ក្រសួងធំៗ ៣ រួមមាន ក្រសួងសាធារណការ​ និងដឹកជញ្ជូន, ក្រសួងសេដ្ឋកិច្ច និងហិរញ្ញវត្ថុ ព្រមជាមួយក្រសួងបរិស្ថាន បានកំពុងពិភាក្សាគ្នា ក្នុងការផ្អាកមិនឲ្យមានការនាំចូលរថយន្ដមួយទឹក ដែលមានអាយុកាលយូរឆ្នាំ ចូលមកទីផ្សារកម្ពុជា។ នេះបើយោងតាមការប្រសាសន៍លើរបស់ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ចូន នៅថ្ងៃទី២១ ខែមេសា ឆ្នាំ២០២៣។

ថ្លែងនៅក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេស (ឆៀក) យានយន្ត សាខាសំរោងអណ្តែត ឯកឧត្ដមទេសរដ្ឋមន្ដ្រីបានមានប្រសាសន៍យ៉ាងដូច្នេះថា «យើងបានពិភាក្សាគ្នាជាមួយក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ នឹងរៀបចំពិនិត្យមើលថាតើឡានមួយទឹក អាយុប៉ុន្មានមិនអនុញ្ញាតឲ្យនាំចូល។ ឥឡូវយើងកំពុងពិភាក្សាគ្នាតើ ១០ ឆ្នាំ ឬ ១៥ ឆ្នាំ ឬ៧ ឆ្នាំ»។

ឯកឧត្ដមបន្ដថា សព្វថ្ងៃក្រសួងបាននិងកំពុងជំរុញឲ្យប្រជាពលរដ្ឋយើងប្រាស់ឡានដែលប្រើប្រាស់ថាពលអគ្គិសនី ដែលរថយន្ដមួយប្រភេទនេះថ្មីហើយ មានតម្លៃធូរថ្លៃជាងរថយន្ដមួយទឹកទៀត។ បច្ចុប្បន្នរថយន្ដអគ្គិសនីនេះមានការកើនឡើងច្រើននៅក្នុងមួយឆ្នាំៗ ហើយក្រសួងក៏បានខិតខំប្រឹងឲ្យអ្នកវិនិយោគបង្កើតកន្លែងបញ្ចូលថាពលអគ្គិសនីឲ្យបានច្រើននៅទូទាំងប្រទេសកម្ពុជា។ ខណៈបច្ចុប្បន្នគឺមាន ១២ ទៅ ១៣ កន្លែងហើយ។

ជាចុងក្រោយឯកឧត្ដមទេសរដ្ឋមន្ដ្រី ស៊ុន ចាន់ថុល បានសូមណូមពរ ក៏ដូចជាលើកទឹកចិត្ដឲ្យប្រជាពលរដ្ឋគួរទិញរថយន្ដថ្មីដែលប្រើប្រាស់ថាពលអគ្គិសនី ដោយសាររថយន្ដមួយប្រភេទនេះគឺមានតម្លៃធូរថ្លៃជាងរថយន្ដមួយទឹកទៅទៀត៕

អត្ថបទ៖ កឹម ប៊ុនធឿន