ការបង្កើតមិត្ត បង្កើនទំនាក់ទំនង នៅក្នុងមុខជំនួញឬការងារ គេតែងតែសង្កេតមើលអប្បាកិរិយានិងធាតុពិតរបស់មនុស្សនោះ ដើម្បីឱ្យប្រាកដចិត្តថា បើគេវិនិយោគពេលវេលា លុយកាក់ និងកម្លាំងកាយចិត្តជាមួយ បុគ្គលម្នាក់នោះស័ក្តិសមតម្លៃទេ មនុស្សនោះជាប្រភេទ Fake Person ឬដែរទេ?
យ៉ាងណាមិញថ្ងៃនេះយើងសូមលើកយកនូវវិធីរៀនមើលមនុស្សរបស់អ្នកចិត្តវិទ្យា អំពីស្ថានការណ៍ទាំង៣ ដែលអាចធ្វើឱ្យមនុស្សលេចធាតុពិតរបស់ពួកចេញមក។
១. ស្ថិតក្នុងស្ថានភាព តានតឹង ស្រ្តេស៖ ភាពតានតឹងគឺជាស្ថានភាពជីវិតមួយ ដែលអាចបង្ហាញពីអត្តចរិតពិតរបស់មនុស្ស ពេលស្ថិតក្នុងភាពតានតឹង មនុស្សមួយចំនួនឆាប់ខឹង និងអន្ទះអន្ទែង ចំណែកឯអ្នកខ្លះទៀតនៅមានភាពស្ងប់ស្ងាត់ និងមានសណ្តាប់ធ្នាប់។ អ្នកខ្លះអាចដកថយ និងដាក់ខ្លួនឲ្យនៅឯកោ ខណៈអ្នកខ្លះទៀតអាចស្វែងរកជំនួយ។
ជួនកាលភាពតានតឹងអាចនាំមកនូវអ្វីដែលល្អបំផុត ឬអាក្រក់បំផុត ប៉ុន្តែ វាក៏បង្ហាញថាមនុស្សម្នាក់នោះមានភាពពិតបែបណា តើពួកគេអាចដួលដោយសារ សម្ពាធទេ? ឬគេអាចក្រោកឡើងយ៉ាងរឹងមាំក្នុងឱកាស?
២. កំឡុងពេលជួបវិបត្តិធំ៖ អ្នកចិត្តវិទ្យានិយាយថា គ្រាវិបត្តិគឺជាពេលវេលាបំផុតក្នុងការបង្ហាញពីចរិតមនុស្សទាំងល្អនិងអាក្រក់ នៅពេលដែល យើងធ្វើការងារឬរួមដំណើរជាមួយនរណាម្នាក់ បើស្ថិតក្នុងស្ថានភាពលំបាក ប្រឈមមុខវិបត្តិតើបុគ្គលម្នាក់នោះនឹងបន្តដើរទៅមុខឬបោះបង់។
ចូរសង្កេតមើលរបៀបដែលគេម្នាក់នោះមានប្រតិកម្មចំពោះបញ្ហា ពេលនោះវាអាចប្រាប់អ្នកបានច្រើន អំពីចរិតលក្ខណៈរបស់ពួកគេ។ តើពួកគេភ័យស្លន់ស្លោទេ? តើពួកគេនៅស្ងៀម ឬឡើងទៅទទួលខុសត្រូវ ឬគេចចេញពីកាការស្តីបន្ទោស?
៣. ពេលនរណាម្នាក់ប៉ះផលប្រយោជន៍គេ៖ មធ្យោបាយដ៏ស៊ីជម្រៅបំផុតមួយក្នុងការមើលពីចរិត របស់នរណាម្នាក់ គឺការសង្កេតពីរបៀបដែលពួកគេប្រព្រឹត្តចំពោះ មនុស្សគ្មានប្រយោជន៍សម្រាប់គេ និងពេលដែលនរណាម្នាក់បានធ្វើឱ្យប៉ះផលប្រយោជន៍គេ។
ពេលដែលពួកគេប្រាស្រ័យទាក់ទងជាមួយដែលមានឋានៈទាបជាង អ្នកទន់ខ្សោយជាង តើគេនឹងធ្វើបែបណា ធ្វើដោយការគោរពទេ ឬគេមិនយកចិត្តទុកដាក់ព្រោះមិនឃើញប្រយោជន៍ភ្លាមៗ?
ជាការពិតណាស់ ស្ថានភាពនីមួយៗដែលយើងជួបប្រទះ ការសម្រេចចិត្តនីមួយៗដែលយើងបានរើសគឺនិងបុគ្គលដែលយើងជ្រើសសេពគប់ គឺពិតជាសំខាន់ដើរតួនាទីដ៏ធំ ឆ្លុះបញ្ចាំងថាខ្លួនយើងជានរណា។
ដូចពាក្យរបស់លោក Carl Jung ដែលជាអ្នកចិត្តវិទ្យាជនជាតិស្វីសបានវិភាគថា "ការជួបគ្នានៃបុគ្គលិកលក្ខណៈពីរគឺប្រៀប ដូចជាទំនាក់ទំនងនៃសារធាតុគីមី២ ប្រសិនបើមានសារធាតុណាមួយប្រតិកម្មខ្លាំងជាងនោះ សារធាតុទាំង២នឹងផ្លាស់ប្តូរ" ៕
អត្ថបទដោយ៖ ពីង ជូអេង