ក្រោយពីនៅខ្មែរមានកន្លែងលក់ឡានTesla មិនទាន់បានប៉ុន្មានផង ពេលនេះក្រុមហ៊ុន Tesla បានចុះបញ្ជីត្រៀមចូលទីផ្សាប្រទេសថៃវិញម្ដង ដើម្បីធ្វើការដាក់លក់ឡានអគ្គិសនីរបស់ខ្លួន។ នេះបើយោងតាម​ សារព័ត៌មាន Thaiger បានឱ្យដឹងថា ការចុះបញ្ជីនេះធ្ចើឡើងនៅថ្ងៃទី២៥ ឧសភា ឆ្នាំ ២០២២។

ប្រភពដដែលបញ្ជាក់ថា គោលបំណងចម្បងរបស់ក្រុមហ៊ុន Tesla នៅក្នុងប្រទេសថៃគឺលក់រថយន្តអគ្គិសនី ឬ EVs ហើយក្រុមហ៊ុនក៏នឹងដំឡើង និងលក់ប្រព័ន្ធស្តុកថាមពល និងប្រព័ន្ធផលិតថាមពលផងដែរ។ ប៉ុន្ដែគេមើលឃើញថា Tesla ទំនងជាលក់រថយន្ដនៅថៃជាជាងផលិត ឬដំឡើងរថយន្តនៅក្នុងប្រទេសនេះ។

ដើម្បីលើកទឹកចិត្តឱ្យមានការប្តូរទៅប្រើរថយន្ត EV រដ្ឋាភិបាលបានធ្វើឱ្យស្ថានីយ៍សាកថ្មអាចប្រើប្រាស់ដោយឥតគិតថ្លៃ។

ការមកដល់របស់ក្រុមហ៊ុន Tesla នៅក្នុងប្រទេសថៃគឺស្របតាមគោលនយោបាយរបស់រដ្ឋាភិបាលក្នុងការជំរុញការប្រើប្រាស់រថយន្តអគ្គិសនីដើម្បីកាត់បន្ថយការបញ្ចេញកាបូន។ កាល​ពី​ខែ​មីនា រដ្ឋាភិបាល​ថៃ​បាន​អនុម័ត​ថវិកា​ចំនួន ៣ ពាន់​លាន​បាត ដើម្បី​ឧបត្ថម្ភ​ដល់​តម្លៃ​លក់​រាយ​រថយន្ត EV សម្រាប់​អតិថិជន​ក្នុង​ប្រទេស​ថៃ។ ហើយរដ្ឋាភិបាលនឹងកាត់បន្ថយពន្ធលើប្រាក់ចំណូលលើរថយន្ត EV ផងដែរ។

កាលពីខែមីនាកន្លងទៅ ក្រុមហ៊ុន Great Wall Motor និង MG Camp បានយល់ព្រមចូលរួមក្នុងគម្រោងរបស់រដ្ឋាភិបាល ហើយបានដាក់លក់រថយន្ត EV សរុបចំនួន ២ ០០០ គ្រឿងនៅក្នុងប្រទេសថៃ។ ក្រៅពីនោះ ក្រុមហ៊ុន Benz, BMW, Honda, Mitsubishi, Nissan, Foxconn និង Neta ក៏បានបង្ហាញចំណាប់អារម្មណ៍ក្នុងការលក់រថយន្ត EV នៅក្នុងប្រទេសថៃផងដែរ។ ឥឡូវនេះបានបន្ថែម Tesla ទៅក្នុងបញ្ជីមួយទៀត៕

អត្ថបទ៖ ឌឿក ស្រីនុត រតនៈ