ធ្វើឱ្យអ្នកគាំទ្រនៅលែងសុខហើយ ខណៈក្រុមហ៊ុនផលិតរថយន្ត Toyota បានដាក់បង្ហាញនូវអាគុយអគ្គិសនីជំនាន់ថ្មី ដែលគ្រោងនឹងផលិតរថយន្ត EVsស៊េរីថ្មីរបស់ខ្លួន ដោយសាកថ្មម្តងជិះបានចម្ងាយ ៦០០ ម៉ាយ (១,000 គីឡូម៉ែត្រ)។ នេះបើយោងតាមការចុះផ្សាយរបស់សារព័ត៌មាន THE STREET កាលពីម្សិលមិញនេះ។
ក្រុមហ៊ុន Toyota បានប្រកាសកាលពីថ្ងៃអង្គារថា ខ្លួននឹងផលិតថ្មដែលមានសមត្ថភាពខ្ពស់ និងរឹងមាំ ព្រមទាំងបច្ចេកវិទ្យាចុងក្រោយបំផុតផ្សេងទៀត ដើម្បីជាការកែលម្អដល់ដំណើរការ និងកាត់បន្ថយថ្លៃដើមរថយន្តអគ្គិសនី។ ក្រុមហ៊ុនបានឱ្យដឹងទៀតថា ខ្លួនមានបំណងដាក់លក់អាគុយជំនាន់ក្រោយនៅឆ្នាំ ២០២៦ ដើម្បីសម្រួលដល់អ្នកប្រើប្រាស់អាចបើកបរបានយូរ និងពេលវេលាសាកថ្មលឿនជាងមុន។
ក្រុមហ៊ុនបានបន្ថែមទៀតថា ខ្លួននឹងផលិតរថយន្តអគ្គិសនីជំនាន់ថ្មីរបស់ខ្លួនជាមួយនឹងថ្ម lithium-ion ដោយនឹងរៀបចំឱ្យបានល្អជាងម៉ូឌែលមុនៗ ពោលត្រូវជិះឱ្យបានចាប់ពី ១ពាន់ គីឡូឡើង ខណៈរថយន្ត Tesla Model Y ដែលជារថយន្តអគ្គិសនីដែលលក់ដាច់បំផុតលំដាប់ថ្នាក់អន្តរជាតិ អាចបើកបរបានចម្ងាយត្រឹមប្រហែល៥៣០ គីឡូម៉ែត្រប៉ុណ្ណោះ។
គួរបញ្ជាក់ផងដែរថា Toyota មិនបានបញ្ជាក់លម្អិតពីតម្លៃរំពឹងទុក និងកន្លែងផលិតរថយន្តអគ្គិសនីរយៈចម្ងាយឆ្ងាយថ្មីរបស់ខ្លួននៅឡើយទេ។ ស្របគ្នានេះដែរលោក Takero Kato ប្រធានផ្នែករថយន្តអគ្គិសនីចុងក្រោយបង្អស់របស់ Toyota BEV Factory បាននិយាយកាលពីថ្ងៃអង្គារថា "អ្វីដែលយើងចង់សម្រេចបានគឺការផ្លាស់ប្តូរអនាគតជាមួយនឹង BEVs" ។
