កាលពីពេលថ្មីៗកន្លងទៅ ក្រសួងកសិកម្មសហរដ្ឋអាមេរិក (USDA) បានប្រកាសអនុញ្ញាតឱ្យវៀតណាមនាំចេញផ្លែដូងដែលបកសម្បករួចទៅលក់នៅទីផ្សារសហរដ្ឋអាមេរិកជាផ្លូវការ ដោយសម្រាប់ដូងដែលនឹងត្រូវនាំចេញទៅកាន់ទីផ្សារអាមេរិក គឺភាគីវៀតណាមត្រូវយកសំបកចេញយ៉ាងហោចឱ្យបាន ៧៥ ភាគរយសម្រាប់ផ្លែដូងខ្ចី និងសម្រាប់ផ្លែដូងទុំគឺត្រូវយកសំបកចេញទាំងអស់ មុននឹងធ្វើការនាំចេញ។ នេះបើយោងតាមការចុះផ្សាយសារព័ត៌មាន VN Express ។
តាមប្រភពដដែលខាងលើបានឱ្យដឹងទៀតថា មុនឈានដល់ការបើកភ្លើងខៀវពីភាគីអាមេរិកនេះ ប្រទេសទាំងពីរបានបើកការជំនួបម្តង កាលពីខែមេសាកន្លងទៅ ដោយមានការអញ្ជើញចូលរួមពី រដ្ឋមន្ត្រីក្រសួងកសិកម្មអាមេរិកលោក Thomas Vilsack និង រដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម លោក Le Minh Hoan ។ ក្នុងជំនួបពិភាក្សានោះ វៀតណាមបានធ្វើការស្នើឱ្យសហរដ្ឋអាមេរិកពន្លឿនដំណើរការវាយតម្លៃ និងការបើកទីផ្សារសម្រាប់ផ្លែដូង និងផ្លែឈើរបស់វៀតណាម។ដែលជាលទ្ធផលនៅថ្ងៃទី ៨ខែ សីហា ឆ្នាំ ២០២៣ កន្លងទៅនេះ វៀតណាមក៏ទទួលបានឱកាសសម្រាប់ការនាំចូលផ្លែដូងស្រស់ និងផ្លែឈើទៅកាន់ទីផ្សារអាមេរិក។
គូសបញ្ជាក់ផងដែរថា យោងតាមស្ថិតិរបស់ក្រសួងឧស្សាហកម្ម និងពាណិជ្ជកម្មវៀតណាមបានឱ្យដឹងថា បច្ចុប្បន្នវៀតណាមមានផ្ទៃដីដាំដូងសរុបប្រមាណជា ១៨៨.000 ហិកតាហើយផលិតបាន ១.៩ លានតោនក្នុងមួយឆ្នាំ ហើយក្នុងមួយឆ្នាំវៀតណាមអាចរកចំណូលពីការនាំចេញដូងបានប្រមាណជា ១ពាន់លានដុល្លារ៕
