កំព្យូទ័រមានខួរក្បាលខ្លាំង ប៉ុន្តែខួរក្បាលមនុស្សអាចនិយាយបានថា ខ្លាំងជាងកំព្យូទ័រទៅទៀត ព្រោះមនុស្សជាអ្នកបង្កើតវា។ មនុស្សជាច្រើនតែងនិយាយថាភាពឆ្លាតរបស់មនុស្សអាចបណ្តាលមកពីកត្តាជីវសាស្រ្តឬតំណពូជជាដើម។ដោយឡែកមនុស្សនៅតែអាចឆ្លាតបានយ៉ាងអញ្ចឹងប្រសិនបើពួកគេមានទម្លាប់ធ្វើជាមនុស្សឆ្លាត​ ហើយទម្លាប់នាំឱ្យឆ្លាតទាំង ៥ខាងក្រោម អាចជួយឱ្យអ្នកលេចធ្លោជាងគេ សូម្បីមហាសេដ្ឋីល្បីៗក៏ធ្លាប់អនុវត្តទម្លាប់ទាំងនេះដែរ។

១. ឆ្ងល់សួរៗ ( Pick other Brain )

ធ្លាប់ទេកំពុងតែធ្វើអ្វីមួយសុខៗ ស្រាប់តែមានសំណួរជាច្រើនផុសចេញពីខួរក្បាលហើយអន្ទាះសារចង់ស្វែងរកចម្លើយ? ទម្លាប់ឆ្ងល់ហើយសួរគឺជាទម្លាប់ដែលធ្វើឱ្យការគិតរបស់មនុស្សមានភាពប្រសើរនឹងមានចំណេះដឹងទូលាយ ការធ្វើដូចនេះគឺប្រៀបដូចជាការសូមយោបល់និងចង់ដឹងអំពីការគិតរបស់អ្នកដទៃ ប៉ុន្តែមនុស្សឆ្លាតគេឆ្ងល់ហើយសួរតែសំណួរណាដែលធ្វើឱ្យគេរីកចម្រើនប៉ុណ្ណោះ។

២. សម្រាក

នៅពេលដែលមនុស្សស្រ្តេសច្រើន ពួកគេនឹងមានអារម្មណ៍ថាតានតឹងចង់គេងជាដើម។ ផ្ទុយមកវិញមនុស្សឆ្លាតគឺមានទម្លាប់សម្រាកខួរក្បាលនឹងប​ញ្ចូលថាមពលឱ្យវា ដោយប្រើពេលទៅអានសៀវភៅដើម្បីស្វែងរកចម្លើយណាមួយដែលគេអាចយក ទៅដោះស្រាយបញ្ហាដែលគេកំពុងប្រឈមបាន។

សាកស្រមៃទៅមើលថា​ បើអ្នកកំពុងស្មុគស្មាញជាមួយនឹងការងារ តែអ្ន​ក​បានចាប់កាន់សៀវភៅមកអាននោះអ្នកនឹងមានអារម្មណ៍ថាមានថាមពលដ៏ពិសេសចូលទៅក្នុងខួរក្បាលរបស់អ្នកដោយមិនដឹងខ្លួន។

តួយ៉ាងសូម្បីតែមហាសេដ្ឋី Bill Gates ក៏ជាមនុស្សដែលខ្វះការអានមិនបាននោះដែរ ហើយលោកតែងតែនិយាយថា “គ្រប់ការអានសៀវភៅទាំងអស់ ពិតជាបានបង្រៀនមេរៀនថ្មីៗជាច្រើនដែលពេលខ្លះខ្ញុំមិនបានដឹង”។

៣. គេងឱ្យស្ងប់នឹងគ្រប់គ្រាន់ ហូបអាហារល្អៗ

ការគេងមានសារៈសំខាន់បំផុតសម្រាប់សុខភាព ហើយប្រសិនបើយើងគេងមិនគ្រប់គ្រាន់ ឬមិនស្កប់ស្កល់នោះវានឹងបណ្ដាលឱ្យប៉ះពាល់យ៉ាងធ្ងន់ធ្ងរចំពោះសុខភាព ផលិតភាពការងារធ្លាក់ចុះជាក់ជាពុំខាន។​ ដូ​ច្នេះចូរកុំមើលរំលងទម្លាប់តូច១នេះឱ្យសោះ គេង​ឱ្យបានទៀងទាត់ ស្កប់ស្កល់ ហូបអាហារល្អ និងទៀងទាត់ ព្រោះវាជាផ្នែកមួយដែលនាំឱ្យខ្លួនក្បាលយើងឆ្លាត ដោយផ្សាភ្ជាប់ជាមួយកត្តាជីវសាស្រ្តផងដែរ។

៤. ចង្អុលដៃទៅពិភពលោក

មនុស្សឆ្លាតជាមនុស្សអាចផ្លាស់ប្តូរបទពិសោធន៍ បត់បែនទៅតាមវប្បធម៌របស់សង្គមប្រកបដោយភាពត្រឹមត្រូវ ហើយអាចយកចង្អុលដៃ នាំខ្លួនឯងទៅជុំវិញពិភពលោក ស្វែងយល់ពីអ្វីថ្មី រៀនជាមួយមនុស្សថ្មីៗ។ បច្ចេកវិទ្យាចេះតែដើរទៅមុខមនុស្សចេះតែរីកចម្រើន គ្រប់គ្នាតែងប្រើអេឡិចត្រូនិចដើម្បីស្រាវជ្រាវ​អ្វីដែលពួកគេចង់ដឹងចង់ឃើញ ពោលគឺចេះប្រើអ៊ីនធើណេតឱ្យបានត្រឹមត្រូវ ដោយយកដៃចុចមើលអ្វីដែលធ្វើឱ្យខ្លួនឯងរីកចម្រើន។

៥. បង្រៀនអ្នកដទៃ

មនុស្សឆ្លាតគឺជាមនុស្សទាំងឡាយណាដែលចូលចិត្តចែករំលែកចំណេះដឹងដែលខ្លួនមានទៅកាន់អ្នកដទៃ ព្រោះថាមនុស្សកាន់តែពូកែគឺកាន់តែត្រូវសំលៀងគំនិត កាន់តែប្រើគំនិត កាន់តែមុត កា​ន់តែធ្វើ កាន់តែចេះ។ សូម្បីតែមហាសេដ្ឋីល្បីៗនៅលើលោកក៏ជាមនុស្សដែលពូកែនិយាយជាសាធារណៈ ចែករំលែកបទពិសោធន៍ដែលខ្លួនមាន ព្រោះពួកគាត់យល់ថាការធ្វើបែបនេះនឹងធ្វើឱ្យគាត់កាន់តែឆ្លាត នឹងរីកចម្រើន៕

អត្ថបទដោយ៖ ពីង ជូអេង