មេរោគ Norovirus គឺកើតមាននៅតំបន់មានអាកាសធាតុត្រជាក់ខ្លាំងដោយភាគច្រើនផ្ទុះឡើងនៅសហរដ្ឋអាមេរិក នឹងងាយកើតទៅលើកុមារតូចៗ ដែលមានប្រព័ន្ធសុំាខ្សោយនារដូវរងារ។ ដោយឡែកកាលពីថ្មីៗនេះសាលារៀនមួយក្នុងខេត្ត Rayong ប្រទេសថៃ មានកូនសិស្សនិងគ្រូបង្រៀន បានឆ្លងមេរោគប្រភេទ Norovirus នេះចំនួន១៤៣៦នាក់។
ចំពោះរោគសញ្ញានៃជំងឺនេះមានអាការៈដូចជា ក្អួត ក្តៅខ្លួន រាគរូស ឈឺក្រពះ ឈឺក្បាលនិងឈឺរាងកាយ។ យ៉ាងណាមិញបើតាម មជ្ឍមណ្ឌលប្រយុទ្ធប្រឆាំងជំងឺឆ្លងរបស់សហរដ្ឋអាមេរិក CDC បានណែនាំថាមានវិធីសាស្រ្ត៣ចំណុច អាចការពារខ្លួនពីមេរោគ Norovirus នេះ។
១. អាហារឆ្អិនល្អ មានអនាម័យ និងក្តៅល្អ៖ លាងបន្លែនិងផ្លែឈើ គ្រឿងសមុទ្រត្រីសាច់ ឱ្យបានស្អាត និងចម្អិនឱ្យបានឆ្អិនល្អ។ ចម្អិនអយស្ទ័រឱ្យបានហ្មត់ចត់ នៅក្នុងសីតុណ្ហភាពយ៉ាងហោចណាស់ 145°F។ ចំពោះមេរោគ Norovirus អាចសម្លាប់បានល្អនៅកម្តៅយ៉ាងតិច 145°F ហើយសម្រាប់អាហារចម្អិនរហ័សឬចំហុយក៏មិនអាចសម្លាប់មេរោគនេះបានដែរ។
២. រៀបចំសម្ភារៈផ្ទះបាយ និងបោកគក់សម្លៀកបំពាក់៖ លាងទុកដាក់ ជ្រុញកាំបិត ផ្ទះបាយធ្វើម្ហូប ឱ្យបានស្អាតល្អជាមួយសាប៊ូក្រោយប្រឡាក់ជាមួយអាហារឆៅរួច ទុកដាក់អាហារឆៅដាច់ឱ្យដោយឡែកពីអាហារឆ្អិន។ បោកគក់ភ្លាមៗនូវ សម្លៀកបំពាក់ឬសម្ភារៈជាមួយសាប៊ូនិងទឹកក្តៅ ឱ្យបានស្អាតល្អក្រោយប្រឡាក់កំអួតឬលាមក។
៣. លាងដៃជាមួយសាប៊ូ៖ វីរុសនេះនឹងមិនអាចសម្លាប់បានដោយប្រើទឹកអាកុលនោះទេ ដូច្នេះចូរចំណាយពេលយ៉ាងហោចណាស់២០វិនាទី ក្នុងការលាងសម្អាតដៃរបស់អ្នកឱ្យបានស្អាតល្អ ជាមួយសាប៊ូនិងទឹក ក្រោយចេញពីបង្គន់និងមុនញុំាអាហារ ប្តូរកន្ទបលាមក ឬចាប់កាន់សម្ភារៈផ្សេងៗឱ្យខ្លួនឯងនិងអ្នកដទៃ។
សូមបញ្ជាក់ថាមេរោគ Norovirus នេះអាចចម្លងពីមនុស្សម្នាក់ទៅមនុស្សម្នាក់ តាមរយៈលាមក ការក្អួត ការប៉ះដោយផ្ទាល់ និងប្រើសម្ភារៈរួម ហើយសម្រាប់បុគ្គលដែលបានប៉ះពាល់ជាមួយវីរុសនេះនឹងបញ្ចេញអាការៈជំងឺនៅរយៈពេល ១២ទៅ២៨ម៉ោងបន្ទាប់៕
