នៅសហរដ្ឋអាមេរិកអយស្ទ័រគឺជាអាហារសមុទ្រដ៏ពេញនិយមដែលមានលក់សឹងតែគ្រប់កន្លែងសឹងតែគ្រប់ភោជនីដ្ឋាន ប៉ុន្តែកាលពីពេលថ្មីៗនេះនាយកដ្ឋានសុខភាពរបស់អាមេរិកបានអំពាវនាវឲ្យអ្នកចូលចិត្តបរិភោគអយស្ទ័រឆៅ បញ្ឈប់ការបរិភោគនេះភ្លាមៗក្រោយគេបានរកឃើញថាអាហារប្រភេទនេះបានផ្ទុកមេរោគឆ្លងម៉្យាងមានឈ្មោះថា norovirus ដែលអាចបង្ករឲ្យមនុស្សកើតជំងឺក្រពះពោះវៀនបាន។
បើយោងតាមការចុះផ្សាយរបស់ Desert Sun កាលពីថ្ងៃទី១៧ខែធ្នូឆ្នាំ២០២៤ បានឲ្យដឹងថានាយកដ្ឋានសុខភាពសាធារណៈរដ្ឋកាលីហ្វ័រញ៉ា (CDPH) បានប្រកាសមិនឱ្យបរិភោគអយស្ទ័រឆៅដែលនាំចេញមកពី Vancouver, British Columbia, Pacific Northwest Shellfish នៃប្រទេសកាណាដា ព្រោះវាអាចបង្ករជាជំងឺក្រពះពោះវៀន ដែលបង្កឡើងដោយមេរោគណូរ៉ូវីរុស។
គិតត្រឹមថ្ងៃទី ១២ ខែធ្នូ មានករណីដែលត្រូវបានគេប៉ាន់ស្មានថាជាករណីមេរោគ norovirus មានចំនួន៥៧ករណីដែលពួកគេបានញ៉ាំអយស្ទ័រឆៅនៅភោជនីយដ្ឋានជាច្រើនកន្លែងក្នុងរដ្ឋកាលីហ្វ័រញ៉ា។
យ៉ាងណាមិញ CDPH បានសហការជាមួយនាយកដ្ឋានសុខភាពសាធារណៈក្នុងស្រុកនិងអ្នកចែកចាយទាំងអស់រួមគ្នាធ្វើវិធានការបោះចោលនូវអយស្ទ័រទាំងនោះដើម្បីការពារការឆ្លងមេរោគប្រភេទនេះ។ រោគសញ្ញានៃការឆ្លងមេរោគនេះមានដូចជាក្អួត រាគ ចង្អោរ និងរមួលក្រពះ ក្រៅពីរោគសញ្ញាទាំងនេះក៏មានរោគសញ្ញាផ្សេងទៀតអាចកើតមានឡើងរួមមានគ្រុនក្តៅ ឈឺក្បាល និងឈឺរាងកាយដែររោគសញ្ញាទាំងនេះស្រដៀងនឹងគ្រុនផ្តាសសាយនិងឈឺក្រពះផងដែរ។ ជាធម្មតាវានឹងប្រតិកម្មក្រោយការឆ្លងរយ:ពេល ១២ទៅ២៨ម៉ោងក្រោយពេលឆ្លងមេរោគ។ មេរោគប្រភេទនេះវាងាយឆ្លងគឺតាមរយ:ការបរិភោគអាហារឆៅនិងមិនបានសម្អាតស្អាតល្អ។
