ធ្លាប់ជាអតីតពលករដែលធ្លាប់បម្រើការងារនៅឯប្រទេសថៃ លោក ហៀង សាវុធ បាននាំយកបច្ចេកទេសចិញ្ចឹមជ្រូកថ្មីមួយ ដែលអាចវិវត្តពីការចិញ្ចឹមជ្រូកពី ៤០ ក្បាលកើនដល់ ៤០០ក្បាលមិនដែលខាត ជ្រូកមិនដែលឈឺ ហើយចាយថ្លៃដើមអស់តិចបំផុត។

ក្នុងកិច្ចសម្ភាសន៍ជាមួយ Business Cambodia  លោក ហៀង សាវុធ ម្ចាស់កសិដ្ឋានចិញ្ចឹមជ្រូកធំមួយនៅក្នុងខេត្ត បាត់ដំបង បានឱ្យដឹងថា តាមរយៈបទពិសោធន៍ចិញ្ចឹមជ្រូកប្រមាណជា ៤ ឆ្នាំមកនេះ លោកមិនដែលខាតម្តងឡើយ បើទោះបីជាជ្រូកធ្លាក់ថ្លៃនៅសល់តែមួយគីឡូ ៧ទៅ៨ពាន់រៀនក៏លោកនៅតែមិនខាតដែរ នេះដោយសារតែលោកចំណាយលើការចិញ្ចឹមអស់តិចទាំងកម្លាំងពលកម្ម ថ្នាំវ៉ាក់សាំងជ្រូកក៏មិនដែលចាក់ ចំណែកទឹកភ្លើងក៏មិនប្រើ ហេតុនេះទើបធ្វើឱ្យលោកអាចចំណាយថ្លៃដើមអស់តិច។ ទស្សនាវីដេអូពេញ 

លោកបានឱ្យដឹងទៀតថា​ មូលហេតុដែលលោកចិញ្ចឹមជ្រូកអស់ថ្លៃដើមតិចបែបនេះដោយសារតែលោក ចិញ្ចឹមតាមបច្ចេកទេសថ្មីមួយខុសពីការចិញ្ចឹមទូទៅ៖ ដោយលោកចិញ្ចឹមជ្រូកលើដីផ្ទាល់ដែលក្រាលតែអង្កាមប៉ុណ្ណោះ ហើយជារៀងរាល់មួយសប្តាហ៍ម្តងលោកបាញ់ថ្នាំជីលីនស៊ីជាប្រភេទថ្នាំធម្មជាតិពុំមែនជាថ្នាំគីមីឡើយ ចំពោះថ្នាំនេះដែរធ្វើអស់តែ១ម៉ឺនរៀលខ្មែរ អាចប្រើបានដល់ទៅកន្លះឆ្នាំ។ ចំណែកឯគុណសម្បត្តិរបស់ថ្នាំនេះគឺជួយបំបាត់ក្លិនស្អុយ ហើយបើកាលណាគ្មានក្លិនក៏គ្មានរុយដែលជាអ្នកបង្កររោគដែលនាំឱ្យជ្រូកប៉ះជំងឺ ហើយបើជ្រូកមិនប៉ះជំងឺយើងក៏មិនពិបាកព្យាបាលអស់លុយទិញថ្នាំដែរ។

ម្ចាស់កសិដ្ឋានរូបនេះក៏បានបញ្ជាក់បន្ថែមថា ផលចំណេញនៃការចិញ្ចឹមជ្រូកបែបនេះក្រៅពីចំណាយថ្លៃដើមតិចហើយ សូម្បីតែកម្លាំងពលកម្មក៏តិចដែរ ពោលគឺក្នុងការចិញ្ចឹមជ្រូក៤០០ក្បាល លោកធ្វើតែ២នាក់ប្តីប្រពន្ធគាត់ប៉ុណ្ណោះ ហើយមួយថ្ងៃធ្វើការតែ២ដងទេគឺពេលដាក់ចំណីឱ្យជ្រូក ចំណែកឯការស្រោចទឹកវិញក៏មិនមានដែរ ព្រោះការចិញ្ចឹមជ្រូកលើដីវាមានសភាពត្រជាក់ស្រាប់មិនពិបាកស្រោចទឹកដូចការចិញ្ចឹមជ្រូកលើជ្រុងស៊ីម៉ង់ឡើយ។

គូសបញ្ជាក់ផងដែរថា បច្ចេកទេសទាំងអស់នេះ លោក ហៀង សាវុធ គឺបានរៀនសូត្រមកពីប្រទេសថៃ ដោយសារលោកធ្លាប់ជាអតីតពលករខ្មែរ ដែលធ្លាប់បម្រើការងារនៅក្នុងកសិដ្ឋានចិញ្ចឹមជ្រូក ហើយនៅអំឡុងពេលបម្រើការងារលោកក៏លួចរៀនសង្កេត រៀនមើលពីបច្ចេកទេសនៃការចិញ្ចឹមរហូតអាចយល់ដឹងកាន់តែច្រើនពីការចិញ្ចឹមជ្រូកនេះ រហូតឈានដល់ការមកបើកកសិដ្ឋានចិញ្ចឹមជ្រូកផ្ទាល់ខ្លួននាពេលបច្ចុប្បន្ននេះ៕

ចូលរួមសិក្ខាសាលា "ក្បួនពង្រីកអាជីវកម្ម" ជាមួយវាគ្មិន៣រូប លោកកែវទ្បង់ឌី​-​ប្រធានបទ-ក្បួនពង្រីករបស់ Babay Outlet លោកយន់សុផាត​-ប្រធានបទ​-ក្បួនខ្ចីលុយគេកុំឲ្យព្រួយ លោកសំកុសល-ប្រធានបទ-​ក្បួនពង្រីកខ្លួនរបស់ចាបក្រហម នៅថ្ងៃសៅរ៍ ទី០៣ ខែមិថុនា ឆ្នាំ២០២៣ ខាងមុខនេះ Showroom Isuzu 15$/នាក់សម្រាប់ព័ត៌មានលម្អិត និងចុះឈ្មោះតាមលេខ +855 85 827 828/ 093 300 755

អត្ថបទដោយ៖សម្បត្តិ សុខឡាង