នាយកដ្ឋានឧតុនិយមថៃបានធ្វើសេចក្តីប្រកាសព័ត៌មានអំពីការធ្លាក់ភ្លៀង បាតុភូតផ្គរ រន្ទះ ខ្យល់កន្ត្រាក់ និងអាចប្រឈមមុខជាមួយនឹងព្យុះ នៅតំបន់មួយចំនួនក្នុងប្រទេសថៃនាពេលឆាប់ៗខាងមុខនេះ កៀកទៅនឹងថ្ងៃបុណ្យសង្រ្កាន្ត។ នេះបើយោងតាមការចុះផ្សាយរបស់ Thaiger News កាលពីថ្ងៃទី១០ ខែមេសានេះ។
តំបន់ដែលរងការប៉ះទង្គិចរួមមាន ភាគខាងជើងដូចជាខេត្ត Tak, Kamphaeng Phet, Phichit, Phitsanulok និងភាគកណ្តាលមានដូចជាខេត្ត Nakhon Sawan, Uthai Thani, Lopburi, Saraburi, Suphan Buri, Kanchanaburi និងនៅតំបន់ភាគខាងកើតមាន Ratchaburi Nakhon Nayok និង Prachinburi ហើយសូម្បីតែទីក្រុងបាងកកក៏អាចឃើញព្យុះមួយចំនួននៅសប្តាហ៍នេះក្នុងអំឡុងពិធីបុណ្យសង្រ្កាន្ត។
ចំពោះបាតុភូតព្យុះនេះគឺបណ្តាលមកពីប្រព័ន្ធសម្ពាធខ្ពស់ពីប្រទេសចិន បាននឹងកំពុងរំកិលមកលើតំបន់ភាគឦសាន និងភាគខាងកើតនៃប្រទេសថៃ និងសមុទ្រចិនខាងត្បូង ដែលបណ្តាលឱ្យមានខ្យល់បក់បោកពីភាគខាងត្បូង និងភាគអាគ្នេយ៍ ដែលនាំសំណើមពីឈូងសមុទ្រថៃ និងសមុទ្រចិនខាងត្បូង មកកាន់ផ្នែកខាងលើនៃប្រទេសថៃ។
ក្នុងនោះដែរនាយកដ្ឋានថៃបានធ្វើការរំលឹកដល់អ្នកដែលរស់នៅតំបន់ខាងលើឱ្យមានការប្រុងប្រយ័ត្នខ្ពស់ កុំនៅទីវាល នៅក្រោមដើមឈើធំៗ កុំនៅជិតអគារដែលកំពុងសាងសង់មិនមានរចនាសម្ព័ន្ធការពារច្បាស់លាស់។ សម្រាប់បងប្អូនប្រជាកសិករសូមថែរក្សាដំណាំនិងប្រយ័ត្នសត្វពាហនៈ ដែលអាចរងការវាយប្រហារណាមួយជាយថាហេតុ។
គួរជម្រាបផងដែរថាប្រទេសថៃបានរងសីតុណ្ហភាពក្តៅបំផុតកាលពីសប្តាហ៍មុនរហូតហក់ឡើងខ្ពស់ដល់៥០អង្សា នាសង្កាត់ បាងណា នៅក្នុងទីក្រុងបាងកក។ ហើយតំបន់ដែលមានកម្តៅខ្លាំងបន្ទាប់ពីទីក្រុងបាងកក មានដូចជា ខេត្តឈុនបូរី (៤៩អង្សា) ខេត្តភូកេត (៤៧អង្សា) ខេត្តស៊ីសាកេត (៤១អង្សា) និង ខេត្តផេតចាប៊ុន(៤០អង្សា)ជាដើម៕
អត្ថបទដោយ៖ ពីង ជូអេង
