គណៈគ្រប់គ្រង និងបុគ្គលិកនៃផ្សារទំនើប Super Duper បានធ្វើការបរិច្ចាគ ទឹកប្រាក់ចំនួន $5,000 ដល់មន្ទីរពេទ្យគន្ធបុប្ផា ដែលជាមន្ទីរពេទ្យផ្តល់សេវាថែទាំសុខភាពដោយឥតគិតថ្លៃដល់កុមារនៅប្រទេសកម្ពុជា។ ការបរិច្ចាគនេះមានគោលបំណងគាំទ្រដល់កិច្ចខិតខំប្រឹងប្រែងរបស់មន្ទីរពេទ្យគន្ធបុប្ផា ក្នុងការផ្តល់ការថែទាំសុខភាពប្រកបដោយគុណភាពដល់កុមារកម្ពុជា រាប់ម៉ឺននាក់ក្នុងមួយឆ្នាំៗ។ ការបរិច្ចាគនេះត្រូវបានទទួលដោយអគ្គនាយកមន្ទីរពេទ្យគន្ធបុប្ផា លោកវេជ្ជបណ្ឌិត Denis Laurent ។

មុននឹង​ធ្វើការ បរិច្ចាគទៅកាន់មន្ទីរពេទ្យគន្ធបុប្ផា គណៈគ្រប់គ្រងរបស់ Super Duper បានពិភាក្សាជាមួយ​បុគ្គលិក​របស់​ខ្លួនគ្រប់រូប ដើម្បី​ទទួល​បាន​ការ​ផ្ដល់នូវមតិ​យោបល់​ចំពោះការជ្រើសរើស សប្បុរសជន ឬស្ថាប័ន​ណា​មួយដែល​ត្រូវផ្ដល់​ជំនួយ។ បុគ្គលិកជាច្រើន បានជ្រើសរើសយកការធ្វើបរិច្ចាគ ជួយដល់មន្ទីរពេទ្យគន្ធបុប្ផា ដោយសារតែ មន្ទីរពេទ្យនេះបានផ្តល់នូវការថែទាំសុខភាពដ៏សំខាន់ៗ ដល់ក្រុម កុមារកម្ពុជា។

លោក សម្បត្តិ ជាជំនួយការអ្នកគ្រប់គ្រងសាខាផ្សារទំនើប Super Duper បានសម្តែងការគាំទ្រ ចំពោះការជួយដល់សហគមន៍តាមរយៈការបរិច្ចាគនេះ។ លោក​បាន​បញ្ជាក់​ទៀតថា Super Duper តែងតែស្វែងរកវិធីសាស្រ្ដ និងមធ្យោបាយដើម្បីរួមចំណែក ជាផលវិជ្ជមានជូនដល់សង្គម។ ក្រុមហ៊ុនសង្ឃឹមថាការរួមចំណែករបស់ខ្លួន នឹងជំរុញទឹកចិត្តទៅដល់ បុគ្គល​និងស្ថាប័ន ដទៃទៀតក្នុងការធ្វើទង្វើសប្បុរសធម៌ និងគាំទ្រការផ្តល់ជាអត្ថប្រយោជន៍ដល់ កុមារដែលត្រូវការជំនួយ។

ការបរិច្ចាគរបស់ Super Duper គឺជាសក្ខីភាពមួយចំពោះការប្តេជ្ញាចិត្តរបស់គណៈគ្រប់គ្រង និងបុគ្គលិក ក៏ដូចជា កាតព្វកិច្ចចំពោះសង្គម។ ការប្តេជ្ញាចិត្តរបស់ក្រុមហ៊ុនយើង សង្ឃឹមថា នឹងបានចូលរួមចំណែកដ៏សំខាន់ទៅកាន់សហគមន៍។ ជាមួយនឹងការគាំទ្រនេះ មន្ទីរពេទ្យគន្ធបុប្ផានឹងអាចបំពេញការងារសំខាន់ៗរបស់ខ្លួនបន្ថែមទៀត ក្នុងការផ្តល់នូវការថែទាំសុខភាពប្រកបដោយគុណភាពដល់កុមារដែលត្រូវការជំនួយនៅប្រទេសកម្ពុជា៕