មិនមែនគ្រាន់តែជៀសវាងសំលេងរំខាននោះទេ ប្រសិនបើអ្នកតែងតែដាក់ទូរស័ព្ទ Silent Mode ជាប់ជាទម្លាប់់នោះ អ្នកប្រហែលជាកំពុងផ្ញើសារទៅកាន់ពិភពលោកអំពីរបៀបដែលអ្នករស់នៅ ការគិតនិងព្រំដែនបុគ្គល។ ដូច្នេះបើតាមការសិក្សាចិត្តវិទ្យាមួយពីសាកលវិទ្យាល័យ Kyung Hee បានបង្ហាញថា មនុស្សទម្លាប់បិទសំឡេងទូរស័ព្ទ ច្រើនមានចរិតបុគ្គលលក្ខណៈ៣បែបនេះ៖
១. ជាមនុស្ស Ambivert៖ ការជួបជុំគ្នាក្នុងសង្គមអាចមានភាពរីករាយ សម្រាប់អ្នកប៉ុន្តែមានពេលខ្លះអ្នកចង់បានភាពស្ងប់ស្ងាត់ដើម្បីបញ្ចូលថាមពល។ ដូច្នេះការទុកទូរស័ព្ទឱ្យគ្មានសំឡេងរំខាន គឺជាទម្លាប់ដែលផ្តាច់ខ្លួនពីពិភពលោកខាងក្រៅ ដើម្បីអាចនៅជាមួយនឹងគំនិតព្រមទាំងអារម្មណ៍របស់ខ្លួនឯង ជាមួយនឹង បរិយាកាសផ្ទាល់ខ្លួន។
២. ជាមនុស្សរើសទំនាក់ទំនង៖ នេះមិនមែនជាចរិតឆ្មើងឆ្មៃទេ ប៉ុន្តែមនុស្សប្រភេទនេះ មានការយល់ដឹងថាវេលានិងការយកចិត្តទុកដាក់របស់គេ គឺជាធនធានមានកំណត់។ ដូច្នេះការទុកទូរស័ព្ទឱ្យគ្មានសំឡេងរំខាន គឺជាទម្លាប់កំណត់អាទិភាពប្រកបដោយប្រសិទ្ធភាព ដូចជាជ្រើសរើសថាអ្នកចង់ទាក់ទងនឹងនរណា ចង់មើលអ្វី ឬចូលការសន្ទនាផ្ទាល់ជាជាងការតបសារខ្លីៗជាដើម។
៣. ជាមនុស្សអត់ធ្មត់៖ ការអត់ធ្មត់គឺជាគុណតម្លៃមួយរបស់មនុស្ស ហើយក៏អាចទាក់ទងគ្នានឹងទម្លាប់ប្រើទូរស័ព្ទរបស់យើងផងដែរ។ ដូច្នេះប្រសិនបើអ្នកតែងតែទុកទូរស័ព្ទឱ្យគ្មានសំឡេងរំខាន វាអាចបង្ហាញពីថាអ្នកជាមនុស្សអត់ធ្មត់ខ្ពស់ អ្នកយល់ថាមិនមែនអ្វីៗទាំងអស់ត្រូវការ ការឆ្លើយតបភ្លាមៗនោះទេ។ ដូចជាការឆ្លើយតបសារមិនចាំបាច់យ៉ាងប្រញាប់ប្រញាល់ ហើយស្រូបថាមពលរបស់អ្នក ។
ពិតណាស់ទម្លាប់ដាក់ទូរស័ព្ទក្នុង Silent Mode មិនត្រឹមតែបញ្ជាក់ពីការផ្តោតអារម្មណ៍លើកិច្ចការ ស្វែងរកភាពច្នៃប្រឌិយនោះទេ ប៉ុន្តែក៏អាចបញ្ជាក់ពីបុគ្គលលក្ខណៈមនុស្សបានផងដែរ។ យោងតាមការសិក្សា ការកំណត់ទូរស័ព្ទរបស់អ្នកឱ្យស្ងាត់ពិតជាអាចកាត់បន្ថយភាពតានតឹង ជួយបន្ថយកម្រិត cortisol និងធ្វើអោយប្រសើរឡើងនូវការផ្តោតអារម្មណ៍ ការគេង និងអារម្មណ៍ស្ងប់ផងដែរ៕
អត្ថបទដោយ៖ ពីង ជូអេង
