្ញាតឲ្យកាន់ចង្កូតយាន្ដជំនិះ។ យ៉ាងណាមិញបើតាមប្រភពពីក្រសួងសាធារណការ និងដឹកជញ្ជូន ចុះថ្ងៃទី២២ ខែកុម្ភៈ ឆ្នាំ២០២៣ បានឱ្យដឹងថាបណ្ណបើកបរនៅកម្ពុជាមានចំនួន៥ប្រភេទដូចជា៖

១. បណ្ណបើកបរប្រភេទ “ក” ៖ 

- ទោចក្រយានយន្តដែលមានថាមពលអគ្គិសនីលើសពី១១គីឡូវ៉ាត់ - ទោចក្រយាន្តយន្តដែលមានទំហំស៊ីឡាំងលើសពី ១២៥ សង់ទីម៉ែត្រគូប - ទោចក្រយាន្តយន្តសណ្ដោងរ៉ឺម៉ក និង ត្រីចក្រយានយន្ត ។

២. បណ្ណបើកបរប្រភេទ “ខ” ៖

- រថយន្តដឹកទំនិញដែលមានទម្ងន់សរុបអតិបរមាមិនលើសពី ៣,៥ តោន - អាចសណ្ដោងរ៉ុម៉កដែលមានទម្ងន់សរុបអតិបរមាមិន លើសពី ០,៧៥តោន - រថយន្តដឹកអ្នកដំណើរមិនលើសពី ៩ នាក់ ដោយគិតទាំងអ្នកបើកបរ ។

៣. បណ្ណបើកបរប្រភេទ “គ” ៖

- រថយន្តដឹកទំនិញដែលមានទម្ងន់សរុបអតិបរមាលើសពី ៣,៥ តោន និងអាចសណ្ដោងរ៉ឺម៉កដែលមានទម្ងន់សរុបអតិបរមាមិនលើសពី ០,៧៥ តោន

៤. បណ្ណបើកបរប្រភេទ “ឃ” ត្រូវបែងចែកជាពីរប្រភេទ ៖

- ឃ១ : រថយន្តដឹកអ្នកដំណើរចាប់ពី ១០នាក់ ដល់២០នាក់ ដោយគិតទាំងអ្នកបើកបរ និងអាចសណ្ដោងរ៉ឺម៉កដែលមានទម្ងន់សរុបអតិបរមាមិនលើសពី ០,៧៥ តោន

 -ឃ២ : រថយន្តដឹកអ្នកដំណើរលើសពី ២០នាក់ ដោយគិតទាំងអ្នកបើកបរ និងអាចសណ្ដោងរ៉ឺម៉កដែលមានទម្ងន់សរុបអតិបរមាមិនលើសពី ០,៧៥ តោន

៥. បណ្ណបើកបរប្រភេទ “ង” ត្រូវបែងចែកជាបីប្រភេទគឺ៖

- ង(ខ) : រថយន្តប្រភេទ “ខ” មានសណ្ដោងរ៉ឺម៉កដែលមានទម្ងន់សរុបអតិបរមាលើសពី ០,៧៥ តោន

- ង(គ) : រថយន្តប្រភេទ “គ” មានសណ្ដោងរ៉ឺម៉កដែលមានទម្ងន់សរុបអតិបរមាលើសពី 0,៧៥ តោន

 - ង(ឃ) : រថយន្តប្រភេទ “ឃ” មានសណ្ដោងរ៉ឺម៉កដេលមានទម្ងន់សរុបអតិបរមាលើសពី ០,៧៥ តោន ។