ភាគហ៊ុន Tesla ដែលជាក្រុមហ៊ុនផលិតឡានអគ្គិសនីដ៏ល្បីរបស់សហរដ្ឋអាមេរិកគឺជាភាគហ៊ុនមួយដែលមានតម្លៃខ្ពស់ពោលគឺគិតត្រឹមថ្ងៃនេះភាគហ៊ុនឡានអគ្គិសនីមួយនេះឡើងដល់៩២២ដុល្លារក្នុងមួយហ៊ុន តែអ្នកវិភាគថាតម្លៃហ៊ុននេះអាចនឹងធ្លាក់ថ្លៃជាង៥០%។
បើយោងតាមការចុះផ្សាយរបស់ Yahoo Finance បានឲ្យដឹងថាតម្លៃហ៊ុន Tesla បច្ចុប្បន្នមិនសូវមានការប្រែប្រួលខ្លាំងនោះ ប៉ុន្ដែតម្លៃហ៊ុននេះអាចនឹងធ្លាក់ចុះជាង៥០%នៃតម្លៃបច្ចុប្បន្នបើយោងតាមការវិភាគរបស់លោក Itay Michael របស់ក្រុមហ៊ុន Citi ។
លោក Itay Michael បានលើកឡើងនូវហេតុផលមួយចំនួនដែលធ្វើឲ្យតម្លៃភាគហ៊ុន Tesla អាចដាំក្បាលចុះ។ ហើយមូលហេតុធំមួយនោះគឺបច្ចុប្បន្នតម្លៃភាគហ៊ុនថ្លៃហួសឬអាចនិយាយបានថាឡើងដល់កំពូល( Overpriced) ដែលពិបាកមានឱកាសហក់ឡើង។
លោកបានឲ្យដឹងទៀតបើមើលទៅលើកត្ដាមូលដ្ឋាននៃក្រុមហ៊ុនដោយវិភាគទៅលើថ្លៃបច្ចុប្បន្នធៀបនឹងប្រាក់ចំណេញក្នុងមួយភាគហ៊ុនដែលគេហៅថាP/E នោះតួលេខP/Eឡើងរហូតដល់ទៅ៧៥ដែលមានន័យថាតម្លៃហ៊ុននេះថ្លៃកប់ពពក។
លើសពីនេះបើមើលពីប្រាក់ចំណេញវិញឃើញថាកាលពីឆ្នាំ២០២១កន្លងទៅក្រុមហ៊ុន Tesla រកប្រាក់ចំណេញបានប្រមាណ១០០ពាន់លានដុល្លារ តែនៅក្នុងឆ្នាំ២០២២នេះប្រាក់ចំណេញរបស់ Teslaបានធ្លាក់ចុះមកត្រឹម៣០ពាន់លានដុល្លារនៅត្រឹមពាក់កណ្ដាលឆ្នាំ២០២២នេះ។ មិនតែប៉ុណ្ណោះការលក់ឡានម៉ូដែលY មានការធ្លាក់ចុះដោយសារតម្លៃថ្លៃដល់ទៅជាង៦ម៉ឹនដុល្លារក្នុងមួយគ្រឿង ហើយTeslaកាន់តែបាត់បង់ទីផ្សារនៅអាមេរិកខណៈមានក្រុមហ៊ុនជាច្រើនចាប់ផ្ដើមប្រកួតប្រជែកក្នុងការបញ្ចេញឡានអគ្គិសនី៕
