ភាពជោគជ័យលើក្តីប្រាថ្នាក្នុងជីវិត ប្រៀបបីដូចជាដំណើរផ្លូវដ៏វែងឆ្ងាយ តែដើម្បីដើរទៅឱ្យដល់គោលដៅ វាតម្រូវឱ្យយើងត្រូវចេះបោះបង់រឿងមិនល្អចោលខ្លះ ដើម្បីឱ្យស្រាលខ្លួន មាំមួន ឈានជំហានបានកាន់តែឆ្ងាយ។
យ៉ាងណាមិញបើតាមដែលអ្នកជំនាញចិត្តសាស្រ្ត អ្នកស្រី Jeanette Brown បានបង្ហាញថា នេះជាទម្លាប់មិនល្អបំផុត ចំនួន៥ ដែលមនុស្សត្រូវបោះចោលជាបន្ទាន់ ប្រសិនបើពួកគេចង់ឱ្យជីវិតរីកចម្រើន មានសេចក្តីសុខជាងមុន មានសុខភាពល្អ ផ្លូវចិត្តរឹងមាំ និងអាចរកលុយបានច្រើន។
ទម្លាប់ទី១. ពន្យារពេលលើការងារដែលត្រូវធ្វើ៖ ការពន្យារពេលអាចក្លាយជាទម្លាប់អាក្រក់ដដែលៗ បើយើងមិនបានប្រុងប្រយ័ត្ន វាអាចរារាំងយើងពីការធ្វើកិច្ចការប្រកបដោយផលិតភាពនិងបំផ្លាញទេពកោសល្យដ៏ល្អបំផុតរបស់យើងបាន។ ដូច្នេះចូរកាត់បន្ថយឬបញ្ឍប់ទម្លាប់ពន្យារពេលលើកិច្ចការងារ ដែលមានត្រូវធ្វើ ជាបន្ទាន់ ប្រសិនបើចង់ជោគជ័យក្នុងជីវិត។
ទម្លាប់ទី២. មិនចេះគ្រប់គ្រងអារម្មណ៍៖ មនុស្សដែលមិនចេះគ្រប់គ្រងអារម្មណ៍នឹងត្រូវអារម្មណ៍គ្រប់គ្រងវិញជាមិនខាន ខណៈការមិនចេះគ្រប់គ្រងអារម្មណ៍នេះ នឹងបណ្តាលឱ្យមនុស្ស ចេះតែធ្វើការងារ បណ្តែតបណ្តោយតាមអារម្មណ៍ ពុំមានគោលជំហរជាក់លាក់ សម្រាប់ជីវិតនោះឡើយ។
ទម្លាប់ទី៣. និយាយអវិជ្ជមានពីខ្លួនឯងនិងអ្នកដទៃ៖ មនុស្សដែលរវល់និយាយអវិជ្ជមានអំពីអ្នកដទៃព្រមទាំងមើលរំលងគុណតម្លៃនិងចំណុចពិសេសរបស់ខ្លួនឯង នឹងពុំមានពេលវេលាគ្រប់គ្រាន់ក្នុងការអភិវឌ្ឍន៍ជីវិតផ្ទាល់ខ្លួននោះទេ។
ទម្លាប់ទី៤. ខ្វះភាពអត់ធ្មត់៖ ភាពជោគជ័យដ៏រឹងមាំ តែងត្រូវការពេលវេលា ដូច្នេះវាទាមទារឱ្យមនុស្សចេះអត់ធ្មត់នឹងខំប្រឹងប្រែង ប៉ុន្តែមនុស្សដែលខ្វះភាពអត់ធ្មត់ តែងមានការសម្រេចចិត្តប្រញាប់ប្រញាល់ ហើយឆាប់បោះបង់ នឹងធ្វើឱ្យគេពិបាកសម្រេចគោលបំណងក្នុងជីវិតណាស់។
ទម្លាប់ទី៥. ប្រៀបធៀបខ្លួនឯងនិងអ្នកដទៃ៖ ការប្រៀបធៀបខ្លួនយើងទៅនឹងអ្នកដទៃអាចជំរុញឱ្យមានអារម្មណ៍ច្រណែន ភាពមិនគ្រប់គ្រាន់ និងការសង្ស័យលើខ្លួនឯង។ ការប្រៀបធៀបខ្លះវាបានបង្វែរអារម្មណ៍របស់យើងពីការផ្តោតលើដំណើរជីវិតរបស់ខ្លួនឯង ដែលជាកិច្ចការពិតប្រាកដ ជួយឱ្យយើងសម្រេចជោគជ័យតាមបែបជាខ្លួនឯងបាន។
ជាការពិតណាស់ការបោះបង់ទម្លាប់ ឬផ្លាស់ប្តូរអត្តចរិត វាមិនងាយស្រួលឬអាចកើតឡើងមកជាល្អក្នុងពេលត្រឹមមួយយប់នោះទេ ប៉ុន្តែវាជាជំហាននីមួយៗ ការព្យាយាមម្តងបន្តិចជាប្រចាំមិនថាវាតូចប៉ុនណានោះវាគឺជាការរីកចម្រើន៕
អត្ថបទដោយ៖ ពីង ជូអេង