ពីមុនការផ្គត់ផ្គង់ដែកនៅក្នុងប្រទេសកម្ពុជា គឺពឹងផ្អែកលើការនាំចូលពីក្រៅប្រទេសស្ទើរទាំងស្រុងដោយសារតែយើងមិនទាន់មានសមត្ថភាពផលិតដោយខ្លួនឯង។ ក៏ប៉ុន្ដែមកដល់ពេលនេះកម្ពុជាចាប់ផ្ដើមមានសមត្ថភាពនៅក្នុងការផលិតដែកដោយខ្លួនឯងហើយ។ ជាក់ស្ដែងក្រុមហ៊ុន ISI STEEL ដែលជាបុត្រសម្ព័ន្ធក្រុមហ៊ុន ISI GROUP បង្កើតឡើងដោយកូនខ្មែរ បច្ចុប្បន្នបាននិងកំពុងផលិតដែកជាច្រើនប្រភេទសម្រាប់ផ្គត់ផ្គត់ទីផ្សារកម្ពុជា និងនាំចេញទៅក្រៅប្រទេសថែមទៀតផង។
តាមការបញ្ជាក់ពីលោក កាំង ឡេង អគ្គនាយកប្រតិបត្ដិ និងប្រធានក្រុមប្រឹក្សាភិបាល ISI GROUP និងអគ្គនាយកនៃក្រុមហ៊ុន ISI STEEL មកកាន់ BUSINESS CAMBODIA បានឲ្យដឹងថា បច្ចុប្បន្នក្រុមហ៊ុន ISI STEEL មានផលិតផលិតផលជាច្រើនដូចជា៖ ស័ង្កសី ISI ផាម, ដែកសរសៃ ISI, ដែកទីប-ស អាយ.អេស.អាយ, ដែកC, ដែកZ, ដែក Deck អាយ.អេស.អាយ និងដែក H&I ជាដើម។ ក្រៅពីនោះក្រុមហ៊ុនក៏មានផលិត ផលិតផលសំណង់ដូចជា ម្សៅបៀកជញ្ជាំង Camstar, ឆ្អឹងពិដាន ម្នាងសិលា រួមទាំងបរិក្ខាអគ្គិសនីផ្សេងៗទៀត។
លោកអគ្គនាយករូបនេះបន្ដថា ក្រៅពីផ្គត់ផ្គង់ដែកលើទីផ្សារក្នុងស្រុក ក្រុមហ៊ុន ISI STEEL ក៏បាននាំចេញផលិតផលដុំរ៉ូឡូដែក-ស អាយ.អេស.អាយ ទៅកាន់ទីផ្សារសហរដ្ឋអាមេរិក ប្រទេសមីយ៉ាន់ម៉ា និងបណ្ដាប្រទេសមួយចំនួនទៀតនៅអាស៊ី។ ហើយក្រៅពីផលិតផលនេះ ក្រុមហ៊ុនក៏បាននាំចេញដែកទីប-ស អាយ.អេស.អាយ ទៅកាន់ទីផ្សារក្នុងតំបន់ផងដែរ។
ការនាំចេញទៅកាន់ទីផ្សារក្រៅស្រុកនេះ សបញ្ជាក់ឲ្យឃើញថា ផលិតផលដែកដែលផលិតដោយ ISI STEEL មិនមែនមានត្រឹមតែស្ដង់ដារទទួលស្គាល់នៅក្នុងប្រទេសកម្ពុជាទេ ប៉ុន្ដែក្រុមហ៊ុនបានអនុឡោមទៅតាមស្ដង់ដារអន្ដរជាតិ ISO 9001:2015, ស្តង់ដារជប៉ុន JIS រួមជាមួយស្ដង់ដារ ASTM ដែលជាតម្រូវការសម្រាប់ប្រទេសនាំចូលផងដែរ។ ជាមួយគ្នានេះដែរ ក្រុមហ៊ុនបាននិងកំពុងបន្ដសិក្សាឱកាសនាំចេញទៅកាន់ប្រទេសអូស្ដ្រាលី ប្រទេសកាណាដា និងប្រទេសជិតខាងមួយចំនួនទៀត។ នេះជាការបញ្ជាក់បន្ថែមពីលោក កាំង ឡេង។
សូមជម្រាបថា ក្រុមហ៊ុន ISI STEEL បានបើកដំណើរការកាលពីឆ្នាំ១៩៩៧ ហើយមុខរបរដែលក្រុមហ៊ុនចាប់ផ្ដើមមុនគេនោះគឺសិប្បកម្មកិនស័ង្កសី ដែលមានលក្ខណៈបែបគ្រួសារ។ ប៉ុន្ដែក្នុងរយៈពេល ២៨ ឆ្នាំមកនេះ ក្រុមហ៊ុនបានធ្វើការអភិវឌ្ឍ និងពង្រីកខ្លួនរហូតក្លាយជាក្រុមហ៊ុនផលិតដែកស្ដង់ដារ និងធំជាងគេនៅក្នុងប្រទេសកម្ពុជា។ ដោយក្នុងនោះក្រុមហ៊ុនបានធ្វើការផ្គត់ផ្គង់ដែកសម្រាប់ការសាងសង់សំណង់ធំៗជាច្រើនដូចជា៖ ផ្សារទំនើប អ៊ីអន មានជ័យ, អាកាសយានដ្ឋានអន្ដរជាតិតេជោ, រោងចក្រ, ក្រុមហ៊ុនអភិវឌ្ឍន៍អចលនទ្រព្យ និងក្រុមហ៊ុនសាងសង់ជាដើម។
ដូច្នេះសម្រាប់លោកអ្នកដែលចង់បានផលិតផលដែកពីក្រុមហ៊ុន ISI STEEL យកទៅសាងសង់សំណង់ផ្សេងៗ ឬយកទៅចែកចាយបន្ដ អាចធ្វើការទំនាក់ទំនងមកកាន់ក្រុមហ៊ុនតាមរយៈលេខទូរស័ព្ទ៖ 092 881 188/023 880 098 ឬហ្វេសប៊ុកផេក ISI STEEL បាន៕
