យោងតាមការបញ្ជាក់ពីឯកឧត្ដម កែវ រតនៈ រដ្ឋមន្ដ្រីក្រសួងរ៉ែ និងថាមពល នៅថ្ងៃទី២២ ខែមិថុនា ឆ្នាំ២០២៥ បានឲ្យដឹងថា ក្រុមហ៊ុនប្រេងបារាំង TotalEnergies បានបញ្ជាក់ជំហរពង្រីកការវិនិយោគក្នុងទីផ្សារប្រេង ឧស្ម័ន និងថាមពលកកើតឡើងវិញនៅកម្ពុជា។ ជំហរនៃការពង្រីកការវិនិយោគរបស់ក្រុមហ៊ុនបារាំងនេះ ត្រូវបានលើកឡើងដោយលោក Mehmet CELEPOGLU នាយករងក្រុមហ៊ុន TatalEnergies សម្រាប់តំបន់អូសេអានី និងអាស៊ីអាគ្នេយ៍ នៅក្នុងជួបពិភាក្សាការងារជាមួយឯកឧត្ដម។
សូមជម្រាបថា ក្រុមហ៊ុន TotalEnergies ចាប់ផ្តើមប្រតិបត្តិការនៅក្នុងប្រទេសកម្ពុជាដំបូងក្នុងឆ្នាំ ១៩៩៣។ គិតមកដល់ពេលបច្ចុប្បន្ននេះ ក្រុមហ៊ុន បានបង្កើតបណ្តាញស្ថានីយ៍សរុបជាង ១០០ ទីតាំងហើយ។ ដោយក្នុងនោះ ៥៨ ស្ថានីយ៍ស្ថិតនៅក្នុងរាជធានីភ្នំពេញ និង ៤៩ ស្ថានីយ៍ទៀតស្ថិតនៅតាមបណ្តាលខេត្ត។
ក្រៅពីប្រេងឥន្ធនៈសម្រាប់យានយន្ត TotalEnergies ក៏ផ្គត់ផ្គង់ប្រេងឥន្ធនៈសម្រាប់ឧស្សាហកម្ម ប្រេងឥន្ធនៈអាកាសចរណ៍ និងប្រេងរំអិលផងដែរ។ មិនត្រឹមតែប៉ុណ្ណោះ នៅតាមស្ថានីយ៍ TotalEnergies ក៏មានហាង Bonjour ដែលជាហាងលក់ទំនិញរាយដ៏ល្បីល្បាញ ដែលមានចំនួនប្រមាណ ៥២ កន្លែងផងដែរ៕
