គណៈប្រតិភូវិនិយោគមកពីប្រទេសចិន ដែលមានក្រុមហ៊ុនប្រមាណជាង ១៥០ នឹងមកទស្សនៈកិច្ចនៅក្នុងប្រទេសកម្ពុជានាពេលឆាប់ៗខាងមុខនេះ ដើម្បីស្វែងរកឱកាសវិនិយោគ ខណៈនៅក្នុងចំណោមក្រុមហ៊ុនទំាំងនោះ មានក្រុមហ៊ុន១ បានបញ្ជាក់ថាគ្រោងបោះទុនជាង ១ ពាន់លានដុល្លារ ដើម្បីដំណើរការផលិតកងរថយន្ដនៅកម្ពុជា។ នេះបើតាមប្រសាសន៍លើកឡើងរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា។
នៅក្នុងពិធីសំណេះសំណាល ជាមួយបងប្អូនសហគមន៍ខ្មែររស់នៅប្រទេសអូស្រ្តាលី និងនូវ៉ែលសេឡង់ ដែលរៀបចំក្នុងទីក្រុងម៉ែលប៊ន ប្រទេសអូស្ត្រាលី កាលពីថ្ងៃទី៣ ខែមីនា ឆ្នាំ២០២៤ សម្ដេចធិបតីនាយករដ្ឋមន្ដ្រីបានឲ្យដឹង នៅប៉ុន្មានថ្ងៃខាងមុខ ឯកឧត្ដម ស៊ុន ចាន់ថុល ឧបនាយករដ្ឋមន្ដ្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នឹងទទួលជួបជាមួយប្រតិភូក្រុមហ៊ុនវិនិយោគខាងលើ បន្ទាប់មកពីឯកឧត្ដមធ្វើដំណើរមកពីប្រទេសអូស្ដ្រាលីវិញ។
«...ប៉ុន្មានថ្ងៃទៀត ស្អែក ខានស្អែក ឯកឧត្ដម សុន ចាន់ថុល ត្រូវត្រឡប់ទៅវិញ ទៅជួបជាមួយគណៈប្រតិភូវិនិយោគមកពីចិនជាង ១៥០ ក្រុមហ៊ុន។ ក្នុងនោះមានក្រុមហ៊ុនមួយដែលផលិតកង់ឡាន ដែលគ្រោងដាក់ ១ ពាន់លានដុល្លារនៅស្រុកខ្មែរយើងដើម្បីធ្វើ»។ ប្រសាសន៍សម្ដេចធិបតី ហ៊ុន ម៉ាណែត ថ្លែងនៅក្នុងពិធីខាងលើ។
សម្ដេចធិបតីនាយករដ្ឋមន្ដ្រីបន្ដថា ក្រៅពីក្រុមហ៊ុនខាងលើ សម្រាប់ក្រុមហ៊ុនដែលវិនិយោគនៅក្នុងប្រទេសស្រាប់ នៅក្នុងរយៈពេល ៨ ខែចុងក្រោយនេះ ទទួលបានការទុកចិត្ដលើស្ថិរភាពបានធ្វើឲ្យក្រុមហ៊ុនខ្លះសម្រេចពង្រីកទុន ២០០ ទៅ ៣០០ លានដុល្លារ ខណៈក្រុមហ៊ុនខ្លះដាក់ទុន ៥០០ ទៅ ៦០០ លានដុល្លារឯណោះលើអាជីវកម្មរបស់ពួកគេ៕
