ធនាគារ UIster Bank ដែលជាធនាគារធំមួយនៅចក្រភពអង់គ្លេសនៃប្រទេសអៀរឡង់មានអាយុកាល១៨៦ឆ្នាំ សម្រេចចិត្តបិទសាខារបស់ខ្លួនទាំងអស់ចំនួន៦៣សាខាពោលគឺបិទឈប់រកស៊ីតែម្ដងខណៈបុគ្គលិកត្រូវបង្ខំចិត្តរកការងារថ្មីហើយអតិថិជនត្រូវប្ដូរទៅធនាគារផ្សេង។
បើយោងតាមការចុះផ្សាយរបស់សារព័ត៌មានIrishtimes របស់អៀរឡង់បានឲ្យដឹងថាធនាគារ UIster Bank បានប្រកាសថាខ្លួននឹងបិទសាខាចំនួន៦៣ទាំងអស់នៅត្រឹមថ្ងៃទី២១ខែមេសាឆ្នាំ២០២៣នេះ។
ប្រភពដដែលបានឲ្យដឹងថាដើមចមដែលធ្វើឲ្យធ្វើធនាគារអាយុកាលជិត២០០ឆ្នាំមួយនេះត្រូវបង្ខំចិត្តបិទទ្វាឈប់រកស៊ីនៅទីផ្សារអៀរឡង់មានដំណើរវែងឆ្ងាយ។ នៅឆ្នាំ២០២០ ធនាគារ NatWest ដែលជាក្រុមហ៊ុនមេរបស់ UIster Bank បានប្រកាសពីការធ្វើកំណែទម្រង់ប្រតិបត្តិការរបស់ខ្លួននៅទីផ្សារអៀរឡង់ក្រោយពីវិបត្តិហិរញ្ញវត្ថុសកលឆ្នាំ២០០៨។
នៅវិបត្តិហិរញ្ញវត្ថុសកលឆ្នាំ២០០៨ NatWest បានផ្ដល់ជំនួយ១៥ពាន់លានផោនទៅកាន់ UIster Bank ហើយក៏សម្រេចច្របាច់បញ្ចូលគ្នា។ យ៉ាងណាមិញចាប់តាំងពីពេលនោះមកទុនកម្ចីរបស់ UIster Bank ស្រកចុះយ៉ាងខ្លាំងពោលគឺជាងពាក់ណ្ដាលដោយសារតែកម្ចីខូចយ៉ាងច្រើន។ នៅខែកុម្ភៈឆ្នាំ២០២១ NatWest បានសម្រេចដើរចេញពីទីផ្សារអៀរឡង់បន្ទាប់ពីរកស៊ីបានជាង១៦០ឆ្នាំ។ ការចាកចេញរបស់ NatWest បានធ្វើឲ្យ UIster Bank រង្គោះរង្គើ មិនអាចឈរជើងរហូតឈានដល់ការបិទសាខាជាបន្តបន្ទាប់។
ទន្ទឹមនឹងការប្រកាសបិទទ្វារនេះ អតិថិជនរបស់ UIster Bank ត្រូវធ្វើការដកប្រាក់បញ្ញើរបស់ខ្លួនឲ្យបានមុនថ្ងៃទី៣១ខែមីនាឆ្នាំ២០២៣ខណៈធនាគារប្រកាសបិទសាខាជាផ្លូវការនៅថ្ងៃទី២១ខែមេសាឆ្នាំ២០២៣តទៅ។
បើតាមសម្ដីរបស់លោកស្រី Jane Howard នាយកប្រតិបត្តិ UIster Bank បានមានប្រសាសន៍ថាបច្ចុប្បន្នអតិថិជន បុគ្គលិកនិងម្ចាស់ភាគហ៊ុនសម្រុកដកលុយព្រោងព្រោតខណៈយើងនឹងបិទសាខាទាំងអស់។ លោកស្រីបានបន្ថែមទៀតថាខណៈពេលដែលយើងបិទសាខា គណនីធនាគារទាំងអស់ក៏ត្រូវបានបិទដូចគ្នា ដូច្នេះអតិថិជនត្រូវប្ដូរកុងធនាគារទៅធនាគារផ្សេងថ្មីមួយទៀតជាប្រញាប់។ ចំណែកបុគ្គលិកធនាគារ UIster Bank ចំនួន៦០០នាក់នឹងត្រូវបញ្ឈប់ពីកាងារប្រមាណជា២ទៅ៣ខែខាងមុខទៀត។
គួរបញ្ជាក់ផងដែរថាចំពោះការបិទទ្វាររបស់ធនាគារ UIster Bankនេះ មានធនាគារធំៗ២បានចូលខ្លួនមកទិញយកទ្រព្យរបស់ធនាគារជាពិសសអគារសាខាជាដើម ដោយក្នុងនោះធនាគារTSB បានយកសាខារបស់ UIster bank ចំនួន២៥សាខាមកកាន់កាប់ ហើយធនាគារ AIBក៏ចូលខ្លួនមកគ្រប់គ្រងទ្រព្យដែលនៅសេសសល់ផងដែរ។
ធនាគារ UIster bank គឺជាធនាគារដែលមានអាយុកាលចាស់បំផុតរបស់អៀរឡង់ ហើយក៏ធ្លាប់ជាធនាគារលំដាប់កំពូលទាំង៣នៅអៀរឡង់រាប់ជំនាន់មកហើយ។ ធនាគារនេះកាន់កាប់កម្ចីទិញផ្ទះ១៥%នៅទីផ្សារអៀរឡង់ហើយក៏មានអតិថិជនដាក់ប្រាក់បញ្ញើចំនួន២០ពាន់លានអឺរ៉ូផងដែរ៕
