ក្រុមហ៊ុនផលិតរថយន្តរបស់ស៊ុយអែត Volvo កាលពីពេលថ្មីៗនេះបានឱ្យដឹងថា ម៉ូឌែលរថយន្តអគ្គិសនី Volvo EX90 ស៊េរីឆ្នាំ ២០២៤ ត្រូវបានអតិថិជនទិញអស់ពីស្តុកត្រឹមត្រីមាសដំបូងប៉ុណ្ណោះ ខណៈមួយគ្រឿងមានតម្លៃ៨ម៉ឺនដុល្លារសហរដ្ឋអាមេរិក។
យោងតាមការចុះផ្សាយរបស់គេហទំព័រ Green Car Reports កាលពីពេលថ្មីៗបានឱ្យដឹងថា រថយន្តអគ្គិសនី Volvo EX90 គឺមានការគាំទ្រច្រើនលើសពីការរំពឹងទុករបស់ក្រុមហ៊ុន ដែលជាហេតុធ្វើឱ្យក្រុមហ៊ុនត្រូវសម្រេចចិត្តធ្វើការបិទការកម្មង់ពេលនេះ ដោយសារតែដំណើរការផលិតកម្មដែលបានគ្រោងទុកដំបូងត្រូវបានលក់អស់ ប៉ុន្តែយ៉ាងណាមិញរថយន្ត Volvo EX90 នឹងបើកឱ្យកម្មង់ម្តងទៀតក្នុងពេលឆាប់ៗនេះ ។
មូលហេតុដែលរថយន្តអគ្គិសនី Volvo EX90 អាចលក់អស់ពីស្តុកនោះ គឺដោយសារតែរថយន្ត Volvo EX90 មានកម្លាំងដល់ទៅ ៤០២ សេះ ខណៈរថយន្តស៊េរី Performance ដែលមានកម្លាំង ៥១០ សេះ។ លើសពីនេះរថយន្តម៉ូឌែលនេះអាចស្ទុះឡើងពី០ ដល់៩៧ដោយប្រើរយៈពេលត្រឹមតែ ៤.៧ វិនាទីប៉ុណ្ណោះជាមួយតម្លៃចាប់ពី៨ម៉ឺនដុល្លារ ទៅ ១១ម៉ឺនដុល្លារ ដោយសាកថ្មត្រឹមតែ ៣០ នាទី អាចបើកបរបានចម្ងាយ ៦០០ គីឡូម៉ែត្រ។
គួរជម្រាបផងដែរថា Volvo Cars គឺជាក្រុមហ៊ុនពហុជាតិសាសន៍ដែលមានរោងចក្រនៅក្នុងប្រទេសចិន ស៊ុយអែត និងសហរដ្ឋអាមេរិក សម្រាប់ទីផ្សារពិភពលោកភាគច្រើន រថយន្ត Volvo ទាំងអស់ត្រូវបានផលិត និងដំឡើងនៅប្រទេសស៊ុយអែត៕
