ការចាប់ផ្ដើមនូវអាជីវកម្មមួយដោយខ្លួនឯង គឺជាបំណងប្រាថ្នារបស់មនុស្សជាច្រើនតែងតែប៉ង។ ប៉ុន្តែមិនមានមនុស្សច្រើននោះទេដែលអាចចាប់ផ្ដើមអាជីវកម្មក្នុងក្ដីស្រមៃរបស់ខ្លួនឱ្យចេញជារូបរាង។ នៅពេលដែលនិយាយដល់ការចាប់ផ្ដើមអាជីវកម្ម គឺមានឧបសគ្គដ៏ធំមួយដែលតែងតែរារាំងមនុស្សភាគច្រើនមិនឱ្យចេញរកស៊ីបាននោះគឺដើមទុន ឬ លុយ។ ប៉ុន្តែខាងក្រោមនេះគឺជាគន្លឹះមួយចំនួនការចាប់ផ្ដើមអាជីវកម្មមួយឱ្យចេញជារូបរាង បើទោះបីជាបុគ្គលម្នាក់នោះគ្មានលុយសូម្បីតែមួយរៀលក៏ដោយ។
១. ចេះប្រើធនធានដែលខ្លួនមាន៖ មនុស្សម្នាក់ៗគឺមានធនធានច្រើនណាស់ដែលពួកគេមាន ប៉ុន្តែមានមនុស្សមិនសូវជាច្រើនទេដែលអាចប្រើប្រាស់នូវធនធានដែលខ្លួនមានដើម្បីចាប់ផ្ដើមអាជីវកម្ម។ ជាក់ស្ដែងសម្រាប់កំពូលតារា Tik Tok គឺលោក Khaby Lame អតីតកម្មកររោងចក្រ ដែលក្លាយជាសេដ្ឋីវ័យក្មេងទ្រព្យរាប់លានដុល្លារ មុនពេលលោកមានជំនួញជាច្រើនក្នុងដៃ និងមានអ្នកតាមដានជាង ១០០លាននាក់នៅជុំវិញពិភពលោក គឺចាប់ផ្ដើមពីការថតវីដេអូដោយប្រើទូរស័ព្ទដៃចាស់មួយតែប៉ុណ្ណោះ។
២. ពូកែចរចា៖ ជំនាញចរចាជាជំនាញដ៏សំខាន់មួយដែលអាចធ្វើឱ្យអ្នកអាចចាប់ផ្ដើមអាជីវកម្មមួយបានដោយមិនប្រើប្រាស់លុយខ្លួនឯងសូម្បីតែមួយរៀល។ ឧ. បុគ្គលម្នាក់មានលក់នូវផលិតផលដ៏ល្អមួយ ប៉ុន្តែការលក់របស់គេមិនសូវដាច់ទាល់តែសោះ។ ដូច្នេះហើយ ប្រសិនបើអ្នកមានជំនាញចរចា អ្នកអាចសុំយកផលិតផលគេមកលក់បន្តហើយចាំពេលណាដែលលក់ដាច់ចាំទូរទាត់លុយឱ្យគេវិញ។
៣. បង្កើតអាជីវកម្មបែបសេវាកម្ម៖ ការបង្កើតនូវអាជីវកម្មបែបសេវាកម្ម ភាគច្រើនគឺមិនត្រូវចំណាយលុយច្រើនដូចជាការធ្វើអាជីវកម្មផលិតផលនោះទេ។ ការធ្វើអាជីវកម្មបែបសេវាកម្មភាគច្រើនគឺទាមទារនូវចំណេះដឹង បទពិសោធន៍ ទេពកោសល្យច្រើនជាងត្រូវការលុយ។ តើអាជីវកម្មអ្វីខ្លះដែលអាចចាត់ទុកថាជាអាជីវកម្មបែបសេវាកម្ម? ឧ. សេវាកម្មបកប្រែ សេវាកម្មប្រឹក្សាយោបល់ សេវាកម្មបង្រៀនតាមផ្ទះ....។
៤. គំនិតអាជីវកម្មដ៏អស្ចារ្យ៖ នាពេលបច្ចុប្បន្ននេះ មានអ្នកវិនិយោគទុនជាច្រើនដែលកំពុងតែរង់ចាំនូវឱកាសវិនិយោគដើម្បីបង្កើនប្រាក់ចំណេញរបស់ពួកគេ។ ប្រសិនបើយើងអាចស្រាវជ្រាវ ឬបង្កើតនូវគំនិតអាជីវកម្មមួយដ៏អស្ចារ្យបានហើយនោះ អ្នកអាចយកគំនិតអាជីវកម្មនេះទៅបង្ហាញដល់អ្នកវិនិយោគទុនផ្សេងៗបាន។ ប្រសិនបើគេគិតថាគំនិតអាជីវកម្មរបស់អ្នកនេះពិតជាអាចជោគជ័យនៅក្នុងទីផ្សារបាន គេមិនខ្លាចក្នុងការបោះទុនវិនិយោគជាមួយអ្នកនោះទេ ហើយពេលនោះហើយដែលអ្នកអាចចាប់ផ្ដើមអាជីវកម្មមួយបានយ៉ាងជោគជ័យ បើទោះបីជាអ្នកគ្មានលុយសូម្បីតែមួយរៀលក៏ដោយ។
សរុបមកវិញ ដើម្បីអាចចាប់ផ្ដើមអាជីវកម្មមួយបាន ដើមទុនលែងជាឧបសគ្គចម្បងដែលតែងតែរារាំងអ្នកក្នុងការចាប់ផ្ដើមអាជីវកម្មទៀតហើយ។ ដើម្បីអាចចាប់ផ្ដើមអាជីវកម្មមួយបាននាពេលបច្ចុប្បន្ននេះ គឺគេត្រូវការចំណេះ ជំនាញ បទពិសោធន៍ ជាចាងត្រូវការធនធានជាលុយតែមួយមុខ។ នៅពេលវិធីសាស្ត្រជាច្រើនផ្សេងទៀតដែលយើងអាចចាប់ផ្ដើមអាជីវកម្មមួយបាន បើទោះបីជាយើងគ្មានលុយក៏ដោយ៕
ចូលរួមក្នុងក្រុមចែករំលែកពិសេស ដោយឥតគិតថ្លៃ https://t.me/LongVathanak777