អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. អេឌ្យូខេសិន បានគូសបញ្ជាក់ពីការពង្រីកសាខាជ្រោយចង្វារនេះ ដែលជាការឆ្លើយតបទៅនឹងការជឿទុកចិត្តដ៏ធំធេងពីអ្នកអាណាព្យាបាល និងសិស្សានុសិស្ស និងតម្រូវការក្នុងតំបន់ថា៖ «ពីមុន យើងត្រូវកំណត់ចំនួនសិស្សានុសិស្សដែលមកចុះឈ្មោះចូលរៀន ដោយសារថ្នាក់រៀនយើងមានកំណត់។ ជាមួយនឹងការពង្រីកសាខានេះ យើងអាចស្វាគមន៍សិស្សឱ្យកាន់តែច្រើន ហើយយើងនៅតែអាចធានាគុណភាពអប់រំរបស់យើងនៅតែជាអាទិភាពដដែល»។
លោក ឡាយ សុភា ប្រធាន នៃមជ្ឈមណ្ឌលភាសា អា អាយ អាយ បានបន្ថែមថា៖ «ការពង្រីកសាខានេះមិនមែនត្រឹមតែពង្រីកទំហំនោះទេ ប៉ុន្តែវាក៏ជាការបង្កើនបទពិសោធសិក្សា និងបំពេញតម្រូវការដែលកំពុងវិវត្តនៃសហគមន៍អ្នកសិក្សារបស់យើង។ ពួកយើងក៏គ្រោងនឹងបន្ថែមកម្មវិធីភាសារបស់យើងដូចជាកម្មវិធីភាសាខ្មែរ ភាសាបារាំង និងភាសាផ្សេងៗទៀតក្នុងពេលឆាប់ៗនេះ»។
Aii គឺជាគ្រឹះស្ថានអប់រំឈានមុខគេមួយនៅប្រទេសកម្ពុជា ដែលផ្តល់ជូននូវកម្មវិធី និងវគ្គសិក្សាយ៉ាងសម្បូរបែបលើជំនាញភាសាអង់គ្លេស ចិន និងថៃ។ ដោយមានការប្តេជ្ញាចិត្តយ៉ាងមុតមាំលើការផ្តល់ការអប់រំប្រកបដោយគុណភាព និងភាពជោគជ័យរបស់សិស្សានុសិស្ស Aii ទទួលបានកេរ្តិ៍ឈ្មោះ និងទំនុកចិត្តក្នុងការផ្តល់ការអប់រំលើជំនាញភាសា។ Aii ដែលជាផ្នែកមួយនៃ ក្រុមហ៊ុន ម៉េងលី ជេ. គួច អេឌ្យូខេសិន (MJQE) គឺជាគ្រឹះស្ថានអប់រំឈានមុខគេក្នុងប្រទេសកម្ពុជា ដែលមានសាខាចំនួន ២០ ហើយកំពុងរៀបចំដំណើរការសាខាបន្តបន្ទាប់ទៀត៕
