យោងតាមព្រះរាជក្រឹត្យចុះថ្ងៃទី២១ ខែតុលា ឆ្នាំ២០២៤ ព្រះករុណា ព្រះបាទ សម្តេចព្រះបមរនាថ នរោត្តម ស៊ីហមុនី ព្រះមហាក្សត្រកម្ពុជា សព្វព្រះរាជហឫទ័យ តែងតាំងលោក Scott Neeson (ស្កុត នីសីន) ប្រធានអង្គការមូលនិធិកុមារកម្ពុជា(CCF) ជាទីប្រឹក្សាផ្ទាល់សម្តេចនាយករដ្ឋមន្ត្រីកម្ពុជា។
សូមបញ្ជាក់ថាលោក Scott Neeson គឺជាបុរសជនជាតិអូស្រ្តាលី បច្ចុប្បន្នជាស្ថាបនិកនិងជាប្រធានអង្គការមូលនិធិកុមារកម្ពុជា (Cambodia Children Fund) ។ លោកគឺជាជនបរទេសនិងជាសប្បុរសជនដ៏សកម្មមួយរូប ដែលបានជួយសង្គ្រោះជីវិតកុមារកម្ពុជា ជាច្រើនរូបចាកចេញពីគំនរសំរាមស្ទឹងមានជ័យនិងអាចឱ្យពួកគាត់មានឱកាសសិក្សារៀនសូត្រចេះដឹង អាចរៀបចំកសាងអនាគតខ្លួនឯង។
ជាអតីតនាយកក្រុមហ៊ុនធ្វើការនៅ Hollywood ផលិតខ្សែភាពដ៏ល្បីល្បាញនៅទូទាំងសកលលោក ចំនួន២៦ឆ្នាំ ខណៈដែលអាចទទួលបានប្រាក់ចំណូលប្រចាំឆ្នាំរាប់លានដុល្លារ ប៉ុន្តែនៅឆ្នាំ២០០៣ លោកបាន ផ្លាស់ប្តូរចិត្តក្រោយបានមកទស្សនកិច្ចនៅកម្ពុជាប្រមាណ៥សប្តាហ៍។
ដោយហេតុថាមានកុមារអាស្រ័យផលលើគំនរសំរាមស្ទឹងមានជ័យ សុំលោកនូវឱកាសរៀនសូត្រ។ ក្នុងឆ្នាំ២០០៤ លោកក៏បានសម្រេចចិត្តមករស់នៅប្រទេសកម្ពុជា និងបង្កើតមូលនិធិកុមារកម្ពុជាឡើង ដើម្បីផ្ដល់នូវការសិក្សារៀនសូត្រដល់កុមារទាំងនោះ។
មកទល់បច្ចុប្បន្ននេះក្រោមការលះបង់របស់លោក Scoot Neeson មានកុមារកម្ពុជាច្រើនដែលបានសម្រេចក្តីស្រមៃ ផ្លាស់ប្តូរជីវិត មានឱកាសរៀនសូត្របានខ្ពង់ខ្ពស់ ក្លាយជាធនធានសង្គម ដោយពួកគេទាំងនោះបានចាត់ទុកលោកស្កុត គឺជាវីរបុរសរបស់កុមាររើសសំរាមនៅទីលានចាក់សំរាមស្ទឹងមានជ័យ៕
អត្ថបទដោយ៖ ពីង ជូអេង
