ចំពោះបងប្អូនប្រជាកសិករតាមបណ្តាលខេត្តដែលមានដីសម្រាប់ធ្វើចំការ រមែងតែងចង់បានចំណូល ២ ទៅ ៣ ច្រកចេញពីដីដែលខ្លួនមាន ប៉ុន្តែមិនទាន់រកវិធីឃើញថាគួរតែធ្វើបែបណាទើបអាចរកចំណូលបានព្រមៗគ្នានៅលើដីតែមួយ។ដោយមើលឃើញពីបញ្ហានេះ ថ្ងៃនេះ ក្រុមការងារ Business Cambodia សូមលើកយកនូវគំនិតច្នៃដី ក៏ដូចជាការជ្រើសរើសនូវប្រភេទដំណាំដែលជួយឱ្យបងប្អូនប្រជាកសិករអាចរកចំណូលបាន២ច្រកចេញពីដីតែមួយ។ដែលរួមមាន ៖

១.ដាំមៀន និង ចិញ្ចឹមឃ្មុំ

កន្លងមកធ្លាប់មានបងប្អូនប្រជាកសិករយើងធ្លាប់ធ្វើបានជោគជ័យរួចទៅហើយ ដោយពួកគាត់បានដាក់ដាំដំណាំមៀនហើយពេលមៀនចាប់ផ្តើមចេញផ្កា គាត់ក៏បន្តចិញ្ចឹមឃ្មុំដើម្បីឱ្យវាក្រេបលម្អងផ្កាហើយបង្កើតជាទឹកឃ្មុំ។ការធ្វើបែបនេះ ក្រៅពីទទួលបានទិន្នផលពីផ្លែមៀនហើយ ប្រជាកសិករក៏អាចទទួលផលបានពីទឹកឃ្មុំដូចគ្នា។ហើយចំពោះទឹកឃ្មុំនិងដំណាំផ្លែមៀនសុទ្ធតែជាដំណាំដែលមានទីផ្សារដូចៗគ្នា រីឯតម្លៃវិញក៏មិនថោកប៉ុន្មានដែរសម្រាប់ទីផ្សារនាពេលបច្ចុប្បន្ននេះ ហេតុនេះសម្រាប់បងប្អូនអាចធ្វើការពិចារណាបាន។

២.ដាំស្វាយ និងដំណាំគួបផ្សំនៅក្រោម

ចំពោះប្រភពចំណូលដែលបានពីការដាំស្វាយនឹងដាំដំណាំគួបផ្សំ គឺមានកសិករមួយរូបធ្លាប់ធ្វើបានជោគជ័យរួចហើយ ​អ្នកស្រី លក្ខិណា គឺជាម្ចាស់ចំការត្របែក និងស្វាយមួយកន្លែងនៅខេត្តកណ្តាល បច្ចុប្បន្នអ្នកស្រីមានចំការដាំដុះដំណាំដល់ទៅជាង ១០ហិកតា ដែលដីទាំងអស់ស្រោចស្របទៅដោយដំណាំត្របែក និងស្វាយទាំងអស់។ក្នុងនាមជាកសិករមួយរូបដែលកំពុងកាក់កបជាមួយការធ្វើចំការ អ្នកស្រី លក្ខិណា បានបង្កើតចំណូលបាន ៣ប្រភពលើដីតែមួយ ដំបូងអ្នកស្រីដាំស្វាយ និងត្របែក ក្រោយដាំដីនៅចន្លោះខ្លះអ្នកស្រីក៏បន្ថែមដំណាំពោតមួយមុខទៀត។

៣.ដាំដូងនិងជីកស្រះចិញ្ចឹមត្រី

ក្រៅពីរបរទាំង២ខាងលើហើយនោះ យើងក៏អាចយកដីទំនេរនោះដាំដូង ឬ ដាំដំណាំផ្លែឈើផ្សេងទៀត បន្ទាប់មកចន្លោះដីដែលទំនេរយើងអាចដាំដំណាំក្រោមដូចចំណុចទី២ ឬ មួយវិធីទៀតយើងអាចជីកជាស្រះវែងតាមបណ្តោយដី ដើម្បីចិញ្ចឹមត្រី ឬអាចដាំដំណាំលើទឹកផ្សេងៗបានដូចជាត្រកួន កញ្ឆែតជាដើម។

៤.ដាំដំណាំច្នៃចេញជាកន្លែងកំសាន្ត

បច្ចុប្បន្នឃើញថាប្រទេសជិតខាងកម្ពុជាច្រើនបាននឹងកំពុងច្នៃដីដែលមាន ២ ទៅ ៣ ហិកតាតាមបណ្តាលខេត្តធ្វើជាកន្លែងដាំដំណាំនិងកែច្នៃទៅជាកន្លែងកំសាន្តយ៉ាងទាក់ទាញ ដែលអាចរកចំណូលបានពីរផ្លូវក្នុងពេលតែមួយ ក្នុងនោះមានបងប្អូនមួយចំនួនបានដាំដូងហើយច្នៃដាក់កញ្ចុះដើម្បីឱ្យភ្ញៀវចូលកំសាន្ត ដូចជារមនីយដ្ឋានអាណាចក្រដូងដែលនៅខេត្តកំពុងឆ្នាំងជាដើម។ក្រៅពីនោះក៏នៅមានរីស៊តមួយចំនួនទៀតនៅខេត្តកំពតបានដាំទុរេន ហើយសាងសង់ជាផ្ទះលំហែរសម្រាប់ភ្ញៀវទេសចរណ៍យ៉ាងទាក់ទាញ។

ទាំងនេះសុទ្ធសឹងតែជាគំនិតល្អៗដែលចង់ឱ្យបងប្អូនយកទៅពិចារណាធ្វើបន្ថែមពីលើការច្នៃដីដាំតែដំណាំមួយមុខ ប៉ុន្តែយើងអាចបង្កើតទៅជាចំការកសិទេសចរណ៍បានដូចនៅប្រទេសជិតខាង ដែលមានដាំជាបន្លែឈើពេលភ្ញៀវទៅលេងគិតលុយចូលបេះញ៉ាំ ហើយអាចសម្រាកលំហែរកាយបានថែមទៀតផង។

គួរបញ្ជាក់ផងដែរថា នេះជាគំនិតខ្លះៗដែលក្រុមការងារ Business Cambodia បានចែករំលែកតាមរយៈបទពិសោធន៍ដែលប្រជាកសិករយើងធ្លាប់បានធ្វើ ហើយសង្ឃឹមថាគំនិតនេះក៏នឹងអាចជួយឱ្យបងប្អូនដទៃទៀតរៀនសូត្រនិងអនុវត្តបានផងដែរ៕

អត្ថបទដោយ៖សម្បត្តិ សុខឡាង